'ഞാൻ മരിച്ചെന്ന് വാർത്ത കൊടുത്താൽ ഫോണിൽ വിളിച്ച് ചോദിക്കാം'; പികെ ശ്രീമതിക്കെതിരായ വാര്‍ത്തയിൽ എംവി ജയരാജന്റെ പ്രതികരണം

വ്യാജ വാർത്തകൾക്കെതിരെ സിപിഎം നേതാക്കളായ പികെ ശ്രീമതിയും എംവി ജയരാജനും രംഗത്ത്. തനിക്കെതിരായ അപവാദ പ്രചാരണങ്ങളിൽ കണ്ണീരണിഞ്ഞ് പ്രതികരിച്ച പികെ ശ്രീമതി നിയമനടപടിക്ക് ഒരുങ്ങുമ്പോൾ, വ്യാജ മരണവാർത്ത പ്രചരിച്ചാൽ സ്ഥിരീകരിക്കാൻ സ്വന്തം ഫോൺ നമ്പർ നൽകിയാണ് എംവി ജയരാജൻ പ്രതികരിച്ചത്.

തിരുവനന്തപുരം: വ്യാജ വാർത്തകൾക്കെതിരെ കടുത്ത പ്രതികരണവുമായി സിപിഎം കേന്ദ്ര കമ്മിറ്റി അംഗം പികെ ശ്രീമതിയും എംവി ജയരാജനും. താൻ മരിച്ചെന്ന് ഏതെങ്കിലും മാധ്യമങ്ങൾ വാർത്ത നൽകിയാൽ സ്ഥിരീകരണത്തിനായി സ്വന്തം മൊബൈൽ നമ്പറിലേക്ക് വിളിച്ചു ചോദിക്കാമെന്നായിരുന്നു സ്വന്തം ഫോൺ നമ്പർ പരസ്യമാക്കി എംവി ജയരാജൻ പ്രതികരിച്ചത്. പികെ ശ്രീമതിക്കെതിരായ വ്യാജ പ്രചാരണ വിഷയത്തിൽ സംസാരിക്കവേയായിരുന്നു അദ്ദേഹത്തിന്റെ പ്രതികരണം.

യൂട്യൂബ് ചാനലുകൾ വഴി തനിക്കെതിരെ നടക്കുന്ന അപവാദ പ്രചാരണങ്ങൾക്കെതിരെ കണ്ണീരണിഞ്ഞാണ് പി.കെ. ശ്രീമതി മാധ്യമങ്ങൾക്ക് മുന്നിലെത്തിയത്. പികെ ശശിക്കെതിരായ ആരോപണത്തിൽ തീവ്രത എന്ന വാക്ക് താൻ ഉപയോഗിച്ചിട്ടില്ലെന്നും, ഏതെങ്കിലും എംഎൽഎയുടെ ഭാര്യയെന്ന നിലയിൽ ഫാമിലി പെൻഷൻ വാങ്ങുന്നുവെന്ന പ്രചാരണം അപമാനിക്കാനാണെന്നും അവർ വ്യക്തമാക്കി. മാധ്യമങ്ങളാരും വസ്തുത ചോദിച്ചില്ലെന്നും, അധ്യാപികയായിരുന്ന തനിക്ക് ഇത്രയും അഭിമാനക്ഷതം സംഭവിച്ച മറ്റൊരു സന്ദർഭമില്ലെന്നും അവർ പറഞ്ഞു.

വിഷയത്തിൽ മുഖ്യമന്ത്രി പിണറായി വിജയനും ആഭ്യന്തര വകുപ്പിനും ഡിജിപിക്കും സ്പീക്കർക്കും പരാതി നൽകുമെന്നും മാനനഷ്ടക്കേസ് ഫയൽ ചെയ്യുമെന്നും പി.കെ. ശ്രീമതി അറിയിച്ചു. സംഭവത്തിൽ കർശന നടപടിയെടുക്കാൻ പ്രതിപക്ഷ നേതാവ് വി.ഡി. സതീശൻ ആഭ്യന്തര വകുപ്പിന് നിർദേശം നൽകി. വ്യാജവാർത്ത നൽകിയ പലരും മാപ്പ് ചോദിച്ചതായും കോൺഗ്രസ്, ബിജെപി നേതാക്കൾ പിന്തുണ അറിയിച്ചതായും ശ്രീമതി കൂട്ടിച്ചേർത്തു.