കോലഞ്ചേരി സ്വദേശിനിയായ 21കാരി മൂക്കുത്തി അഴിക്കാൻ ശ്രമിക്കുന്നതിനിടെ മൂക്കിനുള്ളിൽ കുടുങ്ങി, രാത്രി ഫയർഫോഴ്സെത്തി രക്ഷപ്പെടുത്തി

21കാരി മൂക്കുത്തി ഊരുന്നതിനിടെ അതിന്റെ തലഭാഗം മൂക്കിലെ തുളയിലൂടെ ഉള്ളിലേക്ക് ആഴ്ന്നിറങ്ങുകയും പുറത്ത് നിന്ന് കാണാനാകാത്തവിധം കുടുങ്ങുകയും ചെയ്യുകയായിരുന്നു.

കൊച്ചി: മൂക്കുത്തി അഴിക്കാൻ ശ്രമിക്കുന്നതിനിടെ യുവതിയുടെ മൂക്കിൽ കുടുങ്ങിയ മൂക്കുത്തി അഗ്നിരക്ഷാസേന പുറത്തെടുത്തു. കോലഞ്ചേരി പട്ടിമറ്റം സ്വദേശിനിയായ 21കാരിയുടെ മൂക്കിലാണ് കഴിഞ്ഞ ദിവസം രാത്രി മൂക്കുത്തി കുടുങ്ങിയത്. മൂക്കുത്തി ഊരുന്നതിനിടെ അതിന്റെ തലഭാഗം മൂക്കിലെ തുളയിലൂടെ ഉള്ളിലേക്ക് ആഴ്ന്നിറങ്ങുകയും പുറത്ത് നിന്ന് കാണാനാകാത്തവിധം കുടുങ്ങുകയും ചെയ്യുകയായിരുന്നു.

വീട്ടുകാർ ഏറെ നേരം പരിശ്രമിച്ചെങ്കിലും മൂക്കുത്തി പുറത്തെടുക്കാൻ സാധിച്ചില്ല. വേദനയും അസ്വസ്ഥതയും കൂടിയതോടെ രാത്രി 7.30ഓടെ യുവതിയെ വീട്ടുകാർ പട്ടിമറ്റം അഗ്നിരക്ഷാ നിലയത്തിൽ എത്തിച്ചു. സ്റ്റേഷൻ ഓഫിസർ എൻഎച്ച് അസൈനാറിന്റെയും സീനിയർ ഫയർ ആൻഡ് റെസ്ക്യു ഓഫീസർ രഞ്ജിത്തിന്റെയും നേതൃത്വത്തിൽ സേനാംഗങ്ങൾ മൂക്കുത്തിയുടെ ലോക്ക് മുറിച്ച് നീക്കിയാണ് യുവതിയെ രക്ഷപ്പെടുത്തിയത്.