മന്ത്രിമാരുടെയും എംഎൽഎമാരുടെയും സാലറി വർധിപ്പിച്ച നടപടി അംഗീകരിക്കില്ല, സ്വീകരിക്കില്ല; മുഴുവൻ ശമ്പളവും മണ്ഡലത്തിലെ ജനങ്ങൾക്ക്: രാജീവ്‌ ചന്ദ്രശേഖർ

സംസ്ഥാനത്തെ മന്ത്രിമാരുടെയും എംഎൽഎമാരുടെയും ശമ്പളം വർധിപ്പിച്ച സർക്കാർ നടപടിയെ തള്ളി ബിജെപി അധ്യക്ഷൻ രാജീവ് ചന്ദ്രശേഖർ എംഎൽഎ. വർധിപ്പിച്ച ശമ്പളം സ്വീകരിക്കില്ലെന്നും അലവൻസുകൾ നേമം മണ്ഡലത്തിലെ ജനങ്ങൾക്കായി വിനിയോഗിക്കുമെന്നും അദ്ദേഹം വ്യക്തമാക്കി

തിരുവനന്തപുരം: മന്ത്രിമാരുടെയും എം എൽ എമാരുടെയും ശമ്പളം വർദ്ധിപ്പിച്ച് ബില്ല് പാസാക്കിയ സർക്കാർ നടപടിയോട് യോജിപ്പില്ലെന്നും മോശം സാമ്പത്തികാവസ്ഥയിലുള്ള സംസ്ഥാനത്തെ സർക്കാരിന്റെ നടപടി തെറ്റാണെന്നും ബി ജെ പി സംസ്ഥാന അധ്യക്ഷൻ രാജീവ്‌ ചന്ദ്രശേഖർ എം എൽ എ. വർദ്ധിപ്പിച്ച ശമ്പളവും അലവൻസുകളും സ്വീകരിക്കില്ല. എം എൽ എ എന്ന നിലയിൽ ലഭിക്കുന്ന എല്ലാ അലവൻസുകളും നേമം മണ്ഡലത്തിലെ പാവപ്പെട്ട ജനങ്ങൾക്കായി വിനിയോഗിക്കുമെന്നും രാജീവ്‌ ചന്ദ്രശേഖർ വ്യക്തമാക്കി. ആശാ വർക്കർമാർക്കും പി എസ് സി ഉദ്യോഗർത്ഥികൾക്കും നീതി നൽകാത്ത സർക്കാർ, എം എൽ എ മാരുടെയും മന്ത്രിമാരുടെയും ശമ്പളം വർധിപ്പിക്കുന്നത് ശരിയല്ല. ജനവിരുദ്ധ നയങ്ങൾ പിന്തുടരുന്നതിൽ പിണറായി വിജയൻ സർക്കാരും വി ഡി സതീശൻ സർക്കാരും തമ്മിൽ വത്യാസമില്ലെന്നും ബി ജെ പി സംസ്ഥാന അധ്യക്ഷൻ അഭിപ്രായപ്പെട്ടു.

ശമ്പള വർധന ബിൽ പാസാക്കി നിയമസഭ

അതേസമയം സംസ്ഥാനത്തെ മന്ത്രിമാരുടെയും എം എൽ എമാരുടെയും ശമ്പളവും വർധിപ്പിക്കുന്നതിനുള്ള ബിൽ ഭരണ - പ്രതിപക്ഷാംഗങ്ങൾ ഒറ്റക്കെട്ടായാണ് ഇന്ന് നിയമസഭയിൽ പാസാക്കിയത്. മുൻ എം എൽ എമാരുടെ പെൻഷനും വർധിപ്പിച്ചിട്ടുണ്ട്. ഇതിനു മുൻപ് 2018 ലാണ് ശമ്പള വർധന നടപ്പാക്കിയതെന്നും, ഉയർന്ന ചെലവുകൾ കാരണം പല അംഗങ്ങളും തങ്ങളനുഭവിക്കുന്ന ബുദ്ധിമുട്ടുകൾ സങ്കടത്തോടെ പങ്കുവെച്ചിരുന്നതായും തർക്കങ്ങളൊന്നുമില്ലാതെ ബിൽ പാസാക്കിയ നടപടിയെ അഭിനന്ദിച്ചുകൊണ്ട് സ്പീക്കർ തിരുവഞ്ചൂർ രാധാകൃഷ്ണൻ പറഞ്ഞു. എം എൽ എമാർക്ക് ഒരു പി എയെക്കൂടി അധികമായി അനുവദിക്കണമെന്ന സ്പീക്കറുടെ ആവശ്യത്തോട് അനുകൂലമായി പരിഗണിക്കാമെന്ന് മുഖ്യമന്ത്രി മറുപടി നൽകി. ബിൽ പാസാക്കിയതിന് പിന്നാലെ നിയമസഭ അനിശ്ചിതകാലത്തേക്ക് പിരിയുകയും ചെയ്തു.

അതിവേഗ നീക്കം, എല്ലാവരും ഹാപ്പി

സ്വന്തം ശമ്പളം കൂട്ടാനുള്ള ബില്ലിൽ നിയമസഭയിൽ തർക്കവും ഇല്ല, വിയോജനക്കുറിപ്പും ഉണ്ടായില്ല. പോർവിളിയെല്ലാം മാറ്റി ഒറ്റക്കെട്ടായി ബിൽ പാസാക്കി ഹാപ്പിയായി പിരിയുകയായിരുന്നു സാമാജികർ. ഇന്നലെ ബിൽ അംഗീകരിച്ച് കാബിനറ്റ്. പാർലമെൻററി കാര്യമന്ത്രി ലോക്ഭവനിലെത്തി നേരിട്ട് വിശദീകരിച്ച് അതിവേഗം ഗവർണറുടെ അനുമതി വാങ്ങി. ആദ്യം അജണ്ടയിൽ ഉൾപ്പെടുത്താത്ത ബിൽ അതിവേഗം കൂട്ടിച്ചേർത്ത് പാസസാക്കി. എം എൽ എമാരുടെ പ്രതിമാസ ആനുകൂല്യം 70000 ൽ നിന്ന് 98000 ആക്കി. മന്ത്രിമാരുടേത് 1.33 ലക്ഷമാക്കി. എം എൽ എമാരുടെ പലിശ രഹിത വാഹനവായ്പയും ഭവനവായ്പയും കൂട്ടി. വാഹനവായ്പ 10 ലക്ഷത്തിൽ നിന്ന് 15 ആയി. ഭവനവായപ 20 ൽ നിന്ന് 25 ലക്ഷം. പ്രതിവർഷ ഇന്ധന കൂപ്പൺ 4 ലക്ഷത്തിൽ നിന്ന് 5 ലക്ഷം, എക്സ് എം എൽ എമാരെയും കൈവിട്ടില്ല. മുൻ എം എൽ എമാരുടെ പരമാവധി പെൻഷൻ 50000 ൽ നിന്ന് 60000 ആക്കി. പ്രതിവർഷ ഇന്ധന കൂപ്പൺ 1 ലക്ഷത്തിൽ നിന്ന് ഒന്നരലക്ഷമാക്കി. 2018 ലാണ് അവസാനമായി ആനുകൂല്യങ്ങൾ കൂട്ടിയത്. ജീവിതച്ചെലവ് കൂടിയതും പ്രവർത്തിഭാരവുമാണ് ശമ്പള കൂട്ടാനുള്ള കാരണമായി പറയുന്നത്. മറ്റ് പല സംസ്ഥാനങ്ങളിലും രണ്ട് ലക്ഷത്തിലേറെ ആനുകൂല്യങ്ങൾ ഉള്ളത് സർക്കാർ താരതമ്യം ചെയ്യുന്നുണ്ട്. മറ്റ് പല വിഭാഗങ്ങളും ശമ്പളം കുട്ടാൻ നിവേദനം നൽകിയും സമരം ചെയ്തും കാത്തിരിക്കുമ്പോൾ എം എൽ എമാർക്കുള്ള മിന്നൽ തീരുമാനത്തിൽ വിമർശനവും ഉയരുന്നുണ്ട്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക