5 സ്വർണവളകളിൽ 3 എണ്ണം കാണാനില്ല, ദേഹത്ത് മുറിപ്പാടുകൾ, കോടനാട് വയോധിക ദുരൂഹസാഹചര്യത്തിൽ മരിച്ച നിലയിൽ

മനയ്ക്കപ്പടി വീട്ടിൽ ഔസേപ്പിന്‍റെ ഭാര്യ അന്നം ഔസേഫ് ആണ് മരിച്ചത്.

കൊച്ചി: എറണാകുളം കോടനാട് വൃദ്ധയെ ദുരൂഹസാഹചര്യത്തിൽ മരിച്ച നിലയിൽ കണ്ടെത്തി. മനയ്ക്കപ്പടി വീട്ടിൽ ഔസേപ്പിന്‍റെ ഭാര്യ അന്നം ഔസേഫ് ആണ് മരിച്ചത്. ധരിച്ചിരുന്ന 5 സ്വർണവളകളിൽ മൂന്നെണ്ണം നഷ്ടപ്പെട്ട നിലയിലാണ്. ദേഹത്ത് മുറിപ്പാടുകൾ ഉണ്ട്. ഇതുകൂടാതെ വസ്ത്രത്തിലും മൃതദേഹത്തിനടുത്തും ചോരക്കറയുണ്ട്. കവർച്ചയുടെ ഭാഗമായി കൊലപ്പെടുത്തിയതാണോ എന്ന സംശയത്തിലാണ് പോലീസ്. പെരുമ്പാവൂർ സ്വദേശിയായ അഡ്വക്കറ്റ് വർഗീസിന്റെ രണ്ടര ഏക്കറോളം പുരയിടം സൂക്ഷിക്കുന്നത് ഇവരാണ്. ഈ പുരയിടത്തിന്റെ ഒരു ഭാഗത്താണ് മൃതദേഹം കണ്ടെത്തിയത്. കോടനാട് പോലീസ് വിരലടയാള വിദഗ്ധർ ഫോറൻസിക്ക് സംഘം എന്നിവർ സ്ഥലത്തെത്തി പരിശോധനകൾ നടത്തി. സിസി ടിവി ക്യാമറകൾ കേന്ദ്രീകരിച്ച് അന്വേഷണം പുരോഗമിക്കുകയാണ്.