തൊണ്ടർനാട് തൊഴിലുറപ്പ് പദ്ധതി തട്ടിപ്പ് വിജിലൻസ് അന്വേഷിക്കും; ക്രൈംബ്രാഞ്ചിൽ നിന്ന് കേസുമായി ബന്ധപ്പെട്ട ഫയലുകൾ വരുത്തി പരിശോധിച്ചു

തൊണ്ടർനാട് തൊഴിലുറപ്പ് തട്ടിപ്പ് അന്വേഷിക്കാൻ വിജിലൻസ്. അന്വേഷണം നടത്തിയിരുന്ന ക്രൈംബ്രാഞ്ചിൽ നിന്ന് കേസുമായി ബന്ധപ്പെട്ട ഫയലുകൾ വരുത്തി വിജിലൻസ് പരിശോധന തുടങ്ങി.

കൽപ്പറ്റ: തൊണ്ടർനാട് തൊഴിലുറപ്പ് തട്ടിപ്പ് അന്വേഷിക്കാൻ വിജിലൻസ്. അന്വേഷണം നടത്തിയിരുന്ന ക്രൈംബ്രാഞ്ചിൽ നിന്ന് കേസുമായി ബന്ധപ്പെട്ട ഫയലുകൾ വരുത്തി വിജിലൻസ് പരിശോധന തുടങ്ങി. മൂന്ന് കോടിയിലധികം രൂപയുടെ തട്ടിപ്പാണ് തൊഴിലുറപ്പ് പദ്ധതിയുടെ മറവിൽ പഞ്ചായത്തിൽ നടന്നതെന്നാണ് ക്രൈംബ്രാഞ്ച് കണ്ടെത്തൽ. സിപിഎം ഭരിച്ചിരുന്ന വയനാട്ടിലെ തൊണ്ടർനാട് പഞ്ചായത്തിൽ നിന്ന് കഴിഞ്ഞ വർഷമാണ് തട്ടിപ്പുമായി ബന്ധപ്പെട്ട വിവരങ്ങൾ പുറത്തുവന്നത്. ആറു വർഷത്തോളം ഉദ്യോഗസ്ഥരും കരാറുകാരും ചേർന്ന് തട്ടിപ്പ് നടത്തിയെന്നാണ് പ്രാഥമിക വിലയിരുത്തൽ. എന്നാൽ രാഷ്ട്രീയ നേതാക്കൾക്കും അഴിമതിയിൽ പങ്കുണ്ടെന്നും അത് അന്വേഷിക്കണമെന്നും ആണ് യുഡിഎഫ് ആവശ്യം.