ഇന്ന് കൊട്ടിക്കലാശം, വരുന്നു നിശബ്ദ പ്രചാരണം; ഇവ ലംഘിച്ചാല് കര്ശന നടപടി, തടവുശിക്ഷ വരെ ലഭിക്കും
Synopsis
പരസ്യപ്രചാരണം ഏപ്രിൽ 24 വൈകിട്ട് 6 ന് അവസാനിക്കും, മാതൃകാപെരുമാറ്റച്ചട്ടം എല്ലാവരും കര്ശനമായി പാലിക്കണമെന്ന് മുഖ്യതെരഞ്ഞെടുപ്പ് ഓഫീസര്
തിരുവനന്തപുരം: ലോക്സഭ തെരഞ്ഞെടുപ്പ് 2024ന്റെ പരസ്യ പ്രചാരണം കേരളത്തില് ഇന്ന് അവസാനിക്കുകയാണ്. കലാശക്കൊട്ടില് മൂന്ന് മുന്നണികളും ആവേശത്തിന്റെ കൊടുമുടിയിലെത്തും എന്നുറപ്പ്. എന്നാല് തെരഞ്ഞെടുപ്പ് ആവേശം മുറുകുന്ന അവസാന 48 മണിക്കൂറില് എല്ലാവരും മാതൃകാപെരുമാറ്റച്ചട്ടം കര്ശനമായി പാലിക്കണമെന്ന് മുഖ്യതെരഞ്ഞെടുപ്പ് ഓഫീസര് സഞ്ജയ് കൗള് ആവശ്യപ്പെട്ടു.
എന്തൊക്കെ ശ്രദ്ധിക്കണം...
ലോക്സഭ തെരഞ്ഞെടുപ്പിനുള്ള പരസ്യപ്രചാരണത്തിന്റെ സമയപരിധി ഏപ്രില് 24 വൈകിട്ട് ആറിന് അവസാനിക്കും. നിശ്ശബ്ദ പ്രചാരണം മാത്രം അനുവദനീയമായ അവസാന 48 മണിക്കൂറില് നിയമവിരുദ്ധമായി ആളുകള് കൂട്ടം ചേരുകയോ പൊതുയോഗങ്ങള് സംഘടിപ്പിക്കുകയോ ചെയ്താല് ക്രിമിനല് പ്രൊസീജ്യര് കോഡ് ചട്ടം 144 പ്രകാരം നടപടി സ്വീകരിക്കും. ഉച്ചഭാഷിണികള് ഉപയോഗിക്കാനോ ജാഥകളും പ്രകടനങ്ങളും സംഘടിപ്പിക്കാനോ പാടില്ല. തെരഞ്ഞെടുപ്പ് ഫലത്തെ സ്വാധീനിക്കാനിടയുള്ള ഒരു തരത്തിലുള്ള പ്രദര്ശനവും (സിനിമ, ടെലിവിഷന് പരിപാടികള്, പരസ്യങ്ങള്, സംഗീത പരിപാടികള്, നാടകങ്ങള്, മറ്റ് സമാന പ്രദര്ശനങ്ങള്, ഒപ്പീനിയന് പോള്, പോള് സര്വേ, എക്സിറ്റ് പോള് മുതലായവ) അനുവദിക്കില്ല. ചട്ടലംഘിക്കുന്നവര്ക്ക് തടവോ പിഴയോ രണ്ടും കൂടിയോ ശിക്ഷ ലഭിക്കും. ആദ്യഘട്ട വോട്ടെടുപ്പ് തുടങ്ങിയ സമയം മുതല് അവസാനഘട്ട വോട്ടെടുപ്പ് പൂര്ത്തിയായി അരമണിക്കൂര് കഴിയും വരെയാണ് എക്സിറ്റ് പോളുകള്ക്ക് നിരോധനമുള്ളത്.
Read more: പ്രത്യേക ക്യൂവും വീടുപോലെ സൗകര്യങ്ങളും; പോളിംഗ് ബൂത്തില് വോട്ടര്മാര് കഷ്ടപ്പെടേണ്ടിവരില്ല
നിയമവിരുദ്ധ പ്രവര്ത്തനങ്ങള് തടയുന്നതിനുള്ള പൊലീസിന്റെയും എന്ഫോഴ്സ്മെന്റ് ഏജന്സികളുടെയും കര്ശന പരിശോധ തുടരും. വോട്ടര്മാരെ സ്വാധീനിക്കുന്നതിന് നിയമവിരുദ്ധമായ പണം കൈമാറ്റം, സൗജന്യങ്ങളും സമ്മാനങ്ങളും നല്കല്, മദ്യവിതരണം എന്നിവ ചെയ്യുന്നതായി കണ്ടെത്തിയാല് കര്ശന നടപടിയെടുക്കും. ജനപ്രാതിനിധ്യ നിയമത്തിലെ ചട്ടം 135 സി പ്രകാരം വോട്ടെടുപ്പ് പൂര്ത്തിയാകുന്നത് വരെയുള്ള 48 മണിക്കൂര് ഡ്രൈ ഡേ പ്രഖ്യാപിച്ചിട്ടുണ്ട്. മദ്യവിതരണത്തിനും വില്പനക്കും നിരോധനം ഏര്പ്പെടുത്തിയിട്ടുണ്ട്. മണ്ഡലത്തിന് അകത്തേക്കും പുറത്തേക്കുമുള്ള യാത്രകള് പൊലീസിന്റെയും സുരക്ഷാവിഭാഗങ്ങളുടെയും കര്ശന നിരീക്ഷണത്തിലായിരിക്കും. എല്ലാതരം വാഹനങ്ങളും പരിശോധിക്കപ്പെടും.
സഹകരം ആവശ്യപ്പെട്ട് മുഖ്യ തെരഞ്ഞെടുപ്പ് ഓഫീസര്
മണ്ഡലത്തിന് പുറത്ത് നിന്നുള്ള പാര്ട്ടി പ്രവര്ത്തകരെ മണ്ഡലത്തില് തുടരാന് അനുവദിക്കില്ല. ലൈസന്സ് ഉള്ള ആയുധങ്ങള് പ്രദര്ശിപ്പിക്കുന്നതിനും കൊണ്ടുനടക്കുന്നതിനുള്ള നിരോധനം തിരഞ്ഞെടുപ്പ് ഫലം പ്രഖ്യപിക്കുന്നത് വരെ തുടരും. സംസ്ഥാനത്തെ 20 ലോക്സഭാ മണ്ഡലങ്ങളിലേക്കുള്ള വോട്ടെടുപ്പ് ഏപ്രില് 26 രാവിലെ 7 മുതല് വൈകിട്ട് 6 വരെ നടക്കും. ജൂണ് നാലിനാണ് വോട്ടെണ്ണല്. സ്വതന്ത്രവും സുതാര്യവും നീതിപൂര്വകവുമായ തെരഞ്ഞെടുപ്പ് ഉറപ്പാക്കാന് എല്ലാവരും സഹകരിക്കണമെന്നും എല്ലാ വോട്ടര്മാരും സമ്മതിദാന അവകാശം വിനിയോഗിക്കണെന്നും മുഖ്യതെരഞ്ഞെടുപ്പ് ഓഫീസര് അഭ്യര്ത്ഥിച്ചു.
Read more: കേരളത്തില് എന്തുകൊണ്ട് മൂന്ന് മുന്നണികളും ന്യൂനപക്ഷങ്ങള്ക്ക് പിന്നാലെ; ഇതാ ആ കണക്ക്
ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam