കാലവർഷ പ്രവചനവുമായി സ്കൈമെറ്റ്; ഇത്തവണ മഴ എങ്ങനെയുണ്ടാകുമെന്ന് ആദ്യ സൂചന

കാലാവസ്ഥാ പ്രവചന ഏജൻസിയായ സ്കൈമെറ്റ് ഇത്തവണത്തെ മൺസൂൺ പ്രവചനം പുറത്തുവിട്ടു. ജൂൺ-സെപ്റ്റംബർ കാലയളവിൻ്റെ രണ്ടാം പകുതിയിൽ എൽ നിനോ പ്രതിഭാസത്തിന് സാധ്യതയുള്ളതിനാൽ മഴ സാധാരണയിലും കുറവായിരിക്കുമെന്നാണ് പ്രവചനം. 

ദില്ലി: മൺസൂൺ കാലാവസ്ഥാ പ്രവചനവുമായി കാലാവസ്ഥാ പ്രവചന സ്വകാര്യ ഏജൻസി സ്കൈമെറ്റ്. ജൂൺ-സെപ്റ്റംബർ കാലവർഷത്തിന്റെ രണ്ടാം പകുതിയിൽ എൽ നിനോ പ്രതിഭാസമുണ്ടാകുമെന്നും മഴ കുറയുമെന്നുമാണ് പ്രവചനം. 2026 ൽ ഇന്ത്യയിൽ സാധാരണയിലും താഴെയുള്ള മൺസൂൺ മഴയായിരിക്കും ലഭിക്കുക. നാല് മാസത്തെ മൺസൂൺ മഴ ദീർഘകാല ശരാശരിയായ 868.6 മില്ലിമീറ്ററിന്റെ 94% ആയിരിക്കുമെന്ന് സ്കൈമെറ്റ് പറഞ്ഞു. ഇന്ത്യൻ കാലാവസ്ഥാ വകുപ്പ് (ഐഎംഡി) അടുത്ത ആഴ്ച മൺസൂൺ സീസൺ ആദ്യ പ്രവചനം പുറത്തുവിടും.

ജൂൺ-സെപ്റ്റംബർ തെക്കുപടിഞ്ഞാറൻ മൺസൂൺ ഇന്ത്യയുടെ വാർഷിക മഴയുടെ 70% നൽകുന്നു. രാജ്യത്തിന്റെ ജിഡിപിയിൽ ഗണ്യമായ സംഭാവന നൽകുന്നതും 1.4 ബില്യണിലധികം വരുന്ന ജനസംഖ്യയുടെ പകുതിയിലധികം പേരെയും പിന്തുണയ്ക്കുന്നതുമായ കാർഷിക മേഖക്ക് മൺസൂൺ പ്രധാനമാണ്. സാധാരണയായി, തെക്കുപടിഞ്ഞാറൻ മൺസൂൺ ജൂൺ 1 ന് കേരളത്തിൽ എത്തുകയും ജൂലൈ 15 ഓടെ രാജ്യം മുഴുവൻ വ്യാപിപ്പിക്കുകയും ചെയ്യും. പസഫിക് സമുദ്രത്തിലെ സമുദ്രോപരിതല താപനില സാധാരണയേക്കാൾ കൂടുതലാകുന്നതിനെയാണ് എൽ നിനോ എന്ന് വിളിക്കുന്നത്, അതേസമയം മൺസൂണിനെ ശക്തിപ്പെടുത്തുന്ന സമുദ്രോപരിതലത്തിന്റെ തണുപ്പിനെയാണ് ലാ നിന എന്ന് വിളിക്കുന്നത്.