വിട്ടുകൊടുക്കില്ല...കൊടുത്തില്ല കോട്ടയം, മൂന്നാം തവണയും തിരുവഞ്ചൂർ തന്നെ

കോട്ടയത്ത് വലതുമുന്നണിയുടെ പ്രതീക്ഷ കാത്ത് ഇത്തവണയും തിരുവഞ്ചൂര്‍. നേടിയത് 35986 വോട്ടുകളുടെ ഭൂരിപക്ഷം.

കോട്ടയം: 2026 നിയമസഭ തെരഞ്ഞെടുപ്പില്‍ കോട്ടയത്ത് യുഡിഎഫ് സ്ഥാനാര്‍ഥി തിരുവഞ്ചൂർ രാധാകൃഷ്ണന് വിജയം. പോരാട്ടത്തില്‍ 35986 വോട്ടുകളുടെ ഭൂരിപക്ഷം നേടിയാണ് തിരുവഞ്ചൂർ രാധാകൃഷ്ണൻ വിജയിച്ചത്. തിരുവഞ്ചൂർ രാധാകൃഷ്ണൻ 68893 വോട്ടുകളും പ്രധാന എതിരാളികളായ എൽഡിഎഫ് സ്ഥാനാര്‍ഥി അഡ്വ. കെ. അനിൽ കുമാർ 32907 വോട്ടുകളും, എൻഡിഎ സ്ഥാനാര്‍ഥി പി. അനിൽ കുമാർ 9726 വോട്ടുകളും നേടി.

കോട്ടയം നിയോജക മണ്ഡലം ഇക്കുറി ആവേശകരമായ തെരഞ്ഞെടുപ്പ് പോരാട്ടത്തിനാണ് സാക്ഷ്യം വഹിച്ചത്. മുന്‍ ആഭ്യന്തര മന്ത്രിയും കോട്ടയത്തെ സുപരിചിതനുമായ സിറ്റിംഗ് എംഎല്‍എ തിരുവഞ്ചൂർ രാധാകൃഷ്‌ണൻ വീണ്ടും യുഡിഎഫ് സ്ഥാനാർഥിയായതോടെ മുന്നണി വലിയ പ്രതീക്ഷയിലായിരുന്നു. അതേസമയം, സിപിഎം നേതാവ് അഡ്വ. കെ. അനിൽ കുമാറായിരുന്നു എൽഡിഎഫ് സ്ഥാനാർഥി. ബിഡിജെഎസിന് അനുവദിച്ച സീറ്റില്‍ പി.അനിൽ കുമാർ എൻഡിഎക്ക് വേണ്ടി മത്സരിച്ചു. മധ്യകേരളത്തില്‍ യുഡിഎഫും എല്‍ഡിഎഫും തമ്മില്‍ നേര്‍ക്കുനേര്‍ പോരാട്ടം ദൃശ്യമായ മണ്ഡലമാണിത്. 2021 നിയമസഭ തെരഞ്ഞെടുപ്പില്‍ തിരുവഞ്ചൂരും അനില്‍ കുമാറും മുഖാമുഖം വന്നപ്പോള്‍ 18,743 വോട്ടുകളുടെ ഭൂരിപക്ഷത്തില്‍ യുഡിഎഫ് സ്ഥാനാര്‍ഥിക്കായിരുന്നു വിജയം.

മണ്ഡല രൂപീകരണത്തിന് ശേഷം ഇടത് വലത് മുന്നണികൾ മാറി മാറി ഭരിച്ചിരുന്നുവെങ്കിലും 2011 മുതൽ കോട്ടയം നിയമസഭാ മണ്ഡ‍ലത്തെ പ്രതിനിധീകരിക്കുന്നത് മുതിര്‍ന്ന കോണ്‍ഗ്രസ് നേതാവ് തിരുവഞ്ചൂർ രാധാക‍ൃഷ്‌ണനാണ്. അടുപ്പിച്ച് മൂന്ന് ടേം വ്യക്തമായ ഭൂരിപക്ഷത്തോടെ കോട്ടയം നിയോജക മണ്ഡലം തിരുവഞ്ചൂരിനൊപ്പം നിന്നു. അതിനാല്‍തന്നെ കോട്ടയം നിയോജക മണ്ഡലം ഇത്തവണ പിടിച്ചെടുക്കുക എല്‍ഡിഎഫിനെ സംബന്ധിച്ച് ബാലികേറാമലയായിരുന്നു.