ഭരണഘടനക്കെതിരായ പരാമര്ശം; 'മന്ത്രി രാജിവയ്ക്കേണ്ട, നാക്ക് പിഴ സംഭവിച്ചിട്ടുണ്ടാകാം'; എം എ ബേബി
Synopsis
വിമർശനം ഭരണഘടനക്ക് എതിരല്ല.ഇന്ത്യയിലെ ഭരണകൂട സംവിധാനത്തിനെതിരെയാണ് വിമർശനം.രാജ്യത്തെ സാമ്പത്തിക സാമൂഹിക സാഹചര്യത്തെ കുറിച്ച് പറഞ്ഞപ്പോൾ നാവ് പിഴ ഉണ്ടായതാകാം
ദില്ലി:ഭരണഘടനക്കെതിരെ പരാമര്ശം നടത്തിയ മന്ത്രി സജി ചെറിയാനെ പിന്തുണച്ച് സിപിഎം. മന്ത്രി രാജിവക്കേണ്ട സാഹചര്യമില്ലെന്ന് സിപിഎം പോളിറ്റ് ബ്യൂറോ അംഗം എം എ ബേബി വ്യക്തമാക്കി. മന്ത്രിയുടെ പ്രസ്താവന വിവാദമായ സാഹചര്യത്തില് കേന്ദ്ര നേതൃത്വം വിവാദത്തെക്കുറിച്ച് അന്വേഷിച്ചു.വിമർശനം ഭരണഘടനക്ക് എതിരല്ല.ഇന്ത്യയിലെ ഭരണകൂട സംവിധാനത്തിനെതിരെയാണ് വിമർശനം.രാജ്യത്തെ സാമ്പത്തിക സാമൂഹിക സാഹചര്യത്തെ കുറിച്ച് പറഞ്ഞപ്പോൾ നാവ് പിഴ ഉണ്ടായതാകാം.ഭരണഘടനക്ക് ചില അപാകതകൾ ഉണ്ടാകാം എന്ന് നിർമാതാക്കൾ തന്നെ സമ്മതിച്ചിട്ടുണ്ട്.അതു കൊണാണ് ഭരണഘടന ഭേദഗതി തന്നെ വരുന്നത്. പരാമര്ശത്തിന്രെ പേരില് മന്ത്രി രാജി വെക്കേണ്ടതില്ലെന്നും എം എ ബേബി പറഞ്ഞു
വാക്കുകൾ വളച്ചൊടിക്കപ്പെട്ടു എന്ന് സജി ചെറിയാൻ, തെറ്റായി വ്യാഖ്യാനിക്കാൻ ഇടയായതിൽ ദുഃഖം രേഖപ്പെടുത്തുന്നു
ഭരണഘടന സംബന്ധിച്ച വിവാദ പ്രസംഗത്തിൽ വിശദീകരണവുമായി മന്ത്രി സജി ചെറിയാൻ. ഭരണഘടനയുടെ അന്തഃസത്ത തകർന്നു എന്നതാണ് താൻ ഉദ്ദേശിച്ചതെന്ന് സജി ചെറിയാൻ നിയമസഭയിൽ പറഞ്ഞു. തന്റെതായ ശൈലിയിൽ പറയാൻ ശ്രമിക്കുകയായിരുന്നു. വാക്കുകൾ വളച്ചൊടിക്കപ്പെട്ടു. തെറ്റായി വ്യാഖ്യാനിക്കാൻ ഇടയായതിൽ ദുഃഖവും ഖേദവും രേഖപ്പെടുത്തുന്നു എന്ന് സജി ചെറിയാൻ നിയമസഭയിൽ പറഞ്ഞു. ധനാഭ്യർത്ഥന ചർച്ചയ്ക്കുള്ള മറുപടിയിലാണ് മന്ത്രി ഇക്കാര്യം പരാമർശിച്ചത്. പ്രതിപക്ഷ നേതാവ് വി.ഡി.സതീശൻ വിഷയം ഉന്നയിച്ചപ്പോഴായിരുന്നു മന്ത്രിയുടം മറുപടി.
ഭരണഘടനയ്ക്ക് അവമതിപ്പുണ്ടാക്കാനോ അതിനെതിരായി എന്തെങ്കിലും പറയാനോ ഉദ്ദേശിച്ചിട്ടില്ല. ഭരണഘടനയെ ബഹുമാനിക്കുകയും അതിന്റെ ഉദാത്തമായ മൂല്യങ്ങള് ഉയര്ത്തിപ്പിടിക്കുകയും ചെയ്യുന്ന പൊതുപ്രവര്ത്തകനാണ് താൻ. താനുള്പ്പെടുന്ന പ്രസ്ഥാനം ഭരണഘടനയെയും അതില് ഉയര്ത്തിപ്പിടിച്ചിട്ടുള്ള മൂല്യങ്ങളെയും സംരക്ഷിക്കണമെന്ന ആവശ്യം രാജ്യത്തെമ്പാടും ഉയര്ത്തിപ്പിടിക്കുന്നവരുടെ മുന്പന്തിയിലാണെന്നും സജി ചെറിയാൻ വിശദീകരിച്ചു.
സജി ചെറിയാന്റെ വിശദീകരണം
മല്ലപ്പള്ളിയില് നടന്ന പരിപാടിയില് ഞാന് ഭരണഘടനയെ വിമര്ശിച്ചു എന്ന രീതിയില് വരുന്ന വാര്ത്തകള് വളച്ചൊടിക്കപ്പെട്ടതാണ്. നമ്മുടെ ഭരണഘടനയെ ബഹുമാനിക്കുകയും അതിന്റെ ഉദാത്തമായ മൂല്യങ്ങള് ഉയര്ത്തിപ്പിടിക്കുകയും ചെയ്യുന്ന പൊതുപ്രവര്ത്തകനാണ് ഞാന്. ഞാനുള്പ്പെടുന്ന പ്രസ്ഥാനം നമ്മുടെ ഭരണഘടനയെയും അതില് ഉയര്ത്തിപ്പിടിച്ചിട്ടുള്ള മൂല്യങ്ങളെയും സംരക്ഷിക്കണമെന്ന ആവശ്യം രാജ്യത്തെമ്പാടും ഉയര്ത്തിപ്പിടിക്കുന്നവരുടെ മുന്പന്തിയിലാണ്.
നമ്മുടെ ഭരണഘടനയുടെ നിര്ദ്ദേശകതത്വങ്ങള് സാമൂഹ്യനീതിയും സാമ്പത്തിക സുരക്ഷയും എല്ലാവര്ക്കും ഉറപ്പുവരുത്തണമെന്ന് നിഷ്ക്കര്ഷിക്കുന്നുണ്ട്. എന്നാല് ഇവ നടപ്പിലാക്കിക്കിട്ടണം എന്ന ആവശ്യവുമായി കോടതിയെ സമീപിക്കാനുള്ള അവകാശം ഭരണഘടനയില് എഴുതി ചേര്ക്കപ്പെട്ടിട്ടില്ല. രാജ്യത്തെ ചൂഷണം ചെയ്യപ്പെടുന്ന ജനകോടികള്ക്ക് നീതി ലഭിക്കണമെങ്കില് ഭരണഘടനയുടെ നിര്ദ്ദേശകതത്വങ്ങള്ക്ക് കൂടുതല് ശാക്തീകരണം അനിവാര്യമാണ്. അല്ലെങ്കില് വര്ദ്ധിച്ചു വരുന്ന അസമത്വങ്ങള്ക്കെതിരെ പ്രതിരോധം തീര്ക്കുന്നതില് ഭരണഘടനയ്ക്ക് ശക്തിയുണ്ടാവില്ല എന്ന ആശങ്കയാണ് ഞാന് എന്റേതായ വാക്കുകളില് പ്രകടിപ്പിച്ചത്. ഒരിക്കല്പ്പോലും ഭരണഘടനയ്ക്ക് അവമതിപ്പുണ്ടാക്കാനോ അതിനെതിരായ കാര്യങ്ങള് പറയാനോ ഞാന് ഉദ്ദേശിച്ചിട്ടേയില്ല.
സ്വതന്ത്ര ഭാരത്തില് ഭരണകൂട സംവിധാനങ്ങള് ഈ തത്വങ്ങള് നടപ്പിലാക്കുന്നതില് പരാജയപ്പെട്ടതിന്റെ ഫലമായി സാമ്പത്തിക - സാമൂഹിക അസമത്വങ്ങള് വളരെ വര്ദ്ധിക്കുകയാണുണ്ടായത്. നിര്ദ്ദേശകതത്വങ്ങള്ക്ക് ഊടും പാവും നല്കുന്ന നിയമനിര്മ്മാണം നടത്താന് ശ്രമം നടത്തിയ ഇടതുപക്ഷ നേതൃത്വത്തിലുള്ള സംസ്ഥാന സര്ക്കാരുകളെ ഭരണഘടനയുടെ വകുപ്പുകള് തന്നെ ദുരുപയോഗം ചെയ്തുകൊണ്ട് അട്ടിമറിച്ച അനുഭവവും നമുക്കു മുന്നിലുണ്ട്.
ഭരണ ഘടന ഉയര്ത്തിപ്പിടിക്കുന്ന മതനിരപേക്ഷത, ജനാധിപത്യം, ഫെഡറല് ഘടന, എന്നീ തത്വങ്ങള് കടുത്ത വെല്ലുവിളിയാണ് വര്ത്തമാനകാലത്ത് നേരിട്ടുകൊണ്ടിരിക്കുന്നത്.
തൊഴിലാളികള്ക്ക് അവരുടെ അവകാശങ്ങള് നേടിയെടുക്കുന്നതിന് നിലവിലുണ്ടായിരുന്ന നിമയങ്ങളെല്ലാം റദ്ദാക്കിക്കൊണ്ട് ലേബര് കോഡുകള് രാജ്യത്ത് അടിച്ചേല്പ്പിച്ചത് കൊടിയ ചൂഷണത്തിന് വഴിവെയ്ക്കും എന്നാണ് ഞാന് ചൂണ്ടിക്കാണിച്ചത്. ഇതെല്ലാം രാജ്യത്ത് ഭരണത്തിനു നേതൃത്വം കൊടുക്കുന്ന ഭരണകൂട സംവിധാനങ്ങള് സ്വീകരിക്കുന്ന നയങ്ങളുടെ ഫലമാണ്. ഈ നയങ്ങളാണ് ഭരണഘടനയുടെ അന്തഃസത്തയെയും മൂല്യങ്ങളെയും തകര്ക്കുന്നത് എന്നാണ് ഞാന് ചൂണ്ടിക്കാട്ടിയത്.
ഭരണഘടന നിര്മ്മാതാക്കളുടെ വീക്ഷണം സാര്ത്ഥകമാകാതെ പോയത് ഇതുവരെയുള്ള കേന്ദ്രസര്ക്കാരുകളുടെ രാഷ്ട്രീയ ജനവിരുദ്ധ രാഷ്ട്രീയ നയങ്ങളുടെ ഫലമാണ്. സ്വാതന്ത്ര്യം ലഭിച്ച് 75 വര്ഷമായിട്ടും നമ്മുടെ രാജ്യത്ത് മഹാഭൂരിപക്ഷം വരുന്ന ജനവിഭാഗങ്ങള്ക്ക് സാമൂഹ്യനീതി നിഷേധിക്കപ്പെടുന്നത് ചൂണ്ടിക്കാണിക്കണമെന്ന ഒരു പൊതുപ്രവര്ത്തകന്റെ കടമ നിര്വ്വഹിക്കുക മാത്രമേ ഞാന് ചെയ്തിട്ടുള്ളൂ.
മേല്പ്പറഞ്ഞ കാര്യങ്ങള് ശക്തിയായി അവതരിപ്പിച്ചപ്പോള് അത് ഏതെങ്കിലും രീതിയില് തെറ്റായി വ്യാഖ്യാനിക്കപ്പെടാനും ഞാന് ഉദ്ദേശിക്കാത്ത കാര്യങ്ങള്ക്ക് പ്രചാരണം ലഭിക്കാന് ഇടവന്നിട്ടുണ്ടെങ്കില് അതില് ഞാന് അതിയായ ദുഃഖവും ഖേദവും പ്രകടിപ്പിക്കുകയാണ്.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam