കൊച്ചിയിൽ ഓഗസ്റ്റിൽ മെഗാ തൊഴിൽമേള വരുന്നു; സ്കൈ പദ്ധതിയുടെ ഭാഗമായി ആയിരത്തോളം തൊഴിലവസരങ്ങളെന്ന് മന്ത്രി

സ്കൈ പദ്ധതിയുടെ ഭാഗമായി ആഗസ്റ്റിൽ കൊച്ചിയിൽ മെഗാ തൊഴിൽമേള സംഘടിപ്പിക്കുമെന്ന് മന്ത്രി പി. രാജീവ്. 

കൊച്ചി: 'സ്കൈ' പദ്ധതിയുടെ ഭാഗമായി എല്ലാവർക്കും തൊഴിലുറപ്പാക്കുക എന്ന ലക്ഷ്യത്തോടെ ആഗസ്റ്റ് മാസത്തിൽ കൊച്ചിയിൽ മെഗാ തൊഴിൽമേള സംഘടിപ്പിക്കുമെന്ന് വ്യവസായ വകുപ്പ് മന്ത്രി പി. രാജീവ് അറിയിച്ചു. പബ്ലിക് സ്ക്വയർ മുഖാമുഖം പരിപാടിയുടെ ഭാഗമായി കരുമാല്ലൂർ, കുന്നുകര, ആലങ്ങാട് പഞ്ചായത്തുകളിലെ വിവിധ മേഖലകളിലുള്ള വ്യക്തികളുമായി സംവദിക്കുകയായിരുന്നു മന്ത്രി. ഈ തൊഴിൽമേള വഴി ആയിരത്തോളം തൊഴിലവസരങ്ങൾ സൃഷ്ടിക്കാൻ സാധിക്കുമെന്നും അദ്ദേഹം പറഞ്ഞു.അതേസമയം, മുഖാമുഖത്തിൽ കളമശ്ശേരി മണ്ഡലത്തിലെ വിവിധ പ്രശ്നങ്ങളും നിർദേശങ്ങളും ചർച്ചയായി. വിവിധ വ്യക്തികൾ ഉന്നയിച്ച ആവശ്യങ്ങൾക്കും നിർദേശങ്ങൾക്കും മന്ത്രി മറുപടി നൽകി.

ജലവിതരണം: വിവിധ സ്ഥലങ്ങളിൽ പൊട്ടിക്കിടക്കുന്ന പൈപ്പുകൾ എത്രയും വേഗം ശരിയാക്കാനുള്ള നടപടികൾ പൂർത്തീകരിക്കും.

കൃഷി: 'കൃഷിക്കൊപ്പം കളമശ്ശേരി' പദ്ധതിയുടെ ഭാഗമായി ഫാമിൽ നിന്ന് നേരിട്ട് വീടുകളിലേക്ക് പച്ചക്കറി എത്തിക്കുന്നതിന് എ.സി. വാഹനം ലഭ്യമാക്കാൻ അനുമതിയായി. ഇടപ്പള്ളി സഹകരണ ബാങ്ക് ഈ പദ്ധതി ഏകോപിപ്പിക്കും. കർഷകരുടെ ഉത്പന്നങ്ങൾ സംഭരിക്കുന്നതിനായി ശീതീകരണ സംവിധാനം നടപ്പാക്കുന്നതിന് ഷിപ് യാർഡിൽ നിന്ന് 2 കോടി രൂപയുടെ അനുമതി ലഭിച്ചു.

വ്യവസായം: കുന്നുകരയിൽ 30 ഏക്കറിൽ കിൻഫ്ര ഫുഡ് പ്രോസസ്സിംഗ് പാർക്ക് നിർമിക്കുന്നതിന് ഭരണാനുമതി ലഭിച്ചു. ഇത് കർഷകരുടെ ഉത്പന്നങ്ങൾക്ക് മികച്ച വില ഉറപ്പാക്കും. കളമശ്ശേരി എച്ച്.എം.ടി.യിൽ ലുലു ഗ്രൂപ്പിന്റെ 500 കോടി രൂപ മുതൽമുടക്കിലുള്ള ഫുഡ് പ്രോസസ്സിംഗ് പാർക്കിൻ്റെ നിർമ്മാണവും ഉടൻ ആരംഭിക്കും.

ഗതാഗതം: ആലുവ-വെളിയത്ത്നാട് റൂട്ടിൽ ബസ് സർവീസുകൾ വർദ്ധിപ്പിക്കും.

ലഹരിവിരുദ്ധ പ്രവർത്തനങ്ങൾ: പുതുതലമുറയിലെ ലഹരി ഉപയോഗം തടയാൻ സംസ്ഥാനത്ത് ആദ്യമായി മാരത്തോൺ സംഘടിപ്പിച്ചത് കളമശ്ശേരി മണ്ഡലത്തിലാണ്. ലഹരിക്കെതിരെയുള്ള പ്രവർത്തനങ്ങൾ കൂടുതൽ ശക്തിപ്പെടുത്താൻ 165-ൽ പരം ക്ലബുകളെ ഏകോപിപ്പിച്ച് യോഗം വിളിച്ചിരുന്നു.

ജലസംരക്ഷണം: ജലാശയങ്ങളിലെ എക്കൽ നീക്കം ചെയ്യുന്നതിനുള്ള പ്രവർത്തനങ്ങളും നടപ്പിലാക്കി വരികയാണെന്ന് മന്ത്രി കൂട്ടിച്ചേർത്തു.

കരുമാല്ലൂർ എൻ.എസ്.എസ്. കരയോഗ ഓഡിറ്റോറിയത്തിൽ നടന്ന ചടങ്ങിൽ കരുമാല്ലൂർ ബ്ലോക്ക് പഞ്ചായത്ത് പ്രസിഡന്റ് സബിത നാസർ അധ്യക്ഷത വഹിച്ചു. ആലങ്ങാട് ബ്ലോക്ക് പഞ്ചായത്ത് പ്രസിഡന്റ് രമ്യ തോമസ്, പാറക്കടവ് ബ്ലോക്ക് പഞ്ചായത്ത് പ്രസിഡന്റ് ടി.വി. പ്രദീഷ്, ആലങ്ങാട് ഗ്രാമ പഞ്ചായത്ത് പ്രസിഡന്റ് പി.എം. മനാഫ്, ജില്ലാ പഞ്ചായത്ത് അംഗങ്ങളായ യേശുദാസ് പാറപ്പിള്ളി, കെ.ബി. രവീന്ദ്രൻ, ത്രിതല പഞ്ചായത്ത് അംഗങ്ങൾ, സഹകരണ ബാങ്ക് പ്രസിഡന്റുമാർ, മതപണ്ഡിതന്മാർ, വ്യവസായികൾ, വിവിധ സംഘടന പ്രതിനിധികൾ എന്നിവർ മുഖാമുഖം പരിപാടിയിൽ പങ്കെടുത്തു.