മൂന്ന് പോക്സോ കേസുകളിൽ പ്രതി, ജാമ്യത്തിലിറങ്ങി വയോധികയെ പീഡിപ്പിക്കാൻ ശ്രമം; യുവാവ് പിടിയിൽ

പോക്സോ കേസിൽ ജാമ്യത്തിലിറങ്ങിയ യുവാവ് കൊല്ലത്ത് വയോധികയെ പീഡിപ്പിക്കാൻ ശ്രമിച്ചെന്ന കേസിൽ അറസ്റ്റിലായി. തലവൂർ സ്വദേശി അനീഷ് കുമാറിനെയാണ് കുന്നിക്കോട് പൊലീസ് പിടികൂടിയത്. 

കൊല്ലം: പോക്സോ കേസിൽ അറസ്റ്റിലായ ശേഷം ജാമ്യത്തിലിറങ്ങി വയോധികയെ പീഡിപ്പിക്കാൻ ശ്രമിച്ചെന്ന കേസിൽ യുവാവ് പിടിയിൽ. തലവൂർ അരിങ്ങട സ്വദേശി അനീഷ് കുമാറിനെ (29) ആണ് കുന്നിക്കോട് പൊലീസ് അറസ്റ്റ് ചെയ്തത്. റോഡിലൂടെ നടന്നു വന്ന വയോധികയെ കടന്നു പിടിച്ചപ്പോൾ എതിർത്തു. ഈ സമയത്ത് സമീപത്തെ വയലിലേക്ക് തള്ളിയിട്ട് വസ്ത്രങ്ങൾ കീറി പീഡിപ്പിക്കാൻ ശ്രമിച്ചതായാണ് പരാതി. അതു വഴികടന്നുപോയവരാണ് വയോധികയെ രക്ഷപ്പെടുത്തിയത്. സംഭവത്തിന് പിന്നാലെ ഒളിവിൽ പോയ അനീഷ് കുമാറിനെ നാട്ടുകാരും പൊലീസും ചേർന്നാണ് കണ്ടെത്തിയത്. മൂന്ന് പോക്സോ കേസുകൾ ഇയാൾക്കെതിരെ നിലവിലുണ്ട്. അപ്പീൽ കോടതിയിൽ നിൽക്കുന്ന കേസിലാണ് ജാമ്യം ലഭിച്ചത്.