18 വർഷം ഹോൺ മുഴക്കാതെ വളയം പിടിച്ച ഡ്രൈവറെ തേടിയെത്തിയ അംഗീകാരം

വാഹനങ്ങൾ നിറഞ്ഞ ഒരു റോഡിൽ നിശബ്​ദാവസ്​ഥ നിങ്ങൾക്ക്​ സങ്കൽപ്പിക്കാനാകുമോ? ദീപക്​ ദാസ്​ എന്ന കൊൽ​കൊത്തക്കാരൻ ഡ്രൈവർ അത്​ നേടാനാകുമെന്ന്​ വിശ്വസിക്കുന്നു. കഴിഞ്ഞ 18 വർഷമായി റോഡിൽ ഹോൺ മുഴക്കാതെ വാഹനമോടിച്ച ദീപക്​ ദാസിനെ തേടിയെത്തിയത്​ മുനഷ്​ സൻമാൻ അവാർഡാണ്​.  ദീപക്​ അപൂർവവും സവിശേഷവുമായ സ്വഭാവഗുണങ്ങളുള്ള വ്യക്​തിയാണെന്ന്​ മനുഷ്​ മേള സംഘാടകർ വിലയിരുത്തി.

ദീപകുമായി കഴിഞ്ഞ 18 വർഷമായി ബന്ധ​മുള്ളവരിൽ നിന്ന്​ അഭിപ്രായം ശേഖരിച്ച്​ കൂടിയാണ്​ അവാർഡിനായി തെരഞ്ഞെടുത്തത്​. തബല വിദ്വാൻ തൻമയ്​ ബോസ്​, ഗിറ്റാറിസ്​റ്റ്​ കുനാൽ എന്നിവർക്കൊപ്പമാണ്​ ഡ്രൈവറായ ദീപകും ആദരിക്കപ്പെടുന്നത്​. ശബ്​ദ മലിനീകരണം ഇല്ലാതാക്കാൻ നടത്തിയ ​ശ്രമങ്ങൾ മുൻനിർത്തിയാണ്​ ഇൗ പുരസ്​ക്കാരം. ഹോൺ വിരുദ്ധ നയത്തിൽ വിശ്വസിക്കുന്ന ദീപക്​ മറ്റുള്ളവരെ അതിനായി ​പ്രേരിപ്പിക്കുകയും ചെയ്യുന്നു. 

ഹോൺ ​മുഴക്കാത്ത ഡ്രൈവർ ​വാഹനമോടിക്കു​മ്പോള്‍ കൂടുതൽ ശ്രദ്ധാലുവായിരിക്കുമെന്ന്​ ദീപക്​ പറയുന്നു. സ്​ഥലം, ​വേഗത, സമയം എന്നിവയെക്കുറിച്ച്​ ഡ്രൈവർക്ക്​ കൃത്യമായ ധാരണയുണ്ടെങ്കിൽ ഹോൺ മുഴക്കേണ്ട ആവശ്യമില്ല. യാത്രക്കാർ ഹോൺ മുഴക്കാൻ പറയാറുണ്ട്​. അതുകൊണ്ട്​ പ്രശ്​നം പരിഹരിക്കപ്പെടുകയില്ലെന്ന മറുപടിയാണ്​ അവരോട്​ ദീപക്​ പറയാറുള്ളത്​. 

‘ഹോൺ ഒരു സങ്കൽപ്പമാണ്​, ഞാൻ നിങ്ങളുടെ ഹൃദയത്തിന്​ വേണ്ടി സൂക്ഷ്​മത പുലർത്തുന്നു’ എന്ന പ്ലക്കാർഡുമായാണ്​ ദീപകി​ന്‍റെ കാർ ഒാടുന്നത്​. ഡാർജിലിങ്​, സിക്കിം എന്നിവിടങ്ങളിലേക്ക്​ ഉൾപ്പെടെയുള്ള ദീർഘയാത്രകളിൽ പോലും ഹോൺ മുഴക്കാത്ത ദീപകി​ന്‍റെ സ്വപ്​നം കൊൽക്കത്ത ഹോൺ മുഴക്കാത്ത നഗരമവയി മാറുമെന്നാണ്​. അവാർഡിനു ദീപക്​ സ്വാഭാവികമായി തന്നെ അർഹനാവുകയായിരുന്നെന്നാണ്​ മനുഷ്​മേള അധികൃതർ പറയുന്നത്​.