കുത്തിവയ്പ്പിലെ പിഴവെന്ന പരാതി; ജീവനക്കാരെ സംരക്ഷിച്ച് കൊല്ലം ഡിഎംഒയുടെ റിപ്പോർട്ട്, പരാതിയുമായി കുടുംബം

കുട്ടിയുടെ അമ്മയുടെ മൊഴി പോലും രേഖപ്പെടുത്താതെ മെഡിക്കൽ ഓഫീസർ റിപ്പോർട്ട് നൽകിയതിനെതിരെ കുടുംബം രംഗത്തെത്തി

കൊല്ലം : കൊല്ലം വട്ടവിള പ്രാഥമികാരോഗ്യ കേന്ദ്രത്തിൽ കുത്തിവെയ്പ്പ് എടുത്ത പത്ത് വയസ്സുകാരിക്ക് ശസ്ത്രക്രിയ വേണ്ടിവന്ന സംഭവത്തിൽ ആശുപത്രി ജീവനക്കാരെ സംരക്ഷിച്ച് ഡി എം ഒ റിപ്പോർട്ട് നൽകിയെന്ന് പരാതി. ജീവനക്കാർക്ക് വീഴ്ച ഉണ്ടായിട്ടില്ലെന്നാണ് ജില്ലാ മെഡിക്കൽ ഓഫിസറുടെ റിപ്പോർട്ടിൽ പറയുന്നത്. കുട്ടിയുടെ അമ്മയുടെ മൊഴി പോലും രേഖപ്പെടുത്താതെ മെഡിക്കൽ ഓഫീസർ റിപ്പോർട്ട് നൽകിയതിനെതിരെ കുടുംബം രംഗത്തെത്തി.

കഴിഞ്ഞ ജൂണിലാണ് പള്ളിമൺ സ്വദേശികളായ സുൽഫത്ത് - അമീർഖാൻ ദന്പതികളുടെ മകളെ പത്താം വയസ്സിലെ കുത്തിവെയ്പ്പ് എടുക്കാനായി നെടുന്പന വട്ടവിള ആരോഗ്യകേന്ദ്രത്തിൽ കൊണ്ടുപോയത്. കുത്തിവെയ്പ്പിന് പിന്നാലെ കുട്ടിയുടെ കൈ നീരുവന്ന് വിയര്‍ത്തു. ആദ്യം ജില്ലാ ആശുപത്രിയിലും പിന്നീട് സ്വകാര്യ ആശുപത്രിയിലും പ്രവേശിപ്പിച്ചു. കുട്ടിയെ ശസ്ത്രക്രിയക്ക് വിധയമാക്കി. 

കയ്യിലെ നീരു വന്ന ഭാഗത്തെ ദശ മുഴുവൻ നീക്കം ചെയ്തു. കുടുംബം കളക്ടർക്ക് നൽകിയ പരാതിയിലാണ് ഇപ്പോൾ ആരോഗ്യ പ്രവർത്തകരെ സംരക്ഷിച്ചുകൊണ്ട് ജില്ലാ മെഡിക്കൽ ഓഫീസർ റിപ്പോർട്ട് നൽകിയിരിക്കുന്നത്. ആശുപത്രി ജീവനക്കാർ വേണ്ട വിധത്തിൽ വിഷയം കൈകാര്യം ചെയ്തതെന്നും മാതാപിതാക്കളുടെ ആവശ്യപ്രകാരമാണ് കുട്ടിയെ സ്വകാര്യ ആശുപത്രിയിലേക്ക് കൊണ്ട് പോയതെന്നുമാണ് റിപ്പോർട്ടിലുള്ളത്.വിഷയത്തിൽ ആരോഗ്യമന്ത്രിയെ സമീപിക്കാൻ ശ്രമിച്ചെങ്കിലും അനുകൂലമായ മറുപടി ഉണ്ടായില്ലെന്നും കുടുംബം പറയുന്നു