കൊടിയത്തൂർ മുക്കുപണ്ട പണയ തട്ടിപ്പ്; പഞ്ചായത്ത് വൈസ് പ്രസിഡന്റ് പിടിയിൽ

27 ലക്ഷത്തിന്റെ തട്ടിപ്പുകേസിൽ നിർണായക അറസ്റ്റ്; ബാബു പൊലുകുന്നത്തിനെ പിടികൂടിയത് മുക്കം പൊലീസ്

കൊടിയത്തൂർ: കേരള ഗ്രാമീൺ ബാങ്കിലെ മുക്കുപണ്ട പണയ തട്ടിപ്പിൽ പഞ്ചായത്ത് വൈസ് പ്രസിഡന്റ് പിടിയിൽ. കൊടിയത്തൂർ പഞ്ചായത്ത് വൈസ് പ്രസിഡന്റായ ബാബു പൊലുകുന്നത്താണ് പിടിയിലായത്. മുക്കം സിഐയുടെ നേതൃത്വത്തിലുള്ള സംഘമാണ് ബാബുവിനെ അറസ്റ്റ് ചെയ്തത്. 27 ലക്ഷം രൂപയുടെ സ്വർണപ്പണയ തട്ടിപ്പ് നടത്തിയ കേസിൽ ഒളിവിലായിരുന്നു മുഖ്യപ്രതിയായ ബാബു പൊലുകുന്നത്ത്.  ദളിത് കോൺഗ്രസ് നേതാവായ വിഷ്ണു അടക്കം രണ്ട് പേര്‍ കേസുമായി ബന്ധപ്പെട്ട് റിമാന്‍ഡിലുണ്ട്.

അന്വേഷണം നടക്കുന്നതിനിടെ കഴിഞ്ഞ ദിവസം അപ്രൈസര്‍ മുക്കം സ്വദേശി മോഹനൻ ട്രെയിനിന് മുന്നിൽ ചാടി ജീവനൊടുക്കിയിരുന്നു. കോഴിക്കോട് രണ്ടാം ഗേറ്റിന് സമീപത്തുവച്ച് 11 മണിയോടെയാണ് മോഹനൻ ട്രെയിനിന് മുന്നിലേക്ക് ചാടിയത്. ഗുരുതര പരിക്കുകളോടെ മോഹനനെ രക്ഷപ്പെടുത്തി കോഴിക്കോട് മെഡിക്കൽ കോളേജ്  ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായിരുന്നില്ല. ഗ്രാമീണ ബാങ്കിന്‍റെ കൊടിയത്തൂര്‍ ശാഖ കേന്ദ്രീകരിച്ചാണ് മുക്കുപണ്ടം പണയം വച്ച് തട്ടിപ്പ് നടന്നത്.

ദളിത് കോൺഗ്രസ് നേതാവായ വിഷ്ണു മുക്കുപണ്ടം പന്തീരാങ്കാവിലെ മറ്റൊരു ബാങ്കിൽ പണയം വെക്കാനെത്തിയ ഘട്ടത്തിൽ സംശയം തോന്നിയ ബാങ്ക് ഉദ്യോഗസ്ഥർ പൊലീസിലറിയിക്കുകയും അന്വേഷണം നടത്തുകയുമായിരുന്നു. പിന്നാലെയാണ് കൊടിയത്തൂർ ഗ്രാമീണ ബാങ്കിലെ ലക്ഷങ്ങളുടെ തട്ടിപ്പടക്കം പുറത്ത് വന്നത്. തട്ടിപ്പ് പുറത്ത് വന്നതിനെ തുടർന്ന് പഞ്ചായത്ത് വൈസ് പ്രസിഡന്റ് ബാബു പെലുകുന്നത്തിനെയും ദളിത് കോൺഗ്രസ് നേതാവ് വിഷ്ണുവിനെയും കോൺഗ്രസ് സസ്പെൻഡ് ചെയ്തിരുന്നു.