ആശുപത്രിയില്‍ ചികിത്സയില്‍ കഴിയുന്ന പതിനൊന്നുകാരിയെ പീഡിപ്പിക്കാന്‍ ശ്രമം

കഴക്കൂട്ടത്തെ സ്വകാര്യ ആശുപത്രിയിലാണ് സംഭവം. കുട്ടിക്കൊപ്പമുണ്ടായിരുന്ന അമ്മ ലാബില്‍ പോയ സമയത്ത് റൂമില്‍ കയറിയ അജ്ഞാതന്‍ പെണ്‍കുട്ടിയെ കടന്നു പിടിക്കുകയും വസ്ത്രങ്ങള്‍ വലിച്ചു കീറുകയുമായിരുന്നു.

തിരുവനന്തപുരം: കഴക്കൂട്ടത്തെ സ്വകാര്യ ആശുപത്രിയില്‍ പതിനൊന്നു വയസുകാരിയെ പീഡിപ്പിക്കാൻ ശ്രമം. സിഎസ്ഐ മിഷൻ ആശുപത്രിയിലാണ് രോഗിയായ പെൺകുട്ടിയെ അഞ്ജാതൻ പീഡിപ്പിക്കാൻ ശ്രമിച്ചത്. ചൊവ്വാഴ്ച ഉച്ചയോടെ ആണ് സംഭവം.ആശുപത്രിയിലെ പേ വാര്‍ഡില്‍ ചികില്‍സയിലായിരുന്ന പെണ്‍കുട്ടിക്ക് നേരെയാണ് പീഡന ശ്രമം ഉണ്ടായത്.

കുട്ടിക്ക് ഒപ്പം ഉണ്ടായിരുന്ന അമ്മ ലാബില്‍ പോയ സമയത്തായിരുന്നു സംഭവം. അമ്മ പോയതിന് തൊട്ടുപിന്നാലെ മുറിയിലെത്തിയ യുവാവ് കുട്ടിയെ കടന്ന് പിടിക്കുകയായിരുന്നു. പെണ്‍കുട്ടിയുടെ വസ്ത്രങ്ങള്‍ ഇയാള്‍ വലിച്ചു കീറി. എന്നാല്‍ കുട്ടി നിലവിളിച്ചതോടെ ഇയാള്‍ ഇറങ്ങി ഓടുകയായിരുന്നു.

ലാബിലേക്ക് പോയ അമ്മ തിരികെ എത്തിയപ്പോള്‍ ആണ് പീഡന ശ്രമം പുറത്തറിയുന്നത്. രക്ഷിതാക്കളുടെ പരാതിയില്‍ പൊലീസ് കേസെടുത്തു. 25 വയസ് പ്രായം തോന്നിക്കുന്ന ആളാണ് ഉപദ്രവിച്ചതെന്നാണ് കുട്ടിയുടെ മൊഴി. ആശുപത്രിയിലെ സിസിടിവി ദൃശ്യങ്ങൾ പൊലീസ് ശേഖരിച്ചിട്ടുണ്ട്.