സ്റ്റൈലിഷ് ആകാം സുരക്ഷിതമായി; സെപ്റ്റം പിയേഴ്സിംഗ് ചെയ്യുന്നവർ അറിയാൻ

​പരമ്പരാഗതമായ സൗന്ദര്യ സങ്കൽപ്പങ്ങളെ കാറ്റിൽ പറത്തിക്കൊണ്ട് ജെൻ സി ഏറ്റെടുത്ത ഏറ്റവും പുതിയ ഫാഷൻ വിപ്ലവമാണ് സെപ്റ്റം നോസ് റിംഗുകൾ. മൂക്കിന്റെ മധ്യഭാഗം തുളച്ചണിയുന്ന ഈ ആഭരണം ഇന്ന് വെറുമൊരു അലങ്കാരമല്ല, മറിച്ച് ആത്മവിശ്വാസത്തിന്റെയും…

ഇന്നത്തെ തലമുറയുടെ ഫാഷൻ ഐക്കണായി സെപ്റ്റം നോസ് റിംഗുകൾ മാറിക്കഴിഞ്ഞു. എന്നാൽ മൂക്കിന്റെ മധ്യഭാഗം തുളയ്ക്കുന്നത് മറ്റ് പിയേഴ്സിംഗുകളെ അപേക്ഷിച്ച് അല്പം കൂടുതൽ ശ്രദ്ധയും പരിചരണവും ആവശ്യമായ ഒന്നാണ്. ഇത് ചെയ്യാൻ ആഗ്രഹിക്കുന്നവർ ചില കാര്യങ്ങൾ ശ്രദ്ധിക്കണം.

ചെയ്യുന്നതിന് മുൻപ് ശ്രദ്ധിക്കാൻ

സെപ്റ്റം പിയേഴ്സിംഗ് ചെയ്യാൻ തീരുമാനിച്ചാൽ ആദ്യം ചെയ്യേണ്ടത് ഒരു പ്രൊഫഷണൽ പിയേഴ്സിംഗ് സ്റ്റുഡിയോ കണ്ടെത്തുക എന്നതാണ്. വീട്ടിൽ വെച്ചോ അല്ലെങ്കിൽ സാധാരണ തട്ടാൻമാരുടെ അടുത്തോ പോയി ഇത് ചെയ്യുന്നത് ഒഴിവാക്കണം. കാരണം, മൂക്കിനുള്ളിലെ തരുണാസ്ഥിക്ക് താഴെയുള്ള 'സ്വീറ്റ് സ്പോട്ട്' എന്ന കൃത്യമായ സ്ഥാനത്ത് തന്നെ തുളയ്ക്കണം. ഇതിനായി ഗണ്ണുകൾ ഉപയോഗിക്കാതെ സ്റ്റെറിലൈസ് ചെയ്ത സൂചികൾ മാത്രം ഉപയോഗിക്കുന്ന സ്ഥലങ്ങൾ തിരഞ്ഞെടുക്കുക. കൂടാതെ, അലർജി സാധ്യത കുറയ്ക്കുന്നതിനായി ടൈറ്റാനിയം അല്ലെങ്കിൽ സർജിക്കൽ സ്റ്റീൽ കൊണ്ടുള്ള ആഭരണങ്ങൾ ആദ്യഘട്ടത്തിൽ ഉപയോഗിക്കുന്നതാണ് ഉചിതം.

ചെയ്യുന്ന സമയത്ത്

ശരിയായ സ്ഥാനത്താണ് തുളയ്ക്കുന്നതെങ്കിൽ കഠിനമായ വേദന അനുഭവപ്പെടാറില്ല. ഒരു സെക്കൻഡ് മാത്രം നീണ്ടുനിൽക്കുന്ന ഒരു കടച്ചിൽ മാത്രമേ ഉണ്ടാകൂ. എന്നാൽ ആ സമയത്ത് ജലദോഷമോ മറ്റ് അലർജികളോ ഇല്ലെന്ന് ഉറപ്പുവരുത്തണം. ഇത് പിന്നീട് മുറിവ് ഉണങ്ങുന്നത് എളുപ്പമാക്കും.

തുളച്ചതിന് ശേഷമുള്ള പരിചരണം

സെപ്റ്റം പിയേഴ്സിംഗ് പൂർണ്ണമായും ഉണങ്ങാൻ ഏകദേശം രണ്ട് മുതൽ നാല് മാസം വരെ സമയമെടുക്കും. ഈ കാലയളവിൽ ഏറ്റവും പ്രധാനപ്പെട്ടത് ശുചിത്വമാണ്. ഒരു കപ്പ് ഇളം ചൂടുവെള്ളത്തിൽ കാൽ ടീസ്പൂൺ അയഡിൻ ഇല്ലാത്ത ഉപ്പ് ചേർത്ത് ആ മിശ്രിതം കൊണ്ട് ദിവസവും രണ്ട് നേരം പിയേഴ്സിംഗ് ചെയ്ത ഭാഗം തുടയ്ക്കണം. മുറിവിൽ അഴുക്ക് അടിഞ്ഞുകൂടുന്നത് ഒഴിവാക്കാൻ ഇത് സഹായിക്കും.

പിയേഴ്സിംഗ് ചെയ്ത ഭാഗത്ത് അനാവശ്യമായി കൈകൊണ്ട് തൊടുകയോ ആഭരണം തിരിക്കുകയോ ചെയ്യരുത്. ഇത് അണുബാധയ്ക്ക് കാരണമായേക്കാം. കൂടാതെ, ആ ഭാഗത്ത് ഫേസ് വാഷുകളോ മേക്കപ്പ് ഉൽപ്പന്നങ്ങളോ നേരിട്ട് ഉപയോഗിക്കാതിരിക്കാൻ ശ്രദ്ധിക്കുക. മുറിവ് ഉണങ്ങുന്നതിന് മുൻപ് ആഭരണം മാറ്റാൻ ശ്രമിക്കരുത്. അമിതമായ വീക്കമോ പഴുപ്പോ കണ്ടാൽ ഒട്ടും വൈകാതെ വിദഗ്ധ സഹായം തേടേണ്ടതാണ്.

കൃത്യമായ പരിചരണവും ശ്രദ്ധയും നൽകിയാൽ സുരക്ഷിതമായി തന്നെ നിങ്ങൾക്ക് ഈ ലേറ്റസ്റ്റ് ട്രെൻഡിന്റെ ഭാഗമാകാം.