എറണാകുളത്ത് എത്തുന്ന യാത്രക്കാർ ഇനി വിയ‍ർക്കേണ്ട; ശീതീകരിച്ച വിശ്രമ കേന്ദ്രമൊരുക്കി കെഎസ്ആർടിസി, ഉദ്ഘാടനം നാളെ

വനിതാ യാത്രക്കാർക്കും കുടുംബമായി എത്തുന്ന യാത്രക്കാർക്കും വിശ്രമിക്കുന്നതിനായാണ് ശീതീകരിച്ച വിശ്രമകേന്ദ്രം ഒരുക്കിയിരിക്കുന്നത്. 

എറണാകുളം: കെഎസ്ആർടിസി എറണാകുളം ബസ് സ്റ്റേഷനിൽ ശീതീകരിച്ച വിശ്രമ കേന്ദ്രം നാളെ ഉദ്ഘാടനം ചെയ്യും. ഉപഭോക്തൃ സൗഹൃദ സേവനങ്ങൾ മെച്ചപ്പെടുത്തുന്നതിന്റെ ഭാഗമായി ശീതീകരിച്ച വിശ്രമ കേന്ദ്രങ്ങൾ കെഎസ്ആർടിസി ബസ് സ്‌റ്റേഷനുകളിൽ സ്ഥാപിച്ചു വരികയാണ്. എറണാകുളം ബസ് സ്റ്റേഷനിൽ കെഎസ്ആർടിസിയുടെയും വണ്ടർലാ പാർക്ക്സ് & റിസോർട്ട് ഗ്രൂപ്പിന്റെയും സംയുക്ത സംരംഭമായി വനിതാ യാത്രക്കാർക്കും കുടുംബമായി എത്തുന്ന യാത്രക്കാർക്കും വിശ്രമിക്കുന്നതിനായുള്ള ശീതീകരിച്ച വിശ്രമകേന്ദ്രം പ്രവർത്തനസജ്ജമാക്കിയിരിക്കുകയാണ്. 

ഈ നവീന പദ്ധതിയുടെ ഔപചാരിക ഉദ്ഘാടനം 01.03.2025 ശനിയാഴ്‌ച വൈകിട്ട്  05.30 ന് കെഎസ്ആർടിസി ചെയർമാൻ & മാനേജിംഗ് ഡയറക്ടർ പ്രമോജ് ശങ്കർ ഐഒഎഫ്എസ് അദ്ധ്യക്ഷത വഹിക്കുന്ന ചടങ്ങിൽ എറണാകുളം എം.എൽ.എ ടി.ജെ വിനോദ് ഉദ്ഘാടനം നിർവഹിക്കും. വണ്ടർലാ പാർക്ക്സ് & റിസോർട്ട് ഗ്രൂപ്പിന്റെ വൈസ് പ്രസിഡൻറ് രവികുമാർ സ്വാഗതം ആശംസിക്കുന്ന ചടങ്ങിൽ എറണാകുളം ജില്ലാ കളക്ടർ എൻ.എസ്.കെ ഉമേഷ് ഐഎഎസ് മുഖ്യ അതിഥിയായി പങ്കെടുക്കും.