'അഞ്ജുവിന്റെ മൃതദേഹം നാട്ടിലെത്തിക്കാൻ വേണ്ടത് 30 ലക്ഷം രൂപ'; സഹായം അഭ്യർത്ഥിച്ച് കുടുംബം
Synopsis
വൈക്കം മറവന്തുരുത്തിനടുത്ത് കുലശേഖരമംഗലം സ്വദേശിനിയായ നഴ്സ് അഞ്ജു, ആറു വയസുകാരന് മകന് ജീവ, നാല് വയസുകാരിയായ മകള് ജാന്വി എന്നിവരാണ് മരിച്ചത്.
കൊച്ചി: ബ്രിട്ടനിൽ കൊല്ലപ്പെട്ട മലയാളി നഴ്സ് അഞ്ചുവിന്റെയും രണ്ട് മക്കളുടെയും മൃതദേഹം നാട്ടിലെത്തിക്കാൻ സാമ്പത്തിക സഹായം അഭ്യർത്ഥിച്ച് കുടുംബം. മൃതദേഹം നാട്ടില് എത്തിക്കാൻ വേണ്ടത് മുപ്പത് ലക്ഷം രൂപവെമെന്ന് അഞ്ജുവിന്റെ അച്ഛൻ അശോകന് പറയുന്നു.
വൈക്കം മറവന്തുരുത്തിനടുത്ത് കുലശേഖരമംഗലം സ്വദേശിനിയായ നഴ്സ് അഞ്ജു, ആറു വയസുകാരന് മകന് ജീവ, നാല് വയസുകാരിയായ മകള് ജാന്വി എന്നിവരാണ് മരിച്ചത്. ബ്രിട്ടനിലെ കെറ്ററിംഗിലെ ആശുപത്രിയില് നഴ്സായി ജോലി ചെയ്യുകയായിരുന്നു അഞ്ജു. ജോലിക്ക് എത്താഞ്ഞതിനെ തുടര്ന്ന് സഹപ്രവര്ത്തകര് താമസ സ്ഥലത്ത് അന്വേഷിച്ചപ്പോള് വീട് അടഞ്ഞുകിടക്കുകയായിരുന്നു. തുടര്ന്ന് പൊലീസെത്തി വാതില് പൊളിച്ച് അകത്തു കയറിയപ്പോള് രക്തം വാര്ന്ന് മരിച്ചു കിടക്കുകയായിരുന്നു അഞ്ജു. കുഞ്ഞുങ്ങള്ക്ക് ജീവനുണ്ടായിരുന്നെങ്കിലും ആശുപത്രിയില് എത്തിച്ചപ്പോഴേക്കും മരിച്ചു. പിന്നാലെ അഞ്ജുവിന്റെ ഭര്ത്താവായ കണ്ണൂര് സ്വദേശി സാജുവിനെ പൊലീസ് കസ്റ്റഡിയിലെടുത്തു.
Also Read: അഞ്ജുവിനെ സാജു ക്രൂരമായി മർദ്ദിച്ചിരുന്നെന്ന് അമ്മ കൃഷ്ണമ്മ; പലതും മകൾ പറഞ്ഞില്ലെന്ന് അച്ഛൻ അശോകൻ
അഞ്ജുവിനെ ഭർത്താവ് സാജു ശ്വാസം മുട്ടിച്ച് കൊല്ലുകയായിരുന്നെന്നാണ് പൊലീസ് പറയുന്നത്. ഇക്കാര്യം വൈക്കത്തുള്ള അഞ്ജുവിന്റെ ബന്ധുക്കളെ പൊലീസ് അറിയിച്ചു. സാജുവിനെ 72 മണിക്കൂർ കൂടി പൊലീസ് കസ്റ്റഡിയിൽ സൂക്ഷിക്കും. കുട്ടികളുടെ മൃതദേഹം ഇന്ന് പോസ്റ്റ്മോർട്ടം ചെയ്യും. സാജുവിനെതിരെ കൊലക്കുറ്റം ചുമത്തുമെന്നും നിയമനടപടികൾ സ്വീകരിക്കുമെന്നും പൊലീസ് അഞ്ജുവിന്റെ കോട്ടയത്തുള്ള കുടുംബത്തെ അറിയിച്ചു. ഫോണില് വിളിച്ച് സംസാരിക്കുമ്പോഴെല്ലാം മകള് ദുഖിതയായിരുന്നെന്ന് അഞ്ജുവിന്റെ പിതാവ് പറഞ്ഞു. ജോലി ലഭിക്കുമെന്ന് പ്രതീക്ഷിച്ച് ബ്രിട്ടനില് പോയ സാജുവിന് ജോലി കിട്ടാത്തതിന്റെ നിരാശയുണ്ടായിരുന്നു. നാട്ടിലേക്ക് പണം അയക്കാന് കഴിയാത്തതില് അഞ്ജുവും സാജുവും ദുഖിതരായിരുന്നെന്നും അശോകന് പറഞ്ഞു.