ചാനലുകളിൽ പാർട്ടിക്കായി വാദിക്കും, സംഘടനയിൽ ഏറ്റുമുട്ടും; രാഹുൽ മാങ്കൂട്ടത്തിനെതിരെ മത്സരിക്കാൻ അബിൻ വർക്കി?

അബിൻ വർക്കിയുടെ സ്ഥാനാർത്ഥിത്വവുമായി ബന്ധപ്പെട്ട് ഇന്ന് അന്തിമമായ തീരുമാനം ഉണ്ടാവും. നോമിനേഷൻ കൊടുക്കേണ്ട അവസാന തിയ്യതി ഇന്നാണ്. അതേസമയം, ചാനലുകളിൽ പാർട്ടിക്ക് വേണ്ടി വാദിക്കുന്നവർ സംഘടനയിൽ ഏറ്റുമുട്ടുന്നുവെന്ന വിശകലനങ്ങളും ഉയരുന്നുണ്ട്. 

തിരുവനന്തപുരം: യൂത്ത് കോൺഗ്രസ് പ്രസിഡന്റ് തെരഞ്ഞെടുപ്പിൽ രാഹുൽ മാങ്കൂട്ടത്തിനെതിരെ അബിൻ വർക്കി മത്സര രം​ഗത്ത്. എ ​ഗ്രൂപ്പ് സ്ഥാനാർത്ഥിയായി രാഹുൽ മാങ്കൂട്ടത്തിൽ എത്തുമ്പോൾ ഐ ​ഗ്രൂപ്പ് സ്ഥാനാർത്ഥിയായി എത്തുന്നത് അബിൻ വർക്കിയാണ്. അബിൻ വർക്കിയുടെ സ്ഥാനാർത്ഥിത്വവുമായി ബന്ധപ്പെട്ട് ഇന്ന് അന്തിമമായ തീരുമാനം ഉണ്ടാവും. നോമിനേഷൻ കൊടുക്കേണ്ട അവസാന തിയ്യതി ഇന്നാണ്. അതേസമയം, ചാനലുകളിൽ പാർട്ടിക്ക് വേണ്ടി വാദിക്കുന്നവർ സംഘടനയിൽ ഏറ്റുമുട്ടുന്നുവെന്ന വിശകലനങ്ങളും ഉയരുന്നുണ്ട്. 

നേരത്തെ, കെസി വേണു​ഗോപാൽ പക്ഷത്തിൽ നിന്ന് ബിനു ചുള്ളിയിൽ നോമിനേഷൻ കൊടുക്കുമെന്ന് റിപ്പോർട്ടുകളുണ്ടായിരുന്നു. എന്നാൽ എ,ഐ ​ഗ്രൂപ്പുകൾ നേരിട്ട് ഏറ്റുമുട്ടുന്ന സാഹചര്യത്തിൽ ബിനു ചുള്ളിയിൽ പിൻവാങ്ങുകയായിരുന്നു. ഇത് ​വലിയ രീതിയിൽ പാർട്ടിക്ക് തിരിച്ചടിയുണ്ടാക്കുമെന്ന തിരിച്ചറിവിൽ നിന്നാണ് പിൻമാറ്റമുണ്ടായത്. 

ഷാഫി പറമ്പില്‍ മുന്നോട്ടുവച്ച രാഹുല്‍ മാങ്കൂട്ടത്തെ പിന്തുണയ്ക്കാന്‍ എ ഗ്രൂപ്പ് നേതൃത്വം ആദ്യം തയ്യാറായിരുന്നില്ല. വിഡി സതീശനോട് അടുപ്പം പുലര്‍ത്തുന്ന യുവജനനേതാവാണ് എന്നതിലാണ് എ ഗ്രൂപ്പിന് അതൃപ്തിയുണ്ടായിരുന്നത്. നീണ്ട ചർച്ചകൾക്കൊടുവിലാണ് മാങ്കൂട്ടത്തിന്റെ പേരിലേക്കെത്തുന്നത്. ഐ ഗ്രൂപ്പിന്റെ അബിന്‍ വര്‍ക്കിക്ക് കെപിസിസി പ്രസിഡന്‍റ് കെ.സുധാകരന്‍റെ കൂടി പിന്തുണ ഐ ഗ്രൂപ്പ് പ്രതീക്ഷിക്കുന്നുണ്ട്.  മത്സരം ഉറപ്പായ പശ്ചാത്തലത്തില്‍ സംസ്ഥാന കോണ്‍ഗ്രസിലെ ഗ്രൂപ്പുകളുടെ ശക്തിപ്രകടനമാവും യൂത്തുകോണ്‍ഗ്രസ് പുനസംഘടനയില്‍ തെളിഞ്ഞുകാണുക. പുതിയ സാഹചര്യത്തില്‍, മാറിമറിഞ്ഞ ഗ്രൂപ്പ് സമവാക്യങ്ങളില്‍ ആര്‍ക്ക് വിജയമെന്നത് പ്രവചിക്കുകയും പ്രയാസമാണ്.