ചികിത്സാ സഹായത്തിന്റെയും ട്രസ്റ്റുകളുടെയും പേരില്‍ വീടുകള്‍ കയറിയുള്ള പണപ്പിരിവ്; കര്‍ശന നടപടിക്ക് പൊലീസിന് നിര്‍ദേശം

Published : Nov 20, 2026, 05:34 PM IST
Kerala Police

Synopsis

മലപ്പുറം ജില്ലയിൽ ജീവകാരുണ്യ പ്രവർത്തനങ്ങളുടെയും മറ്റും പേരിൽ വീടുകൾ കയറി നടക്കുന്ന അനധികൃത പണപ്പിരിവുകൾക്കെതിരെ അന്വേഷണം നടത്താൻ ജില്ലാ പൊലീസ് മേധാവി ഉത്തരവിട്ടു. വ്യാജ സംഘടനകളുടെ പേരിലുള്ള സാമ്പത്തിക തട്ടിപ്പുകളും മോഷണവും തടയുന്നതിനാണ് ഈ നടപടി

മലപ്പുറം: ചികിത്സാ സഹായം, ജീവകാരുണ്യ പ്രവര്‍ത്തനങ്ങള്‍, യതീംഖാനകള്‍, വിവിധ ട്രസ്റ്റുകള്‍ എന്നിവയുടെ പേരില്‍ വീടുകള്‍ കയറി അനധികൃതമായി പണപ്പിരിവ് നടത്തുന്ന സംഘങ്ങള്‍ക്കെതിരെ അന്വേഷണം നടത്താന്‍ ജില്ലാ പൊലീസ് മേധാവി ഉത്തരവിട്ടു. ജില്ലയുടെ വിവിധ ഭാഗങ്ങളില്‍ ഇത്തരം പണപ്പിരിവുകള്‍ വ്യാപകമാകുന്നതായുള്ള പരാതികളുടെ അടിസ്ഥാനത്തിലാണ് നടപടി. അനധികൃതമായി പണം ശേഖരിക്കുന്നവരെ കണ്ടെത്തി നിയമനടപടി സ്വീകരിക്കാനും നിര്‍ദേശം നല്‍കിയിട്ടുണ്ട്.

ഗിന്നസ് ജേതാവും പൊതുപ്രവര്‍ത്തകനുമായ പടവണ്ണ അബ്ദുല്‍ സലീം നല്‍കിയ പരാതിയിലാണ് പൊലീസിന്റെ ഇടപെടല്‍. പണപ്പിരിവിനായി വീടുകളിലെത്തുന്നവരുടെ തിരിച്ചറിയല്‍ കാര്‍ഡുകള്‍, അവര്‍ പ്രതിനിധീകരിക്കുന്ന സംഘടനകളുടെ വിശ്വാസ്യത, ശേഖരിക്കുന്ന പണത്തിന്റെ വിനിയോഗം, പിരിവിനുള്ള നിയമാനുമതി എന്നിവ സംബന്ധിച്ച് വ്യക്തമായ വിവരങ്ങളില്ലാതെയാണ് പലരും പ്രവര്‍ത്തിക്കുന്നതെന്ന് പരാതിയില്‍ ചൂണ്ടിക്കാട്ടി.

രോഗികളുടെ ചികിത്സയ്ക്കും മറ്റ് അടിയന്തര ആവശ്യങ്ങള്‍ക്കുമെന്ന പേരില്‍ വീടുകളിലെത്തി പണം ആവശ്യപ്പെടുന്നവര്‍ യഥാര്‍ഥത്തില്‍ അംഗീകൃത സംഘടനകളുടെ പ്രതിനിധികളാണോയെന്ന് ഉറപ്പുവരുത്തേണ്ടതുണ്ട്. ശേഖരിക്കുന്ന തുക പ്രഖ്യാപിച്ച ആവശ്യങ്ങള്‍ക്ക് തന്നെ വിനിയോഗിക്കുന്നുണ്ടോ എന്ന കാര്യത്തിലും പരിശോധന വേണമെന്നാണ് ആവശ്യം. വ്യാജ സംഘടനകളുടെ പേരില്‍ പണം ശേഖരിച്ച് പൊതുജനങ്ങളെ വഞ്ചിക്കാനുള്ള സാധ്യതയും പരാതിയില്‍ ചൂണ്ടിക്കാട്ടിയിട്ടുണ്ട്.

ഇത്തരം അനധികൃത പണപ്പിരിവുകള്‍ സാമ്പത്തിക തട്ടിപ്പുകള്‍ക്ക് വഴിവെക്കുന്നതിനൊപ്പം വീടുകള്‍ കേന്ദ്രീകരിച്ചുള്ള മോഷണം ഉള്‍പ്പെടെയുള്ള സാമൂഹിക വിരുദ്ധ പ്രവര്‍ത്തനങ്ങള്‍ക്കും കാരണമാകാമെന്ന് പരാതിയില്‍ വ്യക്തമാക്കുന്നു. പണപ്പിരിവിന്റെ പേരില്‍ വീടുകളിലെത്തുന്നവരുടെ വിവരങ്ങള്‍ ശേഖരിക്കുന്നതും അവരുടെ പ്രവര്‍ത്തനങ്ങള്‍ പരിശോധിക്കുന്നതും പൊതുജനങ്ങളുടെ സുരക്ഷയ്ക്ക് പ്രധാനമാണെന്നും ചൂണ്ടിക്കാട്ടി.

പരാതി ഗൗരവമായി പരിഗണിച്ച ജില്ലാ പൊലീസ് മേധാവി നവംബര്‍ 19ന് തുടര്‍നടപടികള്‍ക്കായി ഉത്തരവ് കൈമാറി. മലപ്പുറം, പെരിന്തല്‍മണ്ണ, തിരൂര്‍, നിലമ്പൂര്‍, കൊണ്ടോട്ടി, താനൂര്‍ എന്നീ പൊലീസ് സബ് ഡിവിഷനുകളിലെ ബന്ധപ്പെട്ട ഉദ്യോഗസ്ഥര്‍ക്കാണ് അന്വേഷണച്ചുമതല നല്‍കിയിരിക്കുന്നത്. പ്രദേശങ്ങളില്‍ നടക്കുന്ന പണപ്പിരിവുകളെക്കുറിച്ച് അന്വേഷിച്ച് ആവശ്യമായ നിയമനടപടികള്‍ സ്വീകരിക്കാനാണ് നിര്‍ദേശം.

പണപ്പിരിവിന് എത്തുന്നവരുടെ തിരിച്ചറിയല്‍ രേഖകളും സംഘടനയുടെ ഔദ്യോഗിക വിവരങ്ങളും പരിശോധിക്കണമെന്നും നിയമാനുസൃതമായ അനുമതിയില്ലാതെ പണം ശേഖരിക്കുന്നവര്‍ക്കെതിരെ നടപടി സ്വീകരിക്കണമെന്നും നിര്‍ദേശമുണ്ട്. പൊതുജനങ്ങള്‍ ഇത്തരം പണപ്പിരിവുകളില്‍ ജാഗ്രത പാലിക്കണമെന്നും സംശയാസ്പദമായ സാഹചര്യങ്ങള്‍ ശ്രദ്ധയില്‍പ്പെട്ടാല്‍ പൊലീസിനെ അറിയിക്കണമെന്നും അധികൃതര്‍ നിര്‍ദേശിക്കുന്നു. ജീവകാരുണ്യ പ്രവര്‍ത്തനങ്ങളുടെ പേരില്‍ നടക്കുന്ന തട്ടിപ്പുകള്‍ തടയുന്നതിനും യഥാര്‍ഥ സഹായം അര്‍ഹരായവരിലേക്ക് എത്തുന്നുണ്ടെന്ന് ഉറപ്പാക്കുന്നതിനും നടപടി സഹായകമാകുമെന്നാണ് പ്രതീക്ഷ.

PREV

കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News  അപ്‌ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam

 

PP
About the Author

Prabeesh PP

2017 മുതല്‍ ഏഷ്യാനെറ്റ് ന്യൂസ് ഓണ്‍ലൈനില്‍ പ്രവര്‍ത്തിക്കുന്നു. നിലവില്‍ ചീഫ് സബ് എഡിറ്റര്‍. ഡെവലപ്മെന്റ്റ് സ്റ്റഡീസിൽ ബിരുദാനന്തര ബിരുദവും ജേണലിസത്തില്‍ പോസ്റ്റ് ഗ്രാജുവേറ്റ് ഡിപ്ലോമയും നേടി. പ്രാദേശിക, കേരള, ദേശീയ അന്താരാഷ്ട്ര വാർത്തകൾ, സംസ്ഥാന, ദേശീയ, അന്താരാഷ്ട്ര വാര്‍ത്തകളും എന്റര്‍ടെയിന്‍മെന്റ്, ആരോഗ്യം തുടങ്ങിയ വിഷയങ്ങളിലും എഴുതുന്നു. ഒരു പതിറ്റാണ്ട് പിന്നിട്ട മാധ്യമപ്രവര്‍ത്തന കാലയളവില്‍ നിരവധി ഗ്രൗണ്ട് റിപ്പോര്‍ട്ടുകള്‍, ന്യൂസ് സ്റ്റോറികള്‍, ഫീച്ചറുകള്‍, അഭിമുഖങ്ങള്‍, ലേഖനങ്ങള്‍ തുടങ്ങിയവ പ്രസിദ്ധീകരിച്ചു. പ്രിന്റ്, വിഷ്വല്‍, ഡിജിറ്റല്‍ മീഡിയകളില്‍ പ്രവര്‍ത്തനപരിചയം. മെയില്‍: prabeesh@asianetnews.inRead More...
Read more Articles on
click me!

Recommended Stories

യുവാവിനെ ബാർബർ ഷോപ്പ് ജീവനക്കാർ ആക്രമിച്ചു, മടങ്ങിപ്പോകാൻ പറഞ്ഞത് ചോദ്യം ചെയ്തതോടെ മർദനം, സംഭവം നാദാപുരം കല്ലാച്ചിയിൽ
മിഠായി തൊണ്ടയില്‍ കുടുങ്ങി ഒന്നരവയസുകാരന് ദാരുണാന്ത്യം