പ്രണയത്തിന് ഭാഷയുണ്ടോ? മൂലഭദ്രി ഭാഷയിൽ പ്രണയിച്ച ഈ ദമ്പതികൾ ഉത്തരം പറയും...

തിരുവിതാംകൂർ രാജാക്കൻമാർ ഉപയോ​ഗിച്ചിരുന്ന മൂലഭ​ദ്രി എന്ന ഭാഷ ഉപയോ​ഗിച്ചായിരുന്നു ഇവർ പ്രണയം കൈമാറിയിരുന്നത്. 

പ്രണയസന്ദേശങ്ങളയക്കുന്ന സമയത്ത് രഹസ്യ കോ‍ഡുകൾ ഉപയോ​ഗിക്കുന്ന നിരവധി ആളുകളുണ്ട്. രണ്ട് പേർക്ക് മാത്രം മനസ്സിലാകുന്ന കോഡുകൾ. മറ്റാർക്ക് ആ കത്ത് കിട്ടിയാലും ഒന്നും വായിച്ചെടുക്കാൻ കഴിയില്ല. അത്തരത്തിൽ പ്രണയ കാലത്ത് രാജഭാഷ ഉപയോ​ഗിച്ച് കത്തുകൾ കൈമാറിയ ഒരു ദമ്പതികളെ  പരിചയപ്പെടാം. കൊല്ലം കടക്കൽ സ്വദേശികളായ അനിത് സൂര്യയും ശാന്തി സത്യനും. തിരുവിതാംകൂർ രാജാക്കൻമാർ ഉപയോ​ഗിച്ചിരുന്ന മൂലഭ​ദ്രി എന്ന ഭാഷ ഉപയോ​ഗിച്ചായിരുന്നു ഇവർ പ്രണയം കൈമാറിയിരുന്നത്. 

'ശാന്തി എന്റെ സ്റ്റുഡന്റായിരുന്നു. അവിടെ വച്ചാണ് ഞാൻ ശാന്തിയെ പരിചയപ്പെടുന്നത്. അന്ന് സ്മാർട്ട് ഫോണൊന്നും വ്യാപകമായിട്ടില്ല. മലയാളത്തിലും ഇം​ഗ്ലീഷിലും എഴുതി കൊടുത്താലും മറ്റുള്ളവർ വായിക്കും. അതു കൊണ്ട് മറ്റൊരു ഭാഷയെക്കുറിച്ച് ആലോചിച്ചപ്പോൾ എനിക്ക് പെട്ടെന്ന് കിട്ടിയത് തിരുവിതാംകൂറിലെ രാജാക്കൻമാരുടെ കാലത്ത് ഉപയോ​ഗിച്ചിരുന്ന മൂലഭദ്രി എന്ന ഭാഷയാണ്. ഫോണിൽ വിളിക്കുമ്പോളും കത്തെഴുതുമ്പോളും  ഈ ഭാഷ തന്നെ ഉപയോ​ഗിച്ചു.' അനിത് പറയുന്നു. ഈ ഭാഷ പഠിക്കാൻ വളരെ എളുപ്പമാണ്. ഒരക്ഷരത്തിന് പകരം മറ്റൊരു അ​ക്ഷരം ഉപ​യോ​ഗിക്കുന്നു എന്നതാണ് ഇതിന്റെ പ്രത്യേകത. 

പരസ്പരം കമ്യൂണിക്കേറ്റ് ചെയ്യാൻ ഇത്തരം ഭാഷ കൂടിയേ തീരൂ എന്ന സാഹചര്യത്തിലൂടെയാണ് ഇവരുടെ പ്രണയ ദിനങ്ങൾ കടന്നുപോയത്. സംസാരിക്കാൻ മൂലഭദ്രി ഉപയോ​ഗിക്കുകയും എഴുത്തു ഭാഷയായി മറ്റൊരു ഭാഷയും കൂടി കണ്ടെത്തിയിരുന്നു. ഈജിപ്ഷ്യൻ ഹൈറോ​ഗ്ലിഫിക്സ് ലിപിയിൽ ഇം​ഗ്ലീഷ് ലെറ്ററിന് പകരം ഓരോ സിംബൽസ് ആണ് ഉപയോ​ഗിച്ചിരുന്നത്. അതുപോലെ ഓരോ ലെറ്ററിന് പകരം ഞങ്ങൾ തന്നെ ഒരു സിംബലുണ്ടാക്കി. അതുവെച്ചാണ് കത്തയച്ചിരുന്നത്. വീട്ടുകാരുടെ സമ്മതമില്ലാതെയുള്ള ഒരു വിവാഹമായിരുന്നു. ഇപ്പോൾ 13 വർഷമായി. സന്തോഷമായി പോകുന്നു. മൂന്നു മക്കളാണുള്ളത്. മൂത്തയാൾ എട്ടുവയസ്സുകാരി യാമി മൂന്നാം ക്ലാസിൽ പഠിക്കുന്നു. ഇരട്ടക്കുട്ടികളായ യാനിയും യാൻവിയും.