രാത്രികാലങ്ങളിലും അതിരാവിലെയും പുറത്തിറങ്ങുമ്പോൾ ശ്രദ്ധിക്കുക; അപകട സാധ്യത കണ്ടാൽ അറിയിക്കുക, ജാഗ്രതാ പുലര്‍ത്തണമെന്ന് കെഎസ്ഇബി

കേരളത്തിൽ അതിശക്തമായ മഴ തുടരുന്ന സാഹചര്യത്തിൽ വൈദ്യുതി അപകടങ്ങൾ ഒഴിവാക്കാൻ കെ.എസ്.ഇ.ബി ജാഗ്രതാനിർദ്ദേശം പുറപ്പെടുവിച്ചു. 

തിരുവനന്തപുരം: സംസ്ഥാനത്ത് അതിശക്തമായ മഴ തുടരുന്ന സാഹചര്യത്തിൽ വൈദ്യുതിയുമായി ബന്ധപ്പെട്ട അപകടങ്ങൾ ഒഴിവാക്കാൻ അതീവ ജാഗ്രത പുലർത്തണമെന്ന് കെ.എസ്.ഇ.ബി. അറിയിച്ചു. കാറ്റിലും മഴയിലും മരക്കൊമ്പുകൾ ഒടിഞ്ഞുവീഴാൻ സാധ്യതയുള്ളതിനാൽ വൈദ്യുതി ലൈനുകൾ പൊട്ടിക്കിടക്കാനോ താഴ്ന്നുകിടക്കാനോ സാധ്യതയുണ്ട്.

• രാത്രികാലങ്ങളിലും അതിരാവിലെയും പുറത്തിറങ്ങുമ്പോൾ ഈ കാര്യങ്ങൾ ശ്രദ്ധിക്കണം:
• പൊട്ടിവീണ വൈദ്യുതി ലൈനിന്റെ അടുത്തേക്കോ അതിന്റെ പരിസരങ്ങളിലേക്കോ പോകരുത്. വൈദ്യുത പ്രവാഹം ഉണ്ടാകാൻ സാധ്യതയുള്ളതിനാൽ മറ്റാരെയും അവിടേക്ക് പോകാൻ അനുവദിക്കരുത്.
• സർവ്വീസ് വയർ, സ്റ്റേ വയർ, വൈദ്യുതി പോസ്റ്റുകൾ എന്നിവയിൽ സ്പർശിക്കുന്നത് ഒഴിവാക്കണം.
• ലോഹ ഷീറ്റുകളിലോ തൂണുകളിലോ സർവ്വീസ് വയർ തട്ടിക്കിടക്കുകയാണെങ്കിൽ വൈദ്യുതാഘാതത്തിന് സാധ്യതയുണ്ട്.

അപകടസാധ്യത ശ്രദ്ധയിൽപ്പെട്ടാൽ ഉടൻതന്നെ അടുത്തുള്ള കെ.എസ്.ഇ.ബി. സെക്ഷൻ ഓഫീസിലോ 9496010101 എന്ന എമർജൻസി നമ്പറിലോ വിവരം അറിയിക്കുക. വൈദ്യുതി തകരാറുകൾ സംബന്ധിച്ച പരാതികൾക്കായി 24/7 ടോൾഫ്രീ കസ്റ്റമർ കെയർ നമ്പർ ആയ 1912-ൽ ബന്ധപ്പെടാവുന്നതാണ്.