ഇൻഡി​ഗോ വിമാനത്തിനെതിരെ പരാതിയുമായി കേൺഗ്രസ് നേതാവ്, ഒന്നരമണിക്കൂർ എ സി ഇല്ലാതെ ദുരിതയാത്ര !

പഞ്ചാബ് കോൺ​ഗ്രസ് അധ്യക്ഷനും എംഎൽഎയുമായ അമരീന്ദർ സിം​ഗ് രാജ വഡിം​ഗ് കഴിഞ്ഞ ദിവസം പങ്കുവച്ച വീഡിയോയാണ് സമൂഹമാധ്യമങ്ങളിൽ ചർച്ചയാകുന്നത്.

ദില്ലി : എസി പ്രവർത്തിപ്പിക്കാതെ പറന്ന ഇൻഡി​ഗോ വിമാനത്തിനുള്ളിലെ ദുരിതയാത്ര പങ്കുവെച്ച് പ‍ഞ്ചാബിലെ കോൺ​ഗ്രസ് നേതാവ്. പഞ്ചാബ് കോൺഗ്രസ് അധ്യക്ഷൻ അമരീന്ദർ സിം​ഗ് രാജ വഡിം​ഗാണ് ദൃശ്യങ്ങളടക്കം ട്വിറ്ററിൽ പങ്കുവച്ചത്. സംഭവത്തിൽ ഇൻഡി​ഗോ അന്വേഷണം തുടങ്ങി.

പഞ്ചാബ് കോൺ​ഗ്രസ് അധ്യക്ഷനും എംഎൽഎയുമായ അമരീന്ദർ സിം​ഗ് രാജ വഡിം​ഗ് കഴിഞ്ഞ ദിവസം പങ്കുവച്ച വീഡിയോയാണ് സമൂഹമാധ്യമങ്ങളിൽ ചർച്ചയാകുന്നത്. കനത്ത വെയിലിൽ വരി നിന്ന് തളർന്നാണ് യാത്രക്കാർ വിമാനത്തിനകത്ത് എത്തിയത്. ചണ്ഡീ​ഗ​ഢിൽനിന്നും പറന്നുപൊങ്ങി ജയ്പൂരിലെത്തും വരെ ഒന്നരമണിക്കൂർ എസി പ്രവർത്തിച്ചില്ല. 

ഇതിനിടെ പേപ്പറുകളുപയോ​ഗിച്ച് വീശിയാണ് യാത്രക്കാർ പിടിച്ചുനിന്നത്. വിയർത്തൊലിച്ച യാത്രക്കാർക്ക് ടിഷ്യു പേപ്പർ തന്ന് എയർഹോസ്റ്റസുമാർ മര്യാദ കാട്ടിയെന്നും ട്വിറ്ററിൽ പങ്കുവച്ച പോസ്റ്റിലുണ്ട്. ഡിജിസിഎയെ ടാഗ് ചെയ്തുകൊണ്ടുള്ള പോസ്റ്റ് വൈറലായതിന് പിന്നാലെയാണ് ഇൻഡിഗോ അന്വേഷണം തുടങ്ങിയത്. യാത്രക്കാരോട് ഇൻഡി​ഗോ അധികൃതർ മാപ്പും പറഞ്ഞു. സാങ്കേതിക തകരാറാണ് വിമാനത്തിൽ എസി ഓണാകാഞ്ഞതിന് കാരണമെന്നാണ് സൂചന. കഴിഞ്ഞ ഒരു ദിവസത്തിനിടെ മാത്രം രാജ്യത്ത് മൂന്നിടങ്ങളിലാണ് ഇൻഡിഗോ വിമാനങ്ങളിൽ സാങ്കേതിക തകരാറുകൾ റിപ്പോർട്ട് ചെയ്തത്.