ഓട്ടോറിക്ഷ അടിച്ചുതകർത്തു, കൃഷിയും നശിപ്പിച്ചു; പുന്നപ്രയിൽ സാമൂഹിക വിരുദ്ധരുടെ അഴിഞ്ഞാട്ടം, ജനങ്ങൾ ഭീതിയിൽ

പുന്നപ്രയിൽ ഇരുട്ടിന്‍റെ മറവിൽ സാമൂഹിക വിരുദ്ധരുടെ അഴിഞ്ഞാട്ടം. വിധവയായ വീട്ടമ്മയുടെ ഓട്ടോറിക്ഷ അടിച്ചുതകർത്ത അക്രമികൾ സമീപത്തെ പുരയിടത്തിലെ കൃഷികളും നശിപ്പിച്ചു.

അമ്പലപ്പുഴ: പുന്നപ്രയിൽ ഇരുട്ടിന്‍റെ മറവിൽ സാമൂഹിക വിരുദ്ധരുടെ അഴിഞ്ഞാട്ടം. വിധവയായ വീട്ടമ്മയുടെ ഓട്ടോറിക്ഷ അടിച്ചുതകർത്ത അക്രമികൾ സമീപത്തെ പുരയിടത്തിലെ കൃഷികളും നശിപ്പിച്ചു. പുന്നപ്ര വടക്ക് പഞ്ചായത്ത് ഒന്നാം വാർഡ് വാടക്കക്ക കൂനാഞ്ഞലിക്കൽ ഷെഹ്നയുടെ ഓട്ടോറിക്ഷയാണ് കഴിഞ്ഞ ദിവസം രാത്രി പന്ത്രണ്ടോടെ തകർത്തത്. രണ്ട് പെൺമക്കളുടെ അമ്മയായ ഷെഹ്ന ഓട്ടോറിക്ഷ ഓടിച്ചാണ് കുടുംബം പുലർത്തുന്നത്. ഇവരുടെ ഏക ഉപജീവനമാർഗമാണ് അക്രമികൾ നശിപ്പിച്ചത്. ഇവരുടെ സമീപവാസിയായ കാക്കരിയിൽ ജോൺ കുട്ടിയുടെ പുരയിടത്തിലെ ചേമ്പ് ഉൾപ്പെടെയുള്ള കൃഷികളും ഇതേ രാത്രി നശിപ്പിച്ചു.

രാത്രി ജോലിക്കു പോകുകയായിരുന്ന മത്സ്യത്തൊഴിലാളികൾ റോഡിൽ ചേമ്പ് പിഴുതിട്ട നിലയിൽ കണ്ടതിനെ തുടർന്ന് നടത്തിയ പരിശോധനയിലാണ് ഓട്ടോറിക്ഷയും തകർന്ന നിലയിൽ കണ്ടെത്തിയത്. കഴിഞ്ഞ ഒക്ടോബർ നാലിന് ഇവരുടെ സമീപവാസിയായ കാക്കരിയിൽ ദാസപ്പന്‍റെ സ്കൂട്ടറും സാമൂഹിക വിരുദ്ധർ കത്തിച്ചിരുന്നു. പ്രദേശത്ത് മദ്യ-മയക്കുമരുന്ന് സംഘങ്ങളുടെ ശല്യം രൂക്ഷമാണെന്നും ജനങ്ങൾ കടുത്ത ഭീതിയിലാണെന്നും നാട്ടുകാർ പറയുന്നു. സംഭവത്തിൽ പുന്നപ്ര പൊലീസിൽ പരാതി നൽകിയെങ്കിലും കുറ്റക്കാരെ കണ്ടെത്താൻ ഇതുവരെ കഴിഞ്ഞിട്ടില്ല.