ഹോട്ടലുകളിൽ പൊറോട്ടക്കൊപ്പം ഗ്രേവി സൗജന്യമായി നൽകണോ? നിയമപോരാട്ടത്തിന്റെ പുതുവഴിയിൽ അഭിഭാഷകൻ, ഒടുവിൽ ഉപഭോക്തൃ കമ്മീഷൻ നിർദേശം
Synopsis
ഗ്രേവി സൗജന്യമായി നല്കേണ്ടതില്ലെന്ന ജില്ലാ ഉപഭോക്തൃ കമ്മീഷന് ഉത്തരവിനെതിരെ അഡ്വ. ഷിബു വയലകത്ത് സംസ്ഥാന ഉപഭോക്തൃ കമ്മീഷന് നല്കിയ അപ്പീലിലാണ് വിശദമായ തെളിവെടുപ്പിന് കമ്മീഷന് നിര്ദേശം നല്കിയിരിക്കുന്നത്.
കൊച്ചി: ഹോട്ടലുകളില് പൊറോട്ടയ്ക്കൊപ്പം ഗ്രേവി സൗജന്യമായി നല്കണോ എന്ന കാര്യത്തില് നിയമപോരാട്ടത്തിന്റെ പുതിയ വഴി തുറന്നിരിക്കുകയാണ് കൊച്ചി സ്വദേശിയായ അഭിഭാഷകന് സംസ്ഥാന ഉപഭോക്തൃ കമ്മീഷന് നല്കിയ പരാതി. ഗ്രേവി സൗജന്യമായി നല്കേണ്ടതില്ലെന്ന ജില്ലാ ഉപഭോക്തൃ കമ്മീഷന് ഉത്തരവിനെതിരെ അഡ്വ. ഷിബു വയലകത്ത് സംസ്ഥാന ഉപഭോക്തൃ കമ്മീഷന് നല്കിയ അപ്പീലിലാണ് വിശദമായ തെളിവെടുപ്പിന് കമ്മീഷന് നിര്ദേശം നല്കിയിരിക്കുന്നത്. ഹോട്ടലുകളെ ആശ്രയിക്കുന്ന താഴ്ന്ന വരുമാനക്കാര്ക്കു വേണ്ടിയാണ് തന്റെ പോരാട്ടമെന്ന് ഷിബു പറയുന്നു.
രണ്ടു കൊല്ലം മുമ്പ് വടയമ്പാടിയിലെ പേര്ഷ്യന് ടേബിള് റസ്റ്ററന്റില് നിന്ന് പൊറോട്ടയ്ക്കും ബീഫ് ഫ്രൈയ്ക്കുമൊപ്പം ഇത്തിരി ചാറു കൂടി ചോദിച്ചിടത്തു നിന്നായിരുന്നു ഷിബുവിന്റെ പോരാട്ടം തുടങ്ങിയത്. സൗജന്യമായി ചാറു നല്കാനാവില്ലെന്ന ഹോട്ടല് മാനേജ്മെന്റിന്റെ നിലപാടിനെതിരെ എറണാകുളം ജില്ലാ ഉപഭോക്തൃ തര്ക്ക പരിഹാര കമ്മീഷനെ 2024 ല് ഷിബു സമീപിച്ചു. എന്നാല് ഉപഭോക്തൃ നിയമത്തിന്റെ പരിധിയില് വരുന്ന കാര്യമല്ലെന്ന് ചൂണ്ടിക്കാട്ടി കമ്മീഷന് പരാതി തളളി. ഇതോടെ പൊറോട്ടയ്ക്കൊപ്പം സൗജന്യമായി ചാറു നല്കേണ്ടതില്ലെന്ന തീരുമാനത്തിലേക്ക് സംസ്ഥാനത്തെ ഒട്ടേറെ ഹോട്ടലുടമകള് എത്തി. ഈ പശ്ചാത്തലത്തിലാണ് ഷിബു സംസ്ഥാന ഉപഭോക്തൃ തര്ക്ക പരിഹാര കമ്മീഷനില് അപ്പീല് നല്കിയതും കമ്മീഷന് ഇത് അംഗീകരിച്ചതും.
വിശദമായ തെളിവെടുപ്പ് നടത്തി ഷിബുവിന്റെ പരാതിയില് തീരുമാനമെടുക്കണമെന്നാണ് സംസ്ഥാന ഉപഭോക്തൃ കമ്മീഷന് എറണാകുളം ജില്ലാ ഉപഭോക്തൃ കമ്മീഷന് നല്കിയിരിക്കുന്ന നിര്ദേശം. ജൂലൈ എട്ടിന് എറണാകുളം ജില്ലാ ഉപഭോക്തൃ കമ്മീഷന് വീണ്ടും ചാറ് കേസ് പരിഗണിക്കും. കേസില് കമ്മീഷന് എടുക്കുന്ന തീരുമാനം 2 പൊറോട്ടയും ഇച്ചിരി ചാറും കൂടി ഫുഡടിക്കുന്നവരെയെല്ലാം സംബന്ധിച്ച് നിര്ണായകമാവുകയും ചെയ്യും.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam