1980ൽ വന്ന നിയമം, ആദ്യമായി 21 ലക്ഷത്തിന്‍റെ റെക്കോർ‍ഡ് പിഴ; 5,000 കി​ലോ അരണ മത്സ്യം പിടിച്ചു, കടലിൽ ഒഴുക്കിക്കളഞ്ഞു

കേരള സമുദ്ര മത്സ്യബന്ധന നിയമങ്ങൾ ലംഘിച്ച് നിരോധിത വല ഉപയോഗിച്ച് ചെറുമത്സ്യങ്ങളെ പിടിച്ചതിനും പെർമിറ്റില്ലാതെ മത്സ്യബന്ധനം നടത്തിയതിനും രണ്ട് കർണാടക ബോട്ടുകൾക്ക് ഫിഷറീസ് വകുപ്പ് 21.6 ലക്ഷം രൂപയുടെ റെക്കോർഡ് പിഴ ചുമത്തി. 

തൃശൂർ: കേരള സ​മു​ദ്ര മ​ത്സ്യ​ബ​ന്ധ​ന നി​യ​ന്ത്ര​ണ നി​യ​മ​ങ്ങ​ൾ ലം​ഘി​ച്ച് നിരോധിത പെലാജിക് നെറ്റ് ഉപയോഗിച്ച് ചെ​റു​മ​ത്സ്യ​ങ്ങ​ൾ പി​ടി​ച്ചും സ്പെഷൽ പെർമിറ്റ് ഇല്ലാതെയും മത്സ്യബന്ധനം നടത്തിയ കർണാടക സംസ്ഥാനത്തിലെ രണ്ട് ബോ​ട്ടുകൾക്ക് 21,60,450 രൂപ പിഴ ഈടാക്കി ഫിഷറീസ് ഡിപ്പാർട്ട്മെന്‍റ്. കേരള തീരത്ത് അന്യ സംസ്ഥാന മത്സ്യബന്ധന യാനങ്ങൾക്ക് 12 നോട്ടിക്കൽ മൈലിനുള്ളിൽ മത്സ്യബന്ധനം നടത്താൻ വേണ്ട സ്പെഷ്യൽ പെർമിറ്റ് ഇല്ലാതെയാണ് ഇവർ മത്സ്യബന്ധനം നടത്തിയത്. കേന്ദ്ര സംസ്ഥാന സർക്കാരുകൾ നിയമം മൂലം നിരോധിച്ച മൂന്ന് പെലാജിക് വലകളും 16 സെ​ന്‍റീ​മീ​റ്റ​റി​ൽ താഴെ വലിപ്പമുളള 5,000 കി​ലോ അരണ മത്സ്യങ്ങളും രണ്ട് ബോട്ടുകളിൽ നിന്നായി പിടിച്ചെടുത്തു. ചെ​റു​മ​ത്സ്യ​ങ്ങ​ളെ പിന്നീട് പു​റം​ക​ടലി​ൽ ഒ​ഴു​ക്കി ക​ള​ഞ്ഞു. മംഗലാപുരം സ്വദേശികളായ മുഹമ്മദ് ഇഫ്ത്തിക്ക, റിസാന മുഹമ്മദ് ഫിറോസ് എന്നിവരുടെ ഉടമസ്ഥതയിലുള്ള ബോ​ട്ടുകളാണ് പി​ടി​ച്ചെ​ടു​ത്ത​ത്.

ബോട്ടുകൾക്ക് പതിനഞ്ച് ലക്ഷം രൂപ പി​ഴ ഈ​ടാ​ക്കുകയും ബോട്ടുകളിലെ ഉപയോഗയോഗ്യമായ മത്സ്യങ്ങൾ പരസ്യ ലേലം ചെയ്ത് കിട്ടിയ 6,60,450 രൂപ ട്രഷറിയിൽ അടക്കുകയും ചെയ്തു. ആകെ 21,60,450 രൂപയാണ് ഇരു ബോട്ടുകളിൽ നിന്നും പിഴയിനത്തിൽ ഈടാക്കിയത്. 1980ൽ കേരള സമുദ്ര മത്സ്യബന്ധന നിയന്ത്രണ നിയമം നിലവിൽ വന്നതിന് ശേഷം ആദ്യമായാണ് ഇത്രയും വലിയ തുക പിഴയിനത്തിൽ ഫിഷറീസ് വകുപ്പ് ഇടാക്കുന്നത്. പരമ്പരാഗത മത്സ്യത്തൊഴിലാളികളാണ് ഫി​ഷ​റീ​സ് മ​റൈ​ൻ എ​ൻ​ഫോഴ്സ്മെന്‍റ് കോസ്റ്റൽ പൊലീസ് ഉ​ദ്യോ​ഗ​സ്ഥ​രെ വിവരമറിച്ചത്.

അ​ഴീ​ക്കോ​ട് ഫി​ഷ​റീ​സ് സ്റ്റേ​ഷ​ൻ അ​സി​സ്റ്റന്‍റ് ഡ​യ​റ​ക്ട​ർ കെ പി ഗ്രേസി, ഫിഷറീസ് എക്സ്റ്റഷൻ ഓഫീസർ സി കെ മനോജ്, അസിസ്റ്റന്‍റ് ഫിഷറീസ് എക്സ്റ്റൻഷൻ ഓഫീസർ സംന ഗോപൻ, മ​റൈ​ൻ എ​ൻ​ഫോ​ഴ്സ്മെ​ന്‍റ് ആ​ൻ​ഡ് വിജി​ല​ൻ​സ് വി​ങ് ഓ​ഫി​സ​ർ​മാ​രാ​യ ഇ ​ആ​ർ ഷി​നി​ൽ​കു​മാ​ർ, വി ​എം ഷൈ​ബു, വി. എ​ൻ പ്ര​ശാ​ന്ത്കു​മാ​ർ, മെ​ക്കാ​നി​ക്ക്മാരായ പി എസ് കൃഷ്ണകുമാർ, ടി യു മനോജ്, സീ ​റെ​സ്ക്യൂ ഗാ​ർ​ഡു​മാ​രാ​യ പ്രമോദ്, സുധീഷ്, ഷിഹാബ്, വർഗ്ഗീസ് ജീഫിൻ, ശ്രേയസ് എ​ന്നി​വ​രാ​ണ് പ്ര​ത്യേ​ക സം​ഘ​ത്തി​ൽ ഉ​ണ്ടാ​യി​രു​ന്ന​ത്.