"ഒരിക്കലും ഉണരാതിരിക്കുന്നതിനേക്കാൾ ഒടുവിൽ ഉണരുന്നത് നല്ലത് " കോൺഗ്രസിനെ പരിഹസിച്ച് എം. സ്വരാജ് , പ്രാധാൻ്റെ രാജി സമരവിജയത്തിന്റെ തെളിവ്

സമരത്തോട് അറച്ചുനിന്നവർക്കും ഒടുവിൽ പിന്തുണയ്ക്കേണ്ടി വന്നുവെന്ന് കോൺഗ്രസിനെ പരോക്ഷമായി വിമർശിച്ച സ്വരാജ്, ഒരിക്കലും ഉണരാതെയിരിക്കുന്നതിനേക്കാൾ നല്ലത് ഒടുവിൽ ഉണരുന്നതാണെന്നും അത് അവർക്കൊരു പാഠമാകട്ടെയെന്നും പറഞ്ഞു.

പാലക്കാട്: കേന്ദ്രമന്ത്രി ധർമേന്ദ്ര പ്രധാൻ രാജിവെച്ച സംഭവം മഹത്തായ സമരത്തിന്റെ വിജയമാണെന്ന് സിപിഎം സംസ്ഥാന സെക്രട്ടേറിയറ്റ് അംഗം എം. സ്വരാജ് പ്രതികരിച്ചു. സർക്കാരിന്റെ ജനവിരുദ്ധ മനോഭാവത്തിനെതിരായ ജനവികാരമാണ് ഈ രാജിയിലൂടെ പ്രകടമായിരിക്കുന്നതെന്നും, കർഷക സമര വിജയത്തിന്റെ ഓർമ്മപ്പെടുത്തലാണ് ഇതെന്നും അദ്ദേഹം വ്യക്തമാക്കി.

തുടക്കത്തിൽ സമരത്തോട് അറച്ചുനിന്നവർക്കും ഒടുവിൽ പിന്തുണയ്ക്കേണ്ടി വന്നുവെന്ന് കോൺഗ്രസിനെ പരോക്ഷമായി വിമർശിച്ച സ്വരാജ്, ഒരിക്കലും ഉണരാതെയിരിക്കുന്നതിനേക്കാൾ നല്ലത് ഒടുവിൽ ഉണരുന്നതാണെന്നും അത് അവർക്കൊരു പാഠമാകട്ടെയെന്നും പറഞ്ഞു. ഈ വിഷയത്തിൽ യാതൊരുവിധ അവകാശവാദങ്ങൾക്കും ഇല്ലെങ്കിലും, തുടക്കം മുതൽ അടിയുറച്ചുനിന്ന് മർദ്ദനം ഏറ്റുവാങ്ങിയത് ഇടതുപക്ഷ വിദ്യാർത്ഥി സംഘടനകളാണെന്നത് ജനങ്ങൾക്ക് പകൽ പോലെ വ്യക്തമാണെന്നും, ഇക്കാര്യത്തിൽ തുടക്കം മുതൽ തങ്ങൾക്ക് യാതൊരുവിധ സംശയങ്ങളും ഉണ്ടായിരുന്നില്ലെന്നും അദ്ദേഹം കൂട്ടിച്ചേർത്തു.

ഈ സമരം എല്ലാവർക്കും ഒത്തൊരുമയുടെ വലിയ പാഠമാണ് നൽകുന്നതെന്നും എം. സ്വരാജ് വ്യക്തമാക്കി. ജനങ്ങളുടെ അവകാശങ്ങൾക്കായുള്ള പോരാട്ടത്തിൽ എല്ലാവരും ഒറ്റക്കെട്ടായി നിൽക്കേണ്ടതിന്റെ ആവശ്യകതയാണ് ഈ വിജയം ഓർമ്മിപ്പിക്കുന്നത്. ഒടുവിൽ എല്ലാവർക്കും സമരത്തെ പിന്തുണയ്‌ക്കേണ്ടി വന്ന സാഹചര്യം ജനകീയ മുന്നേറ്റങ്ങളുടെ കരുത്താണ് വ്യക്തമാക്കുന്നതെന്നും അദ്ദേഹം ചൂണ്ടിക്കാണിച്ചു.