ചെണ്ടമേളവും കൊട്ടുപാട്ടും; കോന്നി മെഡിക്കൽ കോളേജിൽ അത്യാഹിത വിഭാഗത്തിന് സമീപം എംബിബിഎസ് വിദ്യാർഥികളുടെ വൻ ഓണാഘോഷം, വിവാദം

പത്തനംതിട്ടയിൽ രോ​ഗികളെ ബുദ്ധിമുട്ടിലാക്കി കോന്നി മെഡിക്കൽ കോളേജിൽ അത്യാഹിത വിഭാഗത്തിന് സമീപമുണ്ടായ ഓണാഘോഷം. എംബിബിഎസ് വിദ്യാർത്ഥികൾ നടത്തിയ ഓണാഘോഷത്തിൽ ചെണ്ടമേളവും ഉൾപ്പെടുത്തിയിരുന്നു 

പത്തനംതിട്ട: പത്തനംതിട്ടയിൽ രോ​ഗികളെ ബുദ്ധിമുട്ടിലാക്കി കോന്നി മെഡിക്കൽ കോളേജിൽ അത്യാഹിത വിഭാഗത്തിന് സമീപമുണ്ടായ ഓണാഘോഷം. എംബിബിഎസ് വിദ്യാർത്ഥികളാണ് ചെണ്ടമേളം അടക്കം ഉൾപ്പെടുത്തി ഓണാഘോഷം സംഘടിപ്പിച്ചത്. വലിയ ആഘോഷമാണ് ന‌ടത്തിയതെന്നും ഇത് രോ​ഗികൾക്കും കൂ‌ട്ടിരിപ്പുകാർക്കും ബുദ്ധിമുട്ട് ഉണ്ടാക്കിയെന്നുമാണ് ഉയരുന്ന ആരോപണം. ചികിത്സയിൽ കഴിയുന്നവർ ബുദ്ധിമുട്ട് നേരിട്ടെന്ന് കൂട്ടിരിപ്പുകാരും പറഞ്ഞു. ആശുപത്രിക്ക് മുന്നിൽ ഓണാഘോഷം നടത്തുന്ന ദൃശ്യങ്ങൾ പുറത്തുവന്നിട്ടുണ്ട്. നേരത്തെ, വയനാട്ടിൽ ആരോ​ഗ്യമന്ത്രിയുൾപ്പെടെ പങ്കെടുത്ത പരിപാടിയിലെ ആഘോഷം വിവാ​ദമായിരുന്നു. ഇതിന് ശേഷം ആശുപത്രികളിൽ ഇത്തരത്തിലുള്ള ആഘോഷങ്ങൾ ന‌ടത്തരുത് മുന്നറിയിപ്പ് നൽകിയിരുന്നു.

വിവാദമായി എംബിബിഎസ് വിദ്യാർത്ഥികളുടെ ഓണാഘോഷം

ഇന്ന് രാവിലെ പത്തരയ്ക്ക് ശേഷമാണ് ഓണാഘോഷം സംഘടിപ്പിച്ചത്. അത്യാഹിത വിഭാ​ഗത്തിൻ്റെ മുന്നിൽ നിന്ന് ചെണ്ടമേളത്തോടുകൂടി ഓപ്പൺ ജീപ്പിൽ മാവേലിയുമുൾപ്പെ‌ടെ ആയിരുന്നു ഘോഷയാത്ര. കാഷ്വാലിറ്റിയുടെ മുന്നിൽ ഏറെ നേരം നീണ്ടുനിന്നതായിരുന്നു ആഘോഷം. ഇവിടെ നിന്ന് പിന്നീട് ക്യാംപസിലേക്ക് പോവുകയായിരുന്നു. ഓണാഘോഷത്തിനെതിരെ സെക്യൂരിറ്റി ജീവനക്കാർ ഉൾപ്പെടെ മുന്നറിയിപ്പ് നൽകിയിട്ടും അനുസരിച്ചില്ലെന്നാണ് വിവരം. ഓണാഘോഷം രോ​ഗികൾക്കും കൂട്ടിരിപ്പുകാർക്കും ബുദ്ധിമുട്ടുണ്ടാക്കിയെന്നാണ് ഉയർന്നുവരുന്ന ആക്ഷേപം. 

പരാതി നിഷേധിച്ച് വിദ്യാർത്ഥികൾ

അതേസമയം, കോളേജ് യൂണിയനും വിദ്യാർത്ഥികളും പരാതി തള്ളി. ആർക്കും ബുദ്ധിമുട്ടുണ്ടാക്കിയില്ലെന്നാണ് വിദ്യാർത്ഥികളുടെ വിശദീകരണം. ഓണാഘോഷം പെട്ടെന്ന് അവസാനിപ്പിച്ചെന്നാണ് കോളേജ് യൂണിയൻറെ പ്രതികരണം.