യൂത്ത് കോൺ​ഗ്രസ് പ്രതിഷേധം; മാധ്യമപ്രവർത്തകരുടെ ക്യാമറകൾ തട്ടിമാറ്റി, വാക്കേറ്റം; കോലം കത്തിച്ചു

ചിലർ ക്യാമറകൾക്ക് മുന്നിൽ വന്ന്, തട്ടിമാറ്റി. ഇതിനിടെ മാധ്യമപ്രവർത്തകരും യൂത്ത് കോൺ​ഗ്രസ് പ്രവർത്തകരും തമ്മിൽ ഏറെ നേരം വാക്കേറ്റമുണ്ടായി. 

തിരുവനന്തപുരം: യൂത്ത് കോൺ​ഗ്രസ് പ്രതിഷേധം തുടരുന്നതിനിടെ ദൃശ്യങ്ങൾ ചിത്രീകരിച്ച മാധ്യമപ്രവർത്തകർക്ക് നേരെ പ്രവർത്തകർ തിരിഞ്ഞു. ചിലർ ക്യാമറകൾക്ക് മുന്നിൽ വന്ന്, തട്ടിമാറ്റി. ഇതിനിടെ മാധ്യമപ്രവർത്തകരും യൂത്ത് കോൺ​ഗ്രസ് പ്രവർത്തകരും തമ്മിൽ ഏറെ നേരം വാക്കേറ്റമുണ്ടായി. പൊലീസ് പല തവണ യൂത്ത് കോൺ​ഗ്രസ് പ്രവർത്തകരെ പിന്തിരിപ്പിക്കാൻ ശ്രമിച്ചെങ്കിലും അവർ പിന്തിരിഞ്ഞില്ല. പലപ്രാവശ്യം പൊലീസും യൂത്ത് കോൺ​ഗ്രസ് പ്രവർത്തകരും നേർക്ക് നേർ‌ ഏറ്റുമുട്ടി. ഏറെ നേരം ഇവിടെ സംഘർഷസാഹചര്യം നിലനിന്നിരുന്നു. 

മുഖ്യമന്ത്രി, സ്പീക്കർ, പൊതുമരാമത്ത് വകുപ്പ് മന്ത്രി എന്നിവരുടെ കോലവുമായാണ് യൂത്ത് കോൺ​ഗ്രസ് പ്രവർത്തകർ പ്രതിഷേധവുമായി എത്തിയത്. അതിന് മുമ്പ് മഹിളാ കോൺ​ഗ്രസ് പ്രവർത്തകരും മന്ത്രി മുഹമ്മദ് റിയാസിന്റെ പ്രസ്താവനയിൽ പ്രതിഷേധിച്ചു കൊണ്ട് ഒരു വാഴയിൽ മുഹമ്മ​ദ് റിയാസിന്റെ മുഖം വെച്ചുകൊണ്ട് എത്തുകയുണ്ടായി. അതുപോലെ സ്പീക്കറുടെ കോലം കത്തിച്ചു. 

ഇതിന് ശേഷമാണ് ബാരിക്കേഡ് തള്ളിമാറ്റി മുന്നോട്ട് പോകാനുളള യൂത്ത് കോൺ​ഗ്രസ് പ്രവർത്തകരുടെ ശ്രമം തടഞ്ഞത്. പൊലീസുമായി നേർക്കു നേർ ഏറ്റുമുട്ടിയ പ്രതിഷേധക്കാരെ പിരിച്ചുവിടാനായി പൊലീസ് ജലപീരങ്കി പ്രയോ​ഗിച്ചു. എന്നിട്ടും പ്രതിഷേധക്കാർ പിരിഞ്ഞു പോകാൻ കൂട്ടാക്കിയില്ല. ഇതിനിടെയാണ് ദൃശ്യങ്ങൾ ചിത്രീകരിച്ച മാധ്യമപ്രവർത്തകരുടെ ക്യാമറ തട്ടി മാറ്റാൻ ചിലർ ശ്രമിച്ചത്. ഇത് വീണ്ടും സംഘർഷത്തിനിടയാക്കി. പൊലീസും നേതാക്കളും ഇടപെട്ടാണ് പ്രതിഷേധക്കാരെ പിടിച്ചു മാറ്റിയത്.