'ഏത് സമരവും ഖദർ ഉടയാതെ വേണമെന്ന പിടിവാശി കളയണം': കേന്ദ്ര സംസ്ഥാന നേതൃത്വങ്ങളെ വിമർശിച്ച് കൊല്ലം ഡിസിസി

ഒരേ പദവിയിൽ പത്ത് വർഷം പൂർത്തിയാക്കിയവർ തൽസ്ഥാനത്ത് നിന്ന് മാറി പുതിയ ആളുകൾക്ക് അവസരം നൽകണമെന്നും  കൊല്ലം ഡിസിസിയുടെ ജില്ലാ നേതൃക്യാംപിൽ അവതരിപ്പിച്ച സംഘടനാ പ്രമേയം

കൊല്ലം: കേന്ദ്ര സംസ്ഥാന നേത്യത്വങ്ങളെ വിമർശിച്ച് കൊല്ലം ഡിസിസിയുടെ ജില്ലാ നേതൃക്യാംപിൽ രാഷ്ട്രീയ പ്രമേയം. ഏതു സമരവും ഖദർ ഉടയാതെയാകണം എന്ന പിടിവാശി നേതാക്കൾ ഉപേക്ഷിക്കണമെന്നും ഡിസിസി വൈസ് പ്രസിഡന്‍റ് ചിറ്റുമൂല നാസർ അവതരിപ്പിച്ച പ്രമേയം ആവശ്യപ്പെട്ടു. നിരാശയുടെ സമയമല്ലിതെന്നും പ്രത്യയശാസ്ത്രപരമായി കൂട്ടാവുന്നവരെ  ഒപ്പം നിർത്തി രാഹുൽ ഗാന്ധിയുടെ നേതൃത്വത്തിൽ പാർട്ടി മുന്നേറണമെന്നും പ്രമേയത്തിൽ ആവശ്യപ്പെട്ടു. 

കോൺഗ്രസ് നേതാക്കൾക്കെതിരെ കേട്ടാൽ അറയ്ക്കുന്ന ഭാഷയിൽ ആക്ഷേപം ചൊരിഞ്ഞ ബ്രാഞ്ച് മുതൽ സംസ്ഥാന സെക്രട്ടേറിയറ്റ് തലം വരെയുള്ളവർക്കെതിരെ സംസാരിക്കുന്ന തെളിവുകളുകളടക്കമുള്ള ആരോപണം വന്നു. ഇക്കാര്യത്തിലെ  പ്രതികരണം സദാചാര ബോധത്താൽ പരിമിതപ്പെടുത്തേണ്ടിയിരുന്നോയെന്നും പ്രമേയം ചോദിക്കുന്നു. 

ഒരേ പദവിയിൽ പത്ത് വർഷം പൂർത്തിയാക്കിയവർ തൽസ്ഥാനത്ത് നിന്ന് മാറി പുതിയ ആളുകൾക്ക് അവസരം നൽകണമെന്നും  കൊല്ലം ഡിസിസിയുടെ ജില്ലാ നേതൃക്യാംപിൽ അവതരിപ്പിച്ച സംഘടനാ പ്രമേയം  ആവശ്യപ്പെടുന്നു.