കൊച്ചിയിൽ 18-കാരൻ പൊലീസ് പിടിയിൽ; ഇടപ്പള്ളിയിലെ സ്വകാര്യ ബാറിൻ്റെ പാർക്കിങിൽ വച്ച് രാത്രി യുവാവിനെ കുത്തിക്കൊലപ്പെടുത്താൻ ശ്രമിച്ച കേസിൽ അറസ്റ്റ്

ഇടപ്പള്ളിയിലെ ബാറിൽ മദ്യപാനത്തിനിടെയുണ്ടായ തർക്കത്തെ തുടർന്ന് യുവാവിനെ കുത്തിപ്പരിക്കേൽപ്പിച്ച 18-കാരനെ കളമശ്ശേരി പോലീസ് അറസ്റ്റ് ചെയ്തു. കുത്തേറ്റ എറണാകുളം സ്വദേശി കിഷോർ തീവ്രപരിചരണ വിഭാഗത്തിൽ ചികിത്സയിലാണ്. ഒളിവിൽ പോയ പ്രതിയെ പ്രീമിയർ ജംഗ്ഷനിൽ നിന്നാണ് പോലീസ് അതിസാഹസികമായി പിടികൂടിയത്.

കളമശ്ശേരി: ബാറിലെ മദ്യപാനത്തിനിടെയുണ്ടായ തർക്കത്തെ തുടർന്ന് യുവാവിനെ മാരകമായി കുത്തിപ്പരിക്കേൽപ്പിച്ച സംഭവത്തിൽ 18-കാരനായ പ്രതിയെ പോലീസ് പിടികൂടി. ഏലൂർ കുറ്റിക്കാട്ടുകര കരിപ്പായി പറമ്പ് വീട്ടിൽ ജിനു ജോസഫ് (18) ആണ് കളമശ്ശേരി പോലീസിന്റെ പിടിയിലായത്. ഇക്കഴിഞ്ഞ തിങ്കളാഴ്ച രാത്രി പത്ത് മണിയോടെ ഇടപ്പള്ളി സീഗേറ്റ് ബാറിലായിരുന്നു കേസിനാസ്പദമായ സംഭവം.

മദ്യപിക്കുന്നതിനിടെ ഉണ്ടായ വാക്കേറ്റം ബാറിന്റെ പാർക്കിംഗ് ഏരിയയിൽ വെച്ച് സംഘർഷത്തിൽ കലാശിക്കുകയായിരുന്നു. തുടർന്ന് പ്രതി എറണാകുളം സ്വദേശിയായ കിഷോർ എന്ന യുവാവിനെ മാരകമായി കുത്തിപ്പരിക്കേൽപ്പിച്ച ശേഷം ഇവിടെ നിന്ന് ഓടി രക്ഷപ്പെട്ടു. മുതുകിൽ ആഴത്തിൽ കുത്തേറ്റ കിഷോറിനെ ഉടൻതന്നെ അടുത്തുള്ള കിൻഡർ ആശുപത്രിയിൽ പ്രവേശിപ്പിച്ചു. ഇയാൾ നിലവിൽ തീവ്രപരിചരണത്തിൽ ചികിത്സയിലാണ്.

ഒളിവില്‍ പോയ പ്രതിയെ കളമശ്ശേരി പ്രീമിയർ ജംഗ്ഷനിൽ വെച്ച് പോലീസ് സംഘം അതിസാഹസികമായി പിന്തുടർന്ന് പിടികൂടുകയായിരുന്നു. പ്രതി കഴിഞ്ഞ വർഷം ബിനാനിപുരം പോലീസ് സ്റ്റേഷനിൽ രജിസ്റ്റർ ചെയ്ത പോക്സോ കേസിലും പ്രതിയാണെന്ന് പോലീസ് അറിയിച്ചു. കളമശ്ശേരി സർക്കിൾ ഇൻസ്‌പെക്ടർ അഭിലാഷ് എ.എൽ.-ന്റെ നേതൃത്വത്തിൽ എസ്.ഐ.മാരായ സി.ആർ. ബിജു, രാം ലാൽ, സി.പി.ഒ.മാരായ മാഹിൻ അബൂബക്കർ, വിനു കെ.പി. എന്നിവരടങ്ങിയ സംഘമാണ് പ്രതിയെ വലയിലാക്കിയത്.