ഉറക്കം പോലും ഒരു ആഡംബരം! എന്താണ് സോഷ്യൽ മീഡിയയിൽ തരംഗമാകുന്ന ജെൻ സിയുടെ 'ബെഡ്‌ടൈം സ്റ്റാക്കിംഗ്'?

ഇന്നത്തെ കാലത്ത് ഓരോ ദിവസവും ഓരോ പുതിയ ട്രെൻഡുകളാണ് സോഷ്യൽ മീഡിയയിൽ പിറവിയെടുക്കുന്നത്. മിക്കവയും നമ്മുടെ ജീവിതശൈലിയെ തന്നെ മാറ്റിമറിക്കുന്നവയാണ്. അത്തരത്തിൽ ഇപ്പോൾ സോഷ്യൽ മീഡിയയിൽ തരംഗമായി മാറിക്കൊണ്ടിരിക്കുന്ന ഒന്നാണ് 'ബെഡ്‌ടൈം സ്റ്റാക്കിംഗ്'. 

സോഷ്യൽ മീഡിയയിലെ പുതിയ ട്രെൻഡുകളുടെ കാര്യത്തിൽ ജെൻ സി പിള്ളേരെ സമ്മതിച്ചു കൊടുക്കണം. ഓരോ ദിവസവും ലൈഫ് സ്റ്റൈൽ മാറ്റുന്ന തരത്തിലുള്ള വല്ലാത്തൊരു വൈബാണ് അവർ കൊണ്ടുവരുന്നത്. ഇപ്പോൾ ടിക് ടോക്കിലും ഇൻസ്റ്റാഗ്രാമിലും തരംഗമായി മാറിക്കൊണ്ടിരിക്കുന്ന പുതിയൊരു ട്രെൻഡാണ് 'ബെഡ്‌ടൈം സ്റ്റാക്കിംഗ്'. കിടപ്പുമുറി എന്നാൽ വെറും ഉറങ്ങാനുള്ള ഒരിടം മാത്രമല്ല, മറിച്ച് സെൽഫ് കെയറിനും, റിലാക്സേഷനും, ക്രിയേറ്റിവിറ്റിക്കുമുള്ള ഒരു 'ഓൾ-ഇൻ-വൺ' സ്പേസാക്കി മാറ്റുകയാണ് ഈ പുത്തൻ ശീലത്തിലൂടെ. പ്രത്യേകിച്ചും യുവതികൾക്കിടയിലാണ് ഈ 'ബെഡ് വൈബ്' തരംഗമാകുന്നത്.

എന്താണ് ബെഡ്‌ടൈം സ്റ്റാക്കിംഗ്?

സാധാരണയായി നമ്മൾ ഉറങ്ങാൻ പോകുന്നതിന് മുൻപ് ബെഡ്‌സൈഡ് ടേബിളിൽ ഒരു ഗ്ലാസ് വെള്ളമോ അല്ലെങ്കിൽ ഒരു പുസ്തകമോ മാത്രമാണ് വെക്കാറുള്ളത്. എന്നാൽ ബെഡ്‌ടൈം സ്റ്റാക്കിംഗിൽ കഥ മാറുന്നു. ഉറങ്ങാൻ കിടക്കുന്നതിന് മുൻപ് തന്നെ തനിക്ക് ആവശ്യമുള്ള സകല സാധനങ്ങളും ബെഡിൽ അല്ലെങ്കിൽ ബെഡിന് അരികിൽ അടുക്കി വെക്കുന്ന രീതിയാണിത്. ജേണലുകൾ, പുസ്തകങ്ങൾ, ചർമ്മ സംരക്ഷണത്തിനുള്ള ബ്യൂട്ടി പ്രോഡക്റ്റുകൾ, ലഘുഭക്ഷണങ്ങൾ, ലാപ്ടോപ്പ്, ഐപാഡ് എന്നിങ്ങനെ ഒരാൾക്ക് വൈകുന്നേരങ്ങളിൽ ചെയ്യാൻ ആഗ്രഹമുള്ള കാര്യങ്ങളെല്ലാം ഇതിൽ ഉൾപ്പെടും.

ഒരിക്കൽ ബെഡിൽ കയറി ഇരുന്നാൽ പിന്നെ എഴുന്നേൽക്കാതെ തന്നെ വായനയും ഭക്ഷണവും സ്കിൻ കെയറും ഒക്കെ ഒരുമിച്ച് കൊണ്ടുപോകാം എന്നതാണ് ഇതിന്റെ ഹൈലൈറ്റ്. ടിക് ടോക്കിലെ സ്വീഡിഷ് ആർട്ടിസ്റ്റായ ലിനിയ ഫാം പങ്കുവെച്ച വീഡിയോയിലൂടെയാണ് ഈ ട്രെൻഡ് കൂടുതൽ ശ്രദ്ധിക്കപ്പെട്ടത്. താൻ നേരത്തെ ബെഡിൽ കയറുമെന്നും പിന്നെ അവിടെ നിന്നും എഴുന്നേൽക്കാതെ ചെയ്യാൻ പറ്റുന്ന കാര്യങ്ങളെല്ലാം ചെയ്യുമെന്നുമാണ് ലിനിയ പറയുന്നത്.

ഹാബിറ്റ് സ്റ്റാക്കിംഗിൽ നിന്നുള്ള പ്രചോദനം

'ഹാബിറ്റ് സ്റ്റാക്കിംഗ്' എന്ന ആശയത്തിൽ നിന്നാണ് ബെഡ്‌ടൈം സ്റ്റാക്കിംഗ് ഉടലെടുത്തത്. ചെറിയ ചെറിയ നല്ല ശീലങ്ങളെ ഒന്നിനുപുറകെ ഒന്നായി ക്രമീകരിച്ച് അവ നമ്മുടെ ദിനചര്യയുടെ ഭാഗമാക്കുന്ന രീതിയാണിത്. വായന, ഡയറി എഴുതുക, ചർമ്മം സംരക്ഷിക്കുക, പ്ലാനിംഗ് തുടങ്ങിയ കാര്യങ്ങൾക്കായി പ്രത്യേകം സമയം കണ്ടെത്താതെ, ഉറങ്ങുന്നതിന് മുൻപുള്ള ഒരു നിശ്ചിത സമയത്ത് ഇവയെല്ലാം ഒരുമിച്ച് ഒരു അനുഷ്ഠാനമായി മാറ്റുകയാണ് ബെഡ്‌ടൈം സ്റ്റാക്കിംഗിലൂടെ ചെയ്യുന്നത്.

ബെഡ്‌ടൈം സ്റ്റാക്കിംഗിൽ എന്തൊക്കെ ഉണ്ടാകും?

ഈ ട്രെൻഡ് പിന്തുടരുന്നവരുടെ ബെഡിൽ സാധാരണയായി ഉണ്ടാകുന്ന ചില കാര്യങ്ങൾ:

• വായനയ്ക്കും എഴുത്തിനും: പുസ്തകങ്ങൾ, കിൻഡിൽ, ജേണലുകൾ, പേനകൾ.

• വിനോദത്തിന്: ലാപ്ടോപ്പ്, ഐപാഡ് (ഡിജിറ്റൽ മാഗസിനുകൾക്കോ പസിൽ ഗെയിമുകൾക്കോ വേണ്ടി), ടിവി റിമോട്ട്.
• സെൽഫ് കെയറിന്: ഹാൻഡ് ക്രീമുകൾ, ഫേസ് മാസ്ക്, നെക്ക് മസാജർ.
• ഭക്ഷണത്തിന്: കുപ്പി വെള്ളം, ചിപ്‌സ് പോലുള്ള ലഘുഭക്ഷണങ്ങൾ (ഇതിനെ ബെഡ് സ്നാക്കിംഗ് എന്നാണ് വിളിക്കുന്നത്.

എന്തിനാണ് ജെൻ സികൾ ഈ ട്രെൻഡ് ഏറ്റെടുക്കുന്നത്?

പഴയകാലത്തെ മിനിമലിസ്റ്റ് രീതികളിൽ നിന്നും മാറി 'മാക്സിമലിസം' ഇഷ്ടപ്പെടുന്നവരാണ് ജെൻ സി. എല്ലാം അടുക്കും ചിട്ടയോടും കൂടി ഇരിക്കുന്നതിനേക്കാൾ, തനിക്ക് ഇഷ്ടപ്പെട്ട കാര്യങ്ങൾ തനിക്ക് ചുറ്റും ചിതറിക്കിടക്കുന്നത് ഇവർ ഇഷ്ടപ്പെടുന്നു. ഇതിനെ 'മെസ്സി കൂൾ ഗേൾ ലുക്ക്' എന്നും വിശേഷിപ്പിക്കാറുണ്ട്. മാത്രമല്ല, ഇന്നത്തെ തിരക്കുപിടിച്ച ലോകത്ത് റിലാക്സ് ചെയ്യുമ്പോൾ പോലും ഉൽപ്പാദനക്ഷമത നിലനിർത്തണം എന്ന സമ്മർദ്ദം യുവാക്കൾക്കിടയിലുണ്ട്. വിശ്രമത്തോടൊപ്പം തന്നെ വായനയും പ്ലാനിംഗും നടക്കുന്നുണ്ടെന്ന് ഉറപ്പാക്കാൻ ഈ രീതി അവരെ സഹായിക്കുന്നു. ഇത് വെറുമൊരു മടി അല്ല, മറിച്ച് വളരെ ശ്രദ്ധയോടും വ്യക്തമായ പ്ലാനിംഗോടും കൂടി ചെയ്യുന്ന ഒരു ശീലമാണെന്ന് ഈ ട്രെൻഡിന്റെ വക്താക്കൾ പറയുന്നു.

മാനസിക സമ്മർദ്ദം കുറയ്ക്കാൻ ബെഡ്‌ടൈം സ്റ്റാക്കിംഗ് സഹായിക്കുമെന്ന് ഒരു വിഭാഗം വിശ്വസിക്കുന്നു. പുറംലോകത്തെ ബഹളങ്ങളിൽ നിന്നും മാറി സ്വന്തം ബെഡിൽ തനിക്ക് ഏറ്റവും സന്തോഷം നൽകുന്ന കാര്യങ്ങളുമായി സമയം ചെലവഴിക്കുന്നത് ഒരുതരം 'കോസി' ഫീലിംഗ് നൽകുന്നു. ഇത് നല്ല ഉറക്കത്തിലേക്ക് നയിക്കുമെന്നും അവർ അവകാശപ്പെടുന്നു. ചുരുക്കത്തിൽ, ബെഡ്‌ടൈം സ്റ്റാക്കിംഗ് എന്നത് വെറുമൊരു താൽക്കാലിക ട്രെൻഡല്ല. അത് വിശ്രമത്തെയും സ്വയം പരിചരണത്തെയും പുനർനിർവചിക്കുന്ന പുതിയ തലമുറയുടെ രീതിയാണ്.