'കെ സി യുഡിഎഫിന്‍റെ വിജയശിൽപി, ചെന്നിത്തല ഒരു ഭാഗ്യദോഷി'; യുഡിഎഫിന്‍റെ വിജയം മുന്നണിയുടെ കൂട്ടായ പ്രവർത്തനത്തിന്റെ ഫലമെന്ന് വെള്ളാപ്പള്ളി നടേശൻ

കെ സി വേണുഗോപാലാണ് വിജയശിൽപിയെന്നും രമേശ് ചെന്നിത്തല ഒരു ഭാഗ്യദോഷിയാണെന്നും വെള്ളാപ്പള്ളി നടേശൻ. വി ഡി സതീശനെ മുഖ്യമന്ത്രിയായി തെരഞ്ഞെടുത്ത തീരുമാനം അംഗീകരിക്കുന്നുവെന്നും വെള്ളാപ്പള്ളി കൂട്ടിച്ചേര്‍ത്തു.

ആലപ്പുഴ: യുഡിഎഫ് നേടിയ മിന്നും വിജയം മുന്നണിയുടെ കൂട്ടായ പ്രവർത്തനത്തിന്റെ ഫലമാണെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. കെ സി വേണുഗോപാലാണ് വിജയശിൽപിയെന്നും രമേശ് ചെന്നിത്തല ഒരു ഭാഗ്യദോഷിയാണെന്നും വെള്ളാപ്പള്ളി നടേശൻ പ്രതികരിച്ചു. വി ഡി സതീശനെ മുഖ്യമന്ത്രിയായി തെരഞ്ഞെടുത്ത തീരുമാനം അംഗീകരിക്കുന്നുവെന്നും വെള്ളാപ്പള്ളി കൂട്ടിച്ചേര്‍ത്തു. എല്‍ഡിഎഫ് അധികാരത്തിൽ വരണം എന്ന എന്റെ ആഗ്രഹമാണ് ഞാൻ പറഞ്ഞതെന്നും അദ്ദേഹം കൂട്ടിച്ചേര്‍ത്തു.

യുഡിഎഫ് വിജയത്തിന്റെ പ്രധാന ശില്പി കെ സി വേണുഗോപാലാണെന്നും സമ്പത്തും ബുദ്ധിയും കെസി നൽകിയെന്നും വെള്ളാപ്പള്ളി നടേശൻ വാര്‍ത്താസമ്മേളനത്തില്‍ പറഞ്ഞു. ചെന്നിത്തല അവഗണിക്കപ്പെട്ടുവെന്നും അദ്ദേഹം ഒരു ഭാഗ്യദോഷിയാണെന്ന് പറയാമെന്നും പ്രതികരിച്ച, വെള്ളാപ്പള്ളി, പ്രതിപക്ഷ നേതാവ് എന്ന നിലയിൽ സതീശൻ്റെ ഇടപെടൽ പ്രശംസനീയമാണെന്നും കൂട്ടിച്ചേര്‍ത്തു. എന്‍എസ്എസിന്റെ പ്രസ്താവന അനവസരത്തിലാണ്. എല്ലാം കഴിഞ്ഞിട്ടാണോ ഇത് പറയുന്നതെന്നും വെള്ളാപ്പള്ളി ചോദിച്ചു. പുതിയ സർക്കാരിൽ ലീഗിന് പ്രാതിനിധ്യം കൂടുതൽ ഉണ്ടാകും. സമ്മർദ ഗ്രൂപ്പായി ലീഗ് കാര്യങ്ങള്‍ നേടി എടുക്കുമന്നും വെള്ളാപ്പള്ളി നടേശൻ അഭിപ്രായപ്പെട്ടു.