ഓയിൽ ക്ലെൻസറോ വാട്ടർ ക്ലെൻസറോ? നിങ്ങളുടെ ചർമ്മത്തിന് യോജിച്ച 'ക്ലെൻസർ' എങ്ങനെ തിരഞ്ഞെടുക്കാം; അറിയേണ്ട കാര്യങ്ങൾ

സുന്ദരവും ആരോഗ്യവുമുള്ള ചർമ്മം ആഗ്രഹിക്കാത്തവർ ആരുമുണ്ടാകില്ല. ഇതിനായി പലതരം സൗന്ദര്യവർദ്ധക വസ്തുക്കൾ നാം പരീക്ഷിക്കാറുണ്ട്. എന്നാൽ ചർമ്മസംരക്ഷണത്തിന്റെ അടിസ്ഥാനം എന്നത് മുഖം കൃത്യമായി വൃത്തിയാക്കുക അഥവാ 'ക്ലെൻസിംഗ്' ചെയ്യുക എന്നതാണ്. 

ചർമ്മസംരക്ഷണത്തിൽ ഏറ്റവും പ്രധാനപ്പെട്ട ഘട്ടമാണ് ക്ലെൻസിംഗ് അഥവാ മുഖം വൃത്തിയാക്കൽ. എന്നാൽ ഇന്ന് വിപണിയിൽ എണ്ണമറ്റ ക്ലെൻസറുകൾ ലഭ്യമാണ്. പ്രധാനമായും ഓയിൽ ബേസ്ഡ് , വാട്ടർ ബേസ്ഡ് എന്നിങ്ങനെ രണ്ട് വിഭാഗങ്ങളിലായാണ് ഇവയെ തിരിക്കാറുള്ളത്. പലപ്പോഴും ഇവ തമ്മിലുള്ള വ്യത്യാസം തിരിച്ചറിയാതെ തെറ്റായ ഉൽപ്പന്നങ്ങൾ തിരഞ്ഞെടുക്കുന്നത് ചർമ്മത്തിന് ദോഷം ചെയ്തേക്കാം. ഇവ രണ്ടും തമ്മിലുള്ള പ്രധാന വ്യത്യാസങ്ങളും അവയുടെ ഗുണദോഷങ്ങളും വിശദമായി പരിശോധിക്കാം.

എന്താണ് ഓയിൽ ക്ലെൻസർ?

എണ്ണയിൽ ലയിക്കുന്ന അഴുക്കുകളെ നീക്കം ചെയ്യാനാണ് ഓയിൽ ക്ലെൻസറുകൾ ഉപയോഗിക്കുന്നത്. സസ്യങ്ങളിൽ നിന്നോ മറ്റോ വേർതിരിച്ചെടുക്കുന്ന എണ്ണകൾ പ്രധാന ചേരുവയായി വരുന്ന ഇവ ചർമ്മത്തിലെ കഠിനമായ അഴുക്കുകളെ അലിയിച്ചു കളയുന്നു. നമ്മുടെ ചർമ്മം ഉല്പാദിപ്പിക്കുന്ന എണ്ണയെയും, നാം ഉപയോഗിക്കുന്ന വാട്ടർപ്രൂഫ് മേക്കപ്പിനെയും, സൺസ്‌ക്രീനിലെ ഘടകങ്ങളെയും ഓയിൽ ക്ലെൻസർ വേഗത്തിൽ അലിയിക്കുന്നു.

വരണ്ട ചർമ്മമുള്ളവർക്കും കനത്ത രീതിയിൽ മേക്കപ്പ് ഉപയോഗിക്കുന്നവർക്കും ഇത് മികച്ചതാണ്. ചർമ്മത്തിലെ സ്വാഭാവിക ഈർപ്പം നിലനിർത്താൻ ഇവ സഹായിക്കുന്നു. ഇത് ചർമ്മത്തെ വലിഞ്ഞുമുറുക്കില്ല . കഠിനമായി തേച്ചുരയ്ക്കാതെ തന്നെ മേക്കപ്പ് നീക്കം ചെയ്യാം.

എന്താണ് വാട്ടർ ബേസ്ഡ് ക്ലെൻസർ?

വെള്ളം പ്രധാന ചേരുവയായി വരുന്ന ഇവ സാധാരണ ഫേസ് വാഷുകളായിട്ടാണ് അറിയപ്പെടുന്നത്. ഇവ ജെൽ രൂപത്തിലോ ഫോം രൂപത്തിലോ ലഭ്യമാണ്. വെള്ളത്തിൽ ലയിക്കുന്ന അഴുക്കുകൾ, വിയർപ്പ്, പരിസ്ഥിതിയിലെ പൊടിപടലങ്ങൾ എന്നിവ നീക്കം ചെയ്യാനാണ് വാട്ടർ ക്ലെൻസറുകൾ മികച്ചത്. ചർമ്മത്തിലെ ബാക്ടീരിയകളെയും മറ്റ് മാലിന്യങ്ങളെയും ഇവ ആഴത്തിൽ വൃത്തിയാക്കുന്നു. എണ്ണമയമുള്ള ചർമ്മമുള്ളവർക്കും, മുഖക്കുരുവിന് സാധ്യതയുള്ളവർക്കും വാട്ടർ ക്ലെൻസറുകളാണ് കൂടുതൽ അനുയോജ്യം. മുഖത്തെ എണ്ണമയം പൂർണ്ണമായും നീക്കി ഉന്മേഷം നൽകുന്നു. സുഷിരങ്ങൾക്കുള്ളിലെ അഴുക്ക് കളയാൻ ഇവ സഹായിക്കുന്നു.

ഓയിൽ വേഴ്സസ് വാട്ടർ: പ്രധാന വ്യത്യാസങ്ങൾ

ഓയിൽ ക്ലെൻസറുകൾ ചർമ്മത്തിന് മുകളിലെ 'എണ്ണമയമുള്ള' മാലിന്യങ്ങളെ നീക്കം ചെയ്യുമ്പോൾ, വാട്ടർ ക്ലെൻസറുകൾ ചർമ്മത്തിലെ 'ജലാംശമുള്ള' മാലിന്യങ്ങളെയാണ് നീക്കം ചെയ്യുന്നത്. വെറുമൊരു വാട്ടർ ക്ലെൻസർ ഉപയോഗിച്ച് വാട്ടർപ്രൂഫ് സൺസ്‌ക്രീനോ മേക്കപ്പോ പൂർണ്ണമായി നീക്കാൻ സാധിക്കില്ല. അതുപോലെ, വിയർപ്പും പൊടിയും നീക്കം ചെയ്യാൻ ഓയിൽ ക്ലെൻസർ മാത്രം ഉപയോഗിക്കുന്നത് പൂർണ്ണമായ ഫലം നൽകില്ല.

നിങ്ങളുടെ ദൈനംദിന ശീലങ്ങൾ അനുസരിച്ച് വേണം ഇത് തീരുമാനിക്കാൻ. നിങ്ങൾ സൺസ്‌ക്രീനോ മേക്കപ്പോ ഉപയോഗിക്കുന്ന ആളാണെങ്കിൽ രാത്രിയിൽ ഒരു ഓയിൽ ക്ലെൻസർ അത്യാവശ്യമാണ്. എന്നാൽ രാവിലെ മുഖം കഴുകാൻ ഒരു ലൈറ്റ് വാട്ടർ ബേസ്ഡ് ക്ലെൻസർ മാത്രം മതിയാകും. അമിതമായി വാട്ടർ ക്ലെൻസർ ഉപയോഗിക്കുന്നത് ചർമ്മത്തിലെ സ്വാഭാവിക സുരക്ഷാ പാളിയെ തകരാറിലാക്കുമെന്ന കാര്യം മറക്കരുത്.