മേക്കപ്പ് റിമൂവ് ചെയ്യാൻ ഇനി കെമിക്കലുകൾ വേണ്ട; വീട്ടിൽ തയ്യാറാക്കാം നാച്ചുറൽ റിമൂവറുകൾ!

രാത്രി പാർട്ടി കഴിഞ്ഞു വരുമ്പോൾ ഈ മേക്കപ്പ് മുഴുവൻ മാറ്റുക എന്നത് ഒരു വലിയ ടാസ്ക് തന്നെയാണ്. കടയിൽ നിന്ന് വാങ്ങുന്ന റിമൂവറുകൾ പലപ്പോഴും നമ്മുടെ സ്കിന്നിന്റെ സ്വാഭാവിക ഗ്ലോ കളയാറുണ്ട്. ഇനി ആ ടെൻഷൻ വേണ്ട!

മേക്കപ്പ് ചെയ്യാൻ ഇഷ്ടമില്ലാത്തവർ ആരുമുണ്ടാകില്ല. എന്നാൽ ആഘോഷങ്ങൾ കഴിഞ്ഞ് തിരിച്ചെത്തിയാൽ മിക്കവരും മടികാണിക്കുന്ന ഒന്നാണ് മേക്കപ്പ് നീക്കം ചെയ്യുക എന്നത്. പലപ്പോഴും വിപണിയിൽ കിട്ടുന്ന മേക്കപ്പ് റിമൂവറുകളിലെ കടുപ്പമേറിയ കെമിക്കലുകൾ ചർമ്മത്തെ വരണ്ടതാക്കാനും കുരുക്കൾ വരാനും കാരണമാകാറുണ്ട്. ഒരു രൂപ പോലും ചിലവില്ലാതെ, നമ്മുടെ അടുക്കളയിലുള്ള തികച്ചും സ്വാഭാവികമായ ചേരുവകൾ കൊണ്ട് എങ്ങനെ മേക്കപ്പ് റിമൂവ് ചെയ്യാം? ചർമ്മത്തിന്റെ സ്വാഭാവിക തിളക്കം നിലനിർത്തിക്കൊണ്ട് 5 മിനിറ്റിനുള്ളിൽ വീട്ടിൽ തന്നെ തയ്യാറാക്കാവുന്ന ചില 'DIY' മാജിക്കുകൾ പരിചയപ്പെടാം.

ഓയിൽ ക്ലെൻസിംഗ്?

എണ്ണ എണ്ണയെ ലയിപ്പിക്കുന്നു" എന്നതാണ് ഇതിന്റെ അടിസ്ഥാന തത്വം. ചർമ്മത്തിലെ സ്വാഭാവിക എണ്ണമയം നഷ്ടപ്പെടുത്താതെ തന്നെ ഫൗണ്ടേഷൻ, സൺസ്‌ക്രീൻ, വാട്ടർപ്രൂഫ് മേക്കപ്പ് എന്നിവ എളുപ്പത്തിൽ നീക്കം ചെയ്യാൻ ഓയിൽ ക്ലെൻസിംഗ് സഹായിക്കുന്നു. ചർമ്മത്തിന്റെ സുരക്ഷാ പാളിയെ സംരക്ഷിക്കുകയും വരൾച്ചയും സെൻസിറ്റിവിറ്റിയും കുറയ്ക്കുകയും ചെയ്യുന്നു. ഇതിന് ശേഷം ഒരു മൈൽഡ് ഫേസ് വാഷ് കൂടി ഉപയോഗിക്കുന്നതിലൂടെ സുഷിരങ്ങൾ അടഞ്ഞുപോകാതെ ചർമ്മം ആഴത്തിൽ വൃത്തിയാക്കാം.

1. ഹോംമെയ്ഡ് ഫേസ് മേക്കപ്പ് റിമൂവർ

മുഖത്തെ മുഴുവൻ മേക്കപ്പും നീക്കം ചെയ്യാൻ ഈ കൂട്ട് മികച്ചതാണ്.

ആവശ്യമായ സാധനങ്ങൾ:

• സൺഫ്ലവർ ഓയിൽ അല്ലെങ്കിൽ ഒലിവ് ഓയിൽ – 20 ml
• വെളിച്ചെണ്ണ അല്ലെങ്കിൽ ജോജോബ ഓയിൽ (Jojoba oil) – 10 ml
• വിറ്റാമിൻ ഇ ഓയിൽ – 2–3 തുള്ളി

തയ്യാറാക്കുന്ന വിധം:

ചേരുവകളെല്ലാം നന്നായി യോജിപ്പിക്കുക. ഇതിൽ നിന്നും അല്പം മിശ്രിതം എടുത്ത് ഉള്ളംകൈയിൽ വെച്ച് ചെറുതായി ചൂടാക്കുക. തുടർന്ന് മുഖത്ത് 30–60 സെക്കൻഡ് വട്ടത്തിൽ മൃദുവായി മസാജ് ചെയ്യുക. ഇളം ചൂടുവെള്ളത്തിൽ മുക്കിയ മൃദുവായ തുണി ഉപയോഗിച്ച് മുഖം തുടയ്ക്കാം. ശേഷം ഒരു ഫേസ് വാഷ് ഉപയോഗിച്ച് മുഖം കഴുകുക.

2. കണ്ണിന് ചുറ്റുമുള്ള മേക്കപ്പിന്

കണ്ണിലെ മസ്കാരയും ഐലൈനറും നീക്കം ചെയ്യാൻ കൂടുതൽ ശ്രദ്ധ ആവശ്യമാണ്.

ആവശ്യമായ സാധനങ്ങൾ:

• ആവണക്കെണ്ണ – 10 ml
• കറ്റാർവാഴ ജെൽ – 20 ml
• ഒലിവ് ഓയിൽ – 5 ml

തയ്യാറാക്കുന്ന വിധം:

എല്ലാം കൂടി നന്നായി മിക്സ് ചെയ്യുക. ഒരു കോട്ടൺ പാഡിൽ ഈ മിശ്രിതം എടുത്ത് അടച്ച കണ്പോളകൾക്ക് മുകളിൽ കുറച്ച് സെക്കൻഡ് വെക്കുക. ശേഷം ഉരക്കാതെ തന്നെ മൃദുവായി തുടച്ചു മാറ്റാം. ആവശ്യമെങ്കിൽ സാധാരണ വെള്ളത്തിൽ മുഖം കഴുകുക.

ഗുണങ്ങൾ;

കടകളിൽ കിട്ടുന്ന മേക്കപ്പ് വൈപ്പുകളും കെമിക്കലുകളും ഒഴിവാക്കുന്നത് ചർമ്മത്തിന് മാത്രമല്ല, പരിസ്ഥിതിക്കും നല്ലതാണ്.

• ചർമ്മത്തിന്റെ ആരോഗ്യം: ചർമ്മം നേരത്തെ പ്രായമാകുന്നത് തടയാനും അണുബാധകൾ കുറയ്ക്കാനും ഇത് സഹായിക്കുന്നു.
• പരിസ്ഥിതി സൗഹൃദം: പ്ലാസ്റ്റിക് അംശമുള്ള വൈപ്പുകൾ ഒഴിവാക്കുന്നത് വഴി മലിനീകരണം കുറയ്ക്കാം.

പ്രകൃതിദത്തമായ പരിചരണത്തിന് ഒരു മിനിറ്റ് കൂടുതൽ ചിലവാകുമെങ്കിലും അത് നിങ്ങളുടെ ചർമ്മത്തിന് നൽകുന്ന ആശ്വാസം വളരെ വലുതാണ്.