പാലാ ഉപതെരഞ്ഞെടുപ്പ്; സ്ഥാനാർത്ഥി തർക്കം തീർക്കാൻ യുഡിഎഫ് ഉപസമിതി യോഗം ഇന്ന്

സ്ഥാനാർത്ഥി നിർണ്ണയത്തെക്കുറിച്ച് അന്തിമ തീരുമാനമെടുക്കാൻ ജോസ് കെ മാണി വിഭാഗത്തിന്റെ സംസ്ഥാന സമിതി യോഗവും ഇന്ന് വൈകിട്ട് കോട്ടയത്ത് ചേരും. 

കോട്ടയം: സ്ഥാനാര്‍ഥി നിര്‍ണയത്തെച്ചൊല്ലി ജോസ് കെ മാണി- പി ജെ ജോസഫ് വിഭാഗങ്ങള്‍ തമ്മിലുള്ള തര്‍ക്കം പരിഹരിക്കാൻ രൂപീകരിച്ച യുഡിഎഫ് ഉപസമിതി ഇന്ന് യോഗം ചേരും. രാവിലെ പത്ത് മണിക്ക് കോട്ടയം ഡിസിസിയിലാണ് യോഗം ചേരുക. ജോസ് കെ മാണിയുമായും പി ജെ ജോസഫുമായി സമിതി പ്രത്യേകം ചർച്ച നടത്തും.

യുഡിഎഫ് കൺവീനർ ബെന്നി ബെഹനാന്‍റെ നേതൃത്വത്തിലുള്ള സമിതിയാണ് യോ​ഗം വിളിച്ചുചേർത്തത്. സ്ഥാനാർത്ഥി നിർണ്ണയത്തെക്കുറിച്ച് അന്തിമ തീരുമാനമെടുക്കാൻ ജോസ് കെ മാണി വിഭാഗത്തിന്റെ സംസ്ഥാന സമിതി യോഗവും ഇന്ന് വൈകിട്ട് കോട്ടയത്ത് ചേരും.

അതേസമയം, പാലാ ഉപതെരഞ്ഞെടുപ്പിലെ യുഡിഎഫ് സ്ഥാനാർത്ഥി നിർണ്ണയത്തിനായി തോമസ് ചാഴിക്കാടൻ അധ്യക്ഷനായ സമിതി രൂപീകരിച്ചുവെന്ന് ജോസ് കെ മാണി ഇന്നലെ അറിയിച്ചിരുന്നു. സമിതിയില്‍ ഏഴ് അംഗങ്ങളാവും ഉണ്ടാവുക. ഞായറാഴ്ച വൈകിട്ടോടെ സ്ഥാനാർത്ഥിയെ പ്രഖ്യാപിക്കും. നാളെ ഉച്ചയ്ക്ക് മുമ്പ് പ്രവർത്തകർക്ക് അഭിപ്രായം അറിയിക്കാം. ചിഹ്നത്തിൽ ധാരണയായിയെന്നും ജോസ് കെ മാണി പറഞ്ഞു.