
തിരുവനന്തപുരം: സംസ്ഥാനത്ത് 8 പേര്ക്ക് കൂടി ഒമിക്രോണ് (Omicron) സ്ഥിരീകരിച്ചതായി ആരോഗ്യ വകുപ്പ് മന്ത്രി വീണാ ജോര്ജ് (Veena George). തിരുവനന്തപുരം 1, കൊല്ലം 1, ആലപ്പുഴ 2, എറണാകുളം 2, തൃശൂര് 2 എന്നിങ്ങനെയാണ് പുതിയ ഒമിക്രോണ് കേസുകൾ സ്ഥിരീകരിച്ചത്. റഷ്യയില് നിന്നും ഡിസംബര് 22ന് തിരുവനന്തപുരം എയര്പോര്ട്ടിലെത്തിയ വിദേശി (48), 16ന് നമീബിയയില് നിന്നും എറണാകുളത്തെത്തിയ കൊല്ലം സ്വദേശി (40), 17ന് ഖത്തറില് നിന്നും എറണാകുളത്തെത്തിയ ആലപ്പുഴ സ്വദേശിനി (28), 11ന് ഖത്തറില് നിന്നും എറണാകുളത്തെത്തിയ ആലപ്പുഴ സ്വദേശി (40), യുകെയില് നിന്ന് 18ന് എറണാകുളത്തെത്തിയ പെണ്കുട്ടി (3), യുഎഇയില് നിന്നും 18ന് എത്തിയ എറണാകുളം സ്വദേശി (25), കെനിയയില് നിന്നും 13ന് എറണാകുളത്തെത്തിയ തൃശൂര് സ്വദേശി (48), പ്രാഥമിക സമ്പര്ക്ക പട്ടികയിലുള്ള തൃശൂര് സ്വദേശിനി (71) എന്നിവര്ക്കാണ് ഒമിക്രോണ് സ്ഥിരീകരിച്ചത്. ഇതോടെ സംസ്ഥാനത്ത് ആകെ ഒമിക്രോൺ കേസുകൾ 37 ആയി.
യുകെയില് നിന്നും മാതാപിതാക്കളോടൊപ്പം എത്തിയതാണ് മൂന്ന് വയസുകാരി. എയര്പോര്ട്ടിലെ കൊവിഡ് പരിശോധനയില് മാതാപിതാക്കള് നെഗറ്റിവായിരുന്നു. ഹോം ക്വാറന്റീനിലായിരുന്നു ഇവര്. കുട്ടിക്ക് പനിയും മറ്റ് ലക്ഷണങ്ങളും കണ്ടതിനെ തുടര്ന്ന് നടത്തിയ പരിശോധനയിലാണ് കോവിഡ് സ്ഥിരീകരിച്ചത്.
കൊവിഡ് പോസിറ്റീവായതിനെ തുടര്ന്ന് രാജീവ് ഗാന്ധി സെന്റര് ഫോര് ബയോടെക്നോളജിയില് അയച്ച ഇവരുടെ സാമ്പിളുകളിലാണ് ഒമിക്രോണ് സ്ഥിരീകരിച്ചത്. ഇവര് ആശുപത്രികളില് ചികിത്സയിലാണ്. ഇവരുടെ സമ്പര്ക്കപ്പട്ടിക തയ്യാറാക്കി വരുന്നു.
സംസ്ഥാനത്ത് ആദ്യമായി റിപ്പോര്ട്ട് ചെയ്ത ഒമിക്രോണ് പോസിറ്റീവായ യുകെയില് നിന്നും വന്ന എറണാകുളം സ്വദേശിയെ (39) ആശുപത്രിയില് നിന്നും ഡിസ്ചാര്ജ് ചെയ്തു. തുടര് പരിശോധനയില് നെഗറ്റീവായതിനെ തുടര്ന്നാണ് ഡിസ്ചാര്ജ് ചെയ്തത്.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam