ഗ്ലാസ് സ്കിൻ വേണോ? നമ്മുടെ സ്വന്തം രക്തചന്ദനം മതി! ജെൻ സികൾ അറിഞ്ഞിരിക്കേണ്ട ബ്യൂട്ടി സീക്രട്ട്സ്

കെമിക്കൽ നിറഞ്ഞ സിറങ്ങളോടും വിദേശ സ്കിൻകെയർ ബ്രാൻഡുകളോടുമുള്ള പ്രിയം പതിയെ കുറഞ്ഞുവരികയാണ്. പകരം, പ്രകൃതിദത്തമായ 'ക്ലീൻ ബ്യൂട്ടി'  ട്രെൻഡിലേക്കാണ് പുതിയ തലമുറ ചുവടുവെക്കുന്നത്.

കെമിക്കൽ നിറച്ച വിലകൂടിയ സിറങ്ങളോടും വിദേശ സ്കിൻകെയർ ബ്രാൻഡുകളോടുമുള്ള പ്രിയം പതിയെ കുറഞ്ഞുവരികയാണ്. പകരം, പ്രകൃതിദത്തമായ 'ക്ലീൻ ബ്യൂട്ടി' ട്രെൻഡിലേക്കാണ് പുതിയ തലമുറ ചുവടുവെക്കുന്നത്. ഈ ട്രെൻഡിൽ ഇപ്പോൾ മുൻപന്തിയിലുള്ളത് നമ്മുടെ മുത്തശ്ശിമാരുടെ പഴയകാല സൗന്ദര്യക്കൂട്ടായ രക്തചന്ദനമാണ്.

രക്തചന്ദനം ഒരു മരം മാത്രമല്ല, ഒരു മജിക് ഡസ്റ്റ് ആണെന്ന് തന്നെ പറയാം. ഇൻസ്റ്റാഗ്രാം ഫിൽട്ടറുകൾ ഇല്ലാതെ തന്നെ തിളങ്ങുന്ന ചർമ്മം ആഗ്രഹിക്കുന്ന ജെൻ സികൾക്ക് രക്തചന്ദനം എങ്ങനെയൊക്കെ ഉപകാരപ്പെടുമെന്ന് നോക്കാം.

മുഖക്കുരുവിനോട് പറയാം ഗുഡ്‌ബൈ

ഇന്നത്തെ പൊടിയും പുകയും നിറഞ്ഞ അന്തരീക്ഷത്തിൽ ജെൻ സികൾ നേരിടുന്ന ഏറ്റവും വലിയ വെല്ലുവിളിയാണ് മുഖക്കുരുവും അത് കഴിഞ്ഞ് വരുന്ന കറുത്ത പാടുകളും. രക്തചന്ദനത്തിലെ ആന്റി-ബാക്ടീരിയൽ ഗുണങ്ങൾ ചർമ്മത്തിലെ ബാക്ടീരിയകളെ നീക്കം ചെയ്യുകയും വീക്കം കുറയ്ക്കുകയും ചെയ്യുന്നു. ഇത് പതിവായി ഉപയോഗിക്കുന്നത് മുഖക്കുരു തടയാൻ മാത്രമല്ല, പാടുകൾ പതുക്കെ മാഞ്ഞുപോകാനും സഹായിക്കുന്നു.

വീക്കെൻഡ് ട്രിപ്പുകളും ഔട്ട്ഡോർ ഫോട്ടോഷൂട്ടുകളും കഴിഞ്ഞു വരുമ്പോൾ സ്കിൻ ആകെ കരിവാളിച്ചിട്ടുണ്ടോ? എങ്കിൽ ഉടനെ തന്നെ അല്പം രക്തചന്ദനം ഉപയോഗിച്ചു നോക്കൂ. വെയിൽ കൊണ്ടുള്ള കരുവാളിപ്പ് മാറ്റാൻ ഇതിനേക്കാൾ മികച്ച മറ്റൊരു നാച്ചുറൽ റെമഡി ഇല്ലെന്ന് തന്നെ പറയാം. ഇത് ചർമ്മത്തിന് നല്ലൊരു കുളിർമ്മ നൽകുകയും ചർമ്മത്തിന്റെ സ്വാഭാവിക നിറം നിലനിർത്തുകയും ചെയ്യുന്നു.

ഓയിലി സ്കിൻ പ്രശ്നമാണോ?

ചർമ്മത്തിലെ അമിതമായ എണ്ണമയം കാരണം മേക്കപ്പ് അധികനേരം നിൽക്കാത്തതും മുഖം എപ്പോഴും എണ്ണമയമുള്ളതായി ഇരിക്കുന്നതും പലരെയും അലോസരപ്പെടുത്താറുണ്ട്. രക്തചന്ദനം ഉപയോഗിക്കുന്നതിലൂടെ ചർമ്മത്തിലെ സെബം ഉൽപ്പാദനം നിയന്ത്രിക്കാൻ സാധിക്കും. ഇത് ചർമ്മത്തെ ഡ്രൈ ആക്കാതെ തന്നെ ഫ്രഷ് ആയി നിലനിർത്താൻ സഹായിക്കുന്നു.

എങ്ങനെ ഉപയോഗിക്കണം?

രക്തചന്ദനം ഉപയോഗിക്കുമ്പോൾ നിങ്ങളുടെ സ്കിൻ ടൈപ്പിന് അനുയോജ്യമായ രീതിയിൽ ഉപയോഗിക്കാൻ ശ്രദ്ധിക്കണം. ചർമ്മം വല്ലാതെ ഡ്രൈ ആണെങ്കിൽ രക്തചന്ദനം പാലിന്റെയോ വെളിച്ചെണ്ണയുടെയോ കൂടെ മിക്സ് ചെയ്ത് ഉപയോഗിക്കുന്നതാണ് നല്ലത്. എണ്ണമയമുള്ള ചർമ്മമാണെങ്കിൽ അല്പം നാരങ്ങാനീരോ റോസ് വാട്ടറോ ചേർക്കാം. പ്രായമാകലിന്റെ ലക്ഷണങ്ങൾ തടയാനും ചർമ്മത്തിന് നല്ലൊരു ഇലാസ്തികത നൽകാനും ഇതിലെ ആന്റി-ഓക്സിഡന്റുകൾ സഹായിക്കുന്നു.

വാങ്ങുമ്പോൾ ശ്രദ്ധിക്കാൻ

പലപ്പോഴും വിപണിയിൽ ചായം ചേർത്ത വ്യാജ രക്തചന്ദനപ്പൊടികൾ ലഭ്യമാണ്. ഇവ ഉപയോഗിക്കുന്നത് ചർമ്മത്തിന് ഗുണത്തേക്കാളേറെ ദോഷം ചെയ്യും. അതിനാൽ വിശ്വസനീയമായ ആയുർവേദ ഷോപ്പുകളിൽ നിന്നോ ബ്രാൻഡുകളിൽ നിന്നോ മാത്രം ശുദ്ധമായ രക്തചന്ദനം വാങ്ങാൻ ശ്രദ്ധിക്കുക.

ചുരുക്കത്തിൽ, രാസവസ്തുക്കളില്ലാത്ത, പാർശ്വഫലങ്ങളില്ലാത്ത ഒരു സൗന്ദര്യ സംരക്ഷണമാണ് നിങ്ങൾ ആഗ്രഹിക്കുന്നതെങ്കിൽ രക്തചന്ദനം നിങ്ങളുടെ ബെസ്റ്റ് ഫ്രണ്ട് ആയിരിക്കും. വരും ദിവസങ്ങളിൽ നിങ്ങളുടെ സ്കിൻകെയർ റുട്ടീനിൽ രക്തചന്ദനം കൂടി ഒന്ന് ഉൾപ്പെടുത്തി നോക്കൂ..