ഫൗണ്ടേഷന് മുൻപേ കോണ്ടൂറിംഗ്; സോഷ്യൽ മീഡിയയിൽ തരംഗമായി 'അണ്ടർപെയിന്റിംഗ്' മേക്കപ്പ് ട്രെൻഡ്

ഇത്രയും കാലം നമ്മൾ മേക്കപ്പ് ഇട്ടിരുന്നത് വെറും വേസ്റ്റ് ആയിരുന്നോ? കേൾക്കുമ്പോൾ കലിപ്പ് വരുമെങ്കിലും സംഗതി സത്യമാണ്. നമ്മൾ ആദ്യം ഫൗണ്ടേഷൻ അടിച്ചു വാരിത്തേക്കും, എന്നിട്ട് അതിന്റെ മുകളിൽ കളർ വരാൻ ബ്ലഷും കോണ്ടൂറും ഒക്കെ തേച്ചുപിടിപ്പിക്കും..

മേക്കപ്പ് ലോകത്ത് ഇപ്പോൾ ഏറ്റവും കൂടുതൽ ചർച്ച ചെയ്യപ്പെടുന്ന ഒന്നാണ് 'അണ്ടർപെയിന്റിംഗ്' എന്ന ടെക്നിക്ക്. വർഷങ്ങളായി നമ്മൾ പിന്തുടർന്നു പോന്ന മേക്കപ്പ് രീതികളെ പൂർണ്ണമായും മാറ്റുന്ന ഒന്നാണിത്. സാധാരണയായി ഫൗണ്ടേഷൻ ഇട്ടതിന് ശേഷമാണ് നമ്മൾ കോണ്ടൂറിംഗും ബ്ലഷും ചെയ്യാറുള്ളത്. എന്നാൽ ഇതിൽ നിന്നും വ്യത്യസ്തമായി, ഫൗണ്ടേഷന് മുൻപേ ഇവ മുഖത്ത് പുരട്ടുന്ന രീതിയാണിത്. ഹെവി മേക്കപ്പ് ഇല്ലാതെ തന്നെ ചർമ്മത്തിന് ഒരു 'നാച്ചുറൽ ഫിനിഷ്' നൽകാൻ ഈ രീതി സഹായിക്കുമെന്നാണ് വിദഗ്ധർ പറയുന്നത്. ഇതിന്റെ കൂടുതൽ വിശേഷങ്ങൾ നോക്കാം.

എന്താണ് അണ്ടർപെയിന്റിംഗ്?

പ്രശസ്ത മേക്കപ്പ് ആർട്ടിസ്റ്റായ മേരി ഫിലിപ്സ് വഴിയാണ് ഈ രീതി ആഗോളതലത്തിൽ ശ്രദ്ധിക്കപ്പെട്ടത്. ഹെയ്‌ലി ബീബർ, കെൻഡൽ ജെന്നർ തുടങ്ങിയ സെലിബ്രിറ്റികളുടെ ആരും കൊതിക്കുന്ന ഗ്ലോയി ലുക്കിന് പിന്നിലെ രഹസ്യം ഇതാണ്. ചർമ്മത്തിന് മുകളിൽ നിറങ്ങൾ തേച്ചുപിടിപ്പിക്കുന്നതിന് പകരം, ചർമ്മത്തിന് ഉള്ളിൽ നിന്ന് നിറങ്ങൾ പുറത്തേക്ക് വരുന്ന ഒരു ഇഫക്റ്റ് അഥവാ 'ഗ്ലോ ഫ്രം വിതിൻ' ഇത് നൽകുന്നു.

ചെയ്യേണ്ട രീതി:

ഈ രീതിയിൽ മേക്കപ്പ് അപ്ലൈ ചെയ്യുന്നത് താഴെ പറയുന്ന ഘട്ടങ്ങളിലായാണ്:

• പ്രൈമർ: ആദ്യം ചർമ്മം നന്നായി മോയ്സ്ചറൈസ് ചെയ്ത ശേഷം ഒരു നല്ല പ്രൈമർ ഉപയോഗിക്കുക.
• കോണ്ടൂറിംഗ് ആൻഡ് ഹൈലൈറ്റിംഗ്: ഫൗണ്ടേഷൻ ഇടുന്നതിന് മുൻപായി കവിൾത്തടങ്ങളിലും നെറ്റിയിലും കോണ്ടൂർ ചെയ്യുക. കണ്ണിന് താഴെയും ആവശ്യമുള്ള ഇടങ്ങളിൽ കൺസീലറും നൽകുക.

• ബ്ലഷ്: ഇതിനൊപ്പം തന്നെ ബ്ലഷും അപ്ലൈ ചെയ്യാം. ക്രീം അല്ലെങ്കിൽ ലിക്വിഡ് പ്രോഡക്റ്റുകൾ ഉപയോഗിക്കുന്നതാണ് അണ്ടർപെയിന്റിംഗിന് ഏറ്റവും അനുയോജ്യം.
• ഫൗണ്ടേഷൻ : അവസാനമായി ഒരു ഷീർ അല്ലെങ്കിൽ ലൈറ്റ്-കവറേജ് ഫൗണ്ടേഷൻ ഇതിനു മുകളിലായി അപ്ലൈ ചെയ്യുക. ഒരു ബ്യൂട്ടി ബ്ലെൻഡർ ഉപയോഗിച്ച് പതുക്കെ ഡാബ് ചെയ്താൽ അടിയിലുള്ള നിറങ്ങൾ മങ്ങാതെ തന്നെ ഒരു സീംലെസ്സ് ലുക്ക് ലഭിക്കും.

പ്രധാന ഗുണങ്ങൾ:

• നോ-മേക്കപ്പ് ലുക്ക്: ഫൗണ്ടേഷന് മുകളിൽ ബ്ലഷും കോണ്ടൂറും ഇടുമ്പോൾ ഉണ്ടാകുന്ന ആ കടുത്ത വരകൾ ഇതിൽ ഉണ്ടാകില്ല. എല്ലാം ചർമ്മവുമായി കൃത്യമായി അലിഞ്ഞുചേരും.
• ലോങ്ങ് ലാസ്റ്റിംഗ്: നിറങ്ങൾ ചർമ്മത്തോട് ചേർന്ന് ഫൗണ്ടേഷന് താഴെ ഇരിക്കുന്നതുകൊണ്ട് മേക്കപ്പ് പാളിപ്പോകാനുള്ള സാധ്യത കുറവാണ്.
• നാച്ചുറൽ ഗ്ലോ: ചർമ്മം ശ്വസിക്കുന്നതുപോലെ തോന്നിക്കുന്ന ഈ രീതി ഡെയിലി മേക്കപ്പിനും പാർട്ടികൾക്കും ഒരുപോലെ അനുയോജ്യമാണ്.

ചുരുക്കത്തിൽ, കട്ടിയിൽ ഫൗണ്ടേഷൻ ഉപയോഗിച്ച് മുഖത്തെ സ്വാഭാവികത നഷ്ടപ്പെടുത്തുന്നതിന് പകരം, മുഖത്തിന് കൃത്യമായ രൂപവും തിളക്കവും നൽകാൻ അണ്ടർപെയിന്റിംഗ് സഹായിക്കുന്നു. ഹെവി മേക്കപ്പ് ലുക്ക് ഇഷ്ടപ്പെടാത്തവർക്കും സ്വാഭാവിക ഭംഗി ആഗ്രഹിക്കുന്നവർക്കും ഈ 2026 മേക്കപ്പ് ഹാക്ക് ഒരുപോലെ പ്രിയപ്പെട്ടതാകും.