'മത്സ്യത്തൊഴിലാളികൾക്ക് പ്രകടന പത്രികയിൽ പ്രത്യേക പരിഗണന', പ്രശ്നങ്ങൾ നേരിട്ട് അറിഞ്ഞ് രാഹുൽ ഗാന്ധി

ഏറ്റവും ഉറപ്പുള്ള വാഗ്ദാനങ്ങളാണ് യുഡിഎഫ് മത്സ്യ തൊഴിലാളികൾക്ക് നൽകുന്നത്. പ്രകടന പത്രികയിൽ എന്തൊക്കെ ഉൾപ്പെടുത്തുന്നുവോ അതെല്ലാം നടപ്പിലാക്കുമെന്ന് താൻ ഉറപ്പ് നൽകുകയാണെന്നും അദ്ദേഹം കൂട്ടിച്ചേർത്തു.

കൊല്ലം: യുഡിഎഫ് പ്രകടന പത്രികയിൽ മത്സ്യത്തൊഴിലാളികൾക്ക് പ്രത്യേക പരിഗണന നൽകുമെന്ന് കോൺഗ്രസ് എംപി രാഹുൽ ഗാന്ധി. ഇതിനായി മത്സ്യത്തൊഴിലാളികളുമായി നിരന്തരം ആശയവിനിമയം നടത്തി അവരുടെ ആവശ്യങ്ങൾ മനസിലാക്കാൻ സംസ്ഥാന നേതാക്കളോട് ആവശ്യപ്പെട്ടിട്ടുണ്ടെന്നും നികുതി പിൻവലിക്കണമെന്ന ആവശ്യം യുഡിഎഫ് പ്രകടന പത്രികയിൽ ഉണ്ടാകുമെന്നും രാഹുൽ വ്യക്തമാക്കി.

ഏറ്റവും ഉറപ്പുള്ള വാഗ്ദാനങ്ങളാണ് യുഡിഎഫ് മത്സ്യത്തൊഴിലാളികൾക്ക് നൽകുന്നത്. പ്രകടന പത്രികയിൽ എന്തൊക്കെ ഉൾപ്പെടുത്തുന്നുവോ അതെല്ലാം നടപ്പിലാക്കുമെന്ന് താൻ ഉറപ്പ് നൽകുകയാണെന്നും അദ്ദേഹം കൂട്ടിച്ചേർത്തു. മത്സ്യത്തൊഴിലാളി മേഖലയിലെ പ്രശ്നങ്ങൾ കഴിയും വിധം പരിഹരിക്കാൻ ശ്രമിക്കും. പ്രത്യേക വകുപ്പ് രൂപീകരിക്കും. 

മത്സ്യത്തൊഴിലാളികൾക്കായി മാത്രമുള്ള മന്ത്രാലയം കേന്ദ്രത്തിലില്ല. അവർക്കൊപ്പം കടലിൽ സമയം ചിലവിട്ടതോടെ തൊളിലാളികൾ നേരിടുന്ന ബുദ്ധിമുട്ടുകൾ മനസിലാക്കാൻ തനിക്ക് സാധിച്ചെന്ന് പറഞ്ഞ രാഹുൽ തൊഴിലാളികളുടെ വിഷമങ്ങൾ പരിഹരിക്കാൻ ശ്രമിക്കുമെന്നും കൂട്ടിച്ചേർത്തു. കൊല്ലത്ത് മത്സ്യത്തൊഴിലാളികളുമായി സംവദിക്കുകയായിരുന്നു അദ്ദേഹം. സംവാദത്തിന് മുമ്പ് മത്സ്യത്തൊഴിലാളികൾക്കൊപ്പം കൊല്ലത്തെ വാടി കടപ്പുറത്ത് നിന്നും തൊഴിലാളികളുടെ മത്സ്യ ബന്ധന ബോട്ടിൽ കടൽ യാത്ര ചെയ്ത രാഹുൽ ഗാന്ധി ഏകദേശം രണ്ട് മണിക്കൂറോളം കടലിൽ ചിലവഴിച്ചു.