ക്യൂ നില്ക്കാതെ ഒപി ടിക്കറ്റെടുക്കാം: 600 ആരോഗ്യ സ്ഥാപനങ്ങളില് ഇ- ഹെല്ത്ത് സംവിധാനം, മറ്റൊരു നേട്ടം കൂടി !
Synopsis
130 ആരോഗ്യ കേന്ദ്രങ്ങളില് കൂടി ഇ ഹെല്ത്ത് പ്രവര്ത്തനങ്ങള് അന്തിമഘട്ടത്തിലാണെന്നും മന്ത്രി വ്യക്തമാക്കി.
തിരുവനന്തപുരം: സംസ്ഥാനത്തെ 600 ആരോഗ്യ സ്ഥാപനങ്ങളില് ഇ ഹെല്ത്ത് സംവിധാനം സജ്ജമായതായി ആരോഗ്യ വകുപ്പ് മന്ത്രി വീണാ ജോര്ജ്. അതില് 393 ആശുപത്രികളിലും ഇ ഹെല്ത്ത് സംവിധാനം സജ്ജമാക്കിയത് ഈ സര്ക്കാരിന്റെ കാലത്താണ്. 16 മെഡിക്കല് കോളേജുകളും അനുബന്ധ ആശുപത്രികളും കൂടാതെ 18 ജില്ല, ജനറല് ആശുപത്രികള്, 22 താലൂക്ക് ആശുപത്രികള്, 27 സാമൂഹികാരോഗ്യ കേന്ദ്രങ്ങള്, 453 കുടുംബാരോഗ്യ കേന്ദ്രങ്ങള്, 49 അര്ബന് പ്രൈമറി ഹെല്ത്ത് സെന്റര്, 10 സ്പെഷ്യാലിറ്റി ആശുപത്രികള്, 2 പബ്ലിക് ഹെല്ത്ത് ലാബ്, 3 മറ്റ് ആരോഗ്യ കേന്ദ്രങ്ങള് എന്നിവിടങ്ങളിലാണ് ഇ ഹെല്ത്ത് നടപ്പിലാക്കിയത്. 130 ആരോഗ്യ കേന്ദ്രങ്ങളില് കൂടി ഇ ഹെല്ത്ത് പ്രവര്ത്തനങ്ങള് അന്തിമഘട്ടത്തിലാണെന്നും മന്ത്രി വ്യക്തമാക്കി.
ആരോഗ്യ മേഖലയില് ഡിജിറ്റല് ഹെല്ത്ത് നടപ്പിലാക്കുന്നതിനായി വലിയ പ്രയത്നമാണ് നടത്തി വരുന്നതെന്ന് മന്ത്രി പറഞ്ഞു. ആരോഗ്യ സ്ഥാപനങ്ങളെ ആധുനികവത്ക്കരിക്കാന് 7.85 കോടി രൂപയുടെ ഭരണാനുമതി അടുത്തിടെ നല്കിയിരുന്നു. ഇ ഹെല്ത്തിലൂടെ ഓണ്ലൈന് ഒപി ടിക്കറ്റും പേപ്പര് രഹിത ആശുപത്രി സേവനങ്ങളും യാഥാര്ത്ഥ്യമാക്കി. ജീവിതശൈലീ രോഗനിര്ണയത്തിന് ശൈലീ ആപ്പ് ആവിഷ്ക്കരിച്ചു. ആര്ദ്രം ജനകീയ കാമ്പയിനിലൂടെ ഒന്നര കോടിയിലധികം പേരെ ആരോഗ്യ പ്രവര്ത്തകര് വീട്ടിലെത്തി സ്ക്രീനിംഗ് നടത്തി.
കാന്സര് രോഗനിര്ണയത്തിനും കാന്സര് ചികിത്സ ഏകോപിപ്പിക്കുന്നതിനും കാന്സര് ഗ്രിഡ്, കാന്സര് കെയര് സ്യൂട്ട് നടപ്പിലാക്കി വരുന്നുണ്ടെന്നും മന്ത്രി അറിയിച്ചു. വിപുലമായ ഇ സഞ്ജീവനി സേവനങ്ങള് ലഭ്യമാക്കി. ലാബ് റിസള്ട്ട് എസ്.എം.എസ്. ആയി ലഭിക്കുന്ന സംവിധാനം ലഭ്യമാക്കി. ഹൃദ്യം, ആശാധാര പദ്ധതികളുടെ സേവനം ഓണ്ലൈന് വഴിയാക്കി. ആശാധാര പദ്ധതിയുടെ ഡിജിറ്റല് പ്ലാറ്റ്ഫോമിന് അടുത്തിടെ ദേശീയ ഡിജിറ്റല് ട്രാന്സ്ഫോര്മേഷന് അവാര്ഡ് ലഭിച്ചിരുന്നു- മന്ത്രി വീണ ജോർജ് പറഞ്ഞു.
എങ്ങനെ യുണിക്ക് ഹെല്ത്ത് ഐഡി സൃഷ്ടിക്കും?
ഇ ഹെല്ത്ത് വഴിയുള്ള സേവനങ്ങള് ലഭിക്കുവാന് ആദ്യമായി തിരിച്ചറിയില് നമ്പര് സൃഷ്ടിക്കണം. അതിനായി https://ehealth.kerala.gov.in എന്ന പോര്ട്ടലില് കയറി രജിസ്റ്റര് ലിങ്ക് ക്ലിക്ക് ചെയ്യണം. അതില് ആധാര് നമ്പര് നല്കുക. തുടര്ന്ന് ആധാര് രജിസ്റ്റര് ചെയ്ത നമ്പരില് ഒടിപി വരും. ഈ ഒടിപി നല്കുമ്പോള് ഓണ്ലൈന് വ്യക്തിഗത ആരോഗ്യ തിരിച്ചറിയല് നമ്പര് ലഭ്യമാകും. ഇത് പോര്ട്ടല് വഴി ഡൌണ്ലോഡ് ചെയ്യാവുന്നതാണ്. ആദ്യതവണ ലോഗിന് ചെയ്യുമ്പോള് ഇത്തരത്തിലുള്ള 16 അക്ക വ്യക്തിഗത ആരോഗ്യ തിരിച്ചറിയല് നമ്പറും പാസ് വേര്ഡും മൊബൈലില് മെസേജായി ലഭിക്കും. ഈ തിരിച്ചറിയല് നമ്പറും പാസ് വേര്ഡും ഉപയോഗിച്ച് ആശുപത്രികളിലേക്കുള്ള നിശ്ചിത തീയതിയിലും സമയത്തുമുള്ള അപ്പോയ്മെന്റ് എടുക്കാന് സാധിക്കും.
എങ്ങനെ അപ്പോയ്മെന്റെടുക്കാം?
ഒരു വ്യക്തിക്ക് ലഭിച്ച തിരിച്ചറിയല് നമ്പരും പാസ് വേര്ഡും ഉപയോഗിച്ച് പോര്ട്ടലില് ലോഗിന് ചെയ്ത ശേഷം ന്യൂ അപ്പോയ്മെന്റ് ക്ലിക്ക് ചെയ്യുക. റെഫറല് ആണെങ്കില് ആ വിവരം രേഖപെടുത്തിയ ശേഷം ആശുപത്രി വിവരങ്ങളും ഡിപ്പാര്ട്ട്മെന്റും തെരഞ്ഞെടുക്കുക. തുടര്ന്ന് അപ്പോയ്മെന്റ് വേണ്ട തീയതി തെരഞ്ഞെടുക്കുമ്പോള് ആ ദിവസത്തില് ലഭ്യമായ ടോക്കണുകള് ദൃശ്യമാകും. രോഗികള് അവര്ക്ക് സൗകര്യപ്രദമായ സമയമനുസരിച്ചുള്ള ടോക്കണ് എടുക്കാവുന്നതാണ്. തുടര്ന്ന് ടോക്കണ് പ്രിന്റും എടുക്കാവുന്നതാണ്. ടോക്കണ് വിവരങ്ങള് എസ്.എം.എസ്. ആയും ലഭിക്കുന്നതാണ്. ഇത് ആശുപത്രിയില് കാണിച്ചാല് മതിയാകും. പോര്ട്ടല് വഴി അവരുടെ ചികിത്സാവിവരങ്ങള്, ലാബ് റിസള്ട്ട്, പ്രിസ്ക്രിപ്ഷന് എന്നിവ ലഭ്യമാവുന്നതാണ്. സംശയങ്ങള്ക്ക് ദിശ 104, 1056, 0471 2552056, 2551056 എന്നീ നമ്പരുകളില് വിളിക്കാവുന്നതാണ്.
Read More : വധശ്രമക്കേസ് ഒതുക്കാൻ പ്രതിയുടെ ബന്ധുക്കളിൽ നിന്ന് കൈക്കൂലി, വിവരം നാട്ടിൽ പരന്നു; എസ്ഐയ്ക്ക് 'പണി കിട്ടി'
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam