'സ്വർണം കട്ടവരാര്...? ഇവിടെ നിന്നാൽ അറിയാം', തലസ്ഥാനത്ത് എൽഡിഎഫ് പരസ്യബോർഡുകൾ ഉപയോഗിച്ച്‌ യുഡിഎഫ് പ്രചാരണം

തലസ്ഥാന നഗരത്തിൽ എൽഡിഎഫ് സ്ഥാപിച്ച പരസ്യബോർഡുകൾ ഉപയോഗിച്ച്‌ യുഡിഎഫ് പ്രചാരണം നടത്തുന്ന ദൃശ്യങ്ങൾ സമൂഹ്യമാധ്യമങ്ങളിൽ വൈറലാകുന്നു

തിരുവനന്തപുരം: തലസ്ഥാന നഗരത്തിൽ എൽഡിഎഫ് സ്ഥാപിച്ച പരസ്യബോർഡുകൾ ഉപയോഗിച്ച്‌ യുഡിഎഫ് പ്രചാരണം നടത്തുന്ന ദൃശ്യങ്ങൾ സമൂഹ്യമാധ്യമങ്ങളിൽ വൈറലാകുന്നു. തെരഞ്ഞെടുപ്പ് പ്രചാരണത്തിന്‍റെ ഭാഗമായി നഗരത്തിലുടനീളം മുഖ്യമന്ത്രി പിണറായി വിജയന്‍റെ ചിത്രം സഹിതം വലിയ കട്ടൗട്ടുകളും ഫ്ലക്സ് ബോർഡുകളും സ്ഥാപിച്ച് "എൽഡിഎഫ് അല്ലാതെ മറ്റാര് " എന്ന വാചകം ഉപയോഗിച്ചാണ് പ്രചാരണം കൊഴുക്കുന്നത്. ഇതിനിടയിലാണ് ഇതേ ഫ്ലക്സ് ബോർഡുകൾ തന്നെ യുഡിഎഫ് പ്രവർത്തകരും പ്രചാരണത്തിന് തെരഞ്ഞെടുത്തിരിക്കുന്നത്‌. 

എൽഡിഎഫ് ബോർഡുകൾക്ക് താഴെ നടപ്പാതയിൽ "സ്വർണം കട്ടത് ആരപ്പാ ? ഉത്തരം അറിയാൻ മുകളിലേക്ക് നോക്കൂ " എന്ന് രേഖപ്പെടുത്തിയ പോസ്റ്റർ പതിപ്പിച്ചാണ് പുതിയ പ്രചാരണം. ഈ പോസ്റ്ററിൽ ചവിട്ടി നിന്ന് നോക്കിയാൽ എൽഡിഎഫിന്‍റെ പ്രചാരണ ബോർഡിൽ "എൽ ഡി എഫ് അല്ലാതെ മറ്റാര് " എന്ന് എഴുതിയത് കാണാം എന്നതാണ് പ്രത്യേകത. സ്റ്റാച്ച്യുവിലടക്കം നഗരത്തിൽ പലേടത്തും ഇത്തരം പോസ്റ്ററുകൾ പതിപ്പിച്ച് ഇതിന്‍റെ ദൃശ്യങ്ങൾ യുഡിഎഫ് അനുകൂല പ്രൊഫൈലുകളിലൂടെ പ്രചരിപ്പിച്ചു കൂടുതൽ പേരെ ആകർഷിക്കാനുള്ള ശ്രമവും നടത്തുന്നുണ്ട്.