Attack Against Police : പന്തളത്ത് പൊലീസ് ഉദ്യോഗസ്ഥർക്ക് നേരെ ആക്രമണം; രണ്ട് പേർ അറസ്റ്റിൽ

സംഭവത്തിൽ കുളനട സ്വദേശി മനു, അഞ്ചൽ സ്വദേശി രാഹുൽ എന്നിവരെയാണ് അറസ്റ്റു ചെയ്തത്. ആക്രമണത്തിൽ എസ്.ഐയുടെ കാലൊടിഞ്ഞു. രണ്ടു  പൊലീസുകാർക്ക് പരിക്ക് പറ്റി. 

പത്തനംതിട്ട: പന്തളത്ത് (Pandalam) പൊലീസ് ഉദ്യോഗസ്ഥരെ ആക്രമിച്ചതിന് രണ്ട് പേർ അറസ്റ്റിലായി. വീടുകയറി അതിക്രമം നടത്തുവെന്ന പരാതി അന്വേഷിക്കാൻ എത്തിയപ്പോഴായിരുന്നു ആക്രമണം. സംഭവത്തിൽ കുളനട (Kulanada)  സ്വദേശികളായ മനു, അജി,  അഞ്ചൽ സ്വദേശി രാഹുൽ എന്നിവരെയാണ് അറസ്റ്റു ചെയ്തത്. ആക്രമണത്തിൽ എസ്.ഐയുടെ കാലൊടിഞ്ഞു. രണ്ടു  പൊലീസുകാർക്ക് പരിക്ക് പറ്റി. അജിയും മനുവും തമ്മിലുള്ള അതിർത്തി തർക്കം പരിഹരിക്കാൻ എത്തിയതായിരുന്നു പൊലീസ്. 

പൊലീസിനെ ഭീഷണിപ്പെടുത്തി വീഡിയോ, ജാമ്യത്തിലിറങ്ങിയ പ്രതികൾ വീണ്ടും പിടിയിൽ

യുവാവിനെ മർദ്ദിച്ച കേസിൽ ജാമ്യത്തിലിറങ്ങിയ പ്രതികൾ പൊലീസിനെ (Kerala Police) ഭീഷണിപ്പെടുത്തുന്ന രീതിയിൽ വീഡിയോ (Video) ചിത്രീകരിച്ച് പ്രചരിപ്പിച്ച സംഭവത്തിൽ നടപടി. വീഡിയോ ചിത്രീകരിച്ച് പ്രചരിപ്പിച്ച അഞ്ച് പേരെ തൃക്കാക്കര പൊലീസ് കസ്റ്റഡിയിലെടുത്തു. ''പിടിച്ച കത്തിട്ടാൽ പൊലീസിന്റെ കുടുംബത്ത് കേറി നിറങ്ങുമെന്ന സിനിമാ സംഭാഷണവും ചേർത്തായിരുന്നു'' വീഡിയോ പ്രചരിപ്പിച്ചത്. 

കഴിഞ്ഞ 12 ന് രാത്രി മുണ്ടംപാലം സ്വദേശി റാഫിയെ മർദ്ദിച്ച കേസിൽ അറസ്റ്റിലായ പ്രതികൾ ജാമ്യത്തിലിറങ്ങുമ്പോഴാണ് തൃക്കാക്കര പൊലീസ് സ്റ്റേഷന്റെ വരാന്തയിലും പുറത്തുമായി വീഡിയോ ചിത്രീകരിച്ചത്. സിനിമാ സംഭാഷണവും ചേർത്ത് ഈ വീഡിയോ പിന്നീട് സാമൂഹിക മാധ്യമങ്ങൾ പ്രചരിപ്പിക്കുകയായിരുന്നു. 

സാമൂഹിക മാധ്യമങ്ങളിൽ ദൃശ്യങ്ങൾ പ്രചരിച്ചതിന് പിന്നാലെ സ്പെഷ്യൽ ബ്രാഞ്ച്, ഉന്നത ഉദ്യോഗസ്ഥർക്ക് റിപ്പോർട്ട് നൽകി. തുടർന്നാണ് നടപടി. മർദ്ദന കേസ് പ്രതികളായ കുഴിവേലിപ്പടി സ്വദേശികളായ മുഹമ്മദ് റംനാസ്, അയൂബ്, ഉമറുഖ് ഫാറൂഖ് എന്നിവരെയടക്കമാണ് കസ്റ്റഡിയിലെടുത്തത്. യുവാക്കൾക്കെതിരെ പൊലീസിനെ ഭീഷണിപ്പെടുത്തിയതടക്കമുള്ള വകുപ്പുകൾ പ്രകാരം കേസെടുക്കുമെന്ന് പൊലീസ് അറിയിച്ചു.