പരിഭ്രാന്തരാവേണ്ട സാഹചര്യമില്ല, വൃഷ്ടിപ്രദേശത്ത് കനത്ത മഴ തുടരുന്നു, നീരൊഴുക്ക് വര്‍ധിച്ചു; ബാണാസുരസാഗര്‍ ഡാമിന്‍റെ ഷട്ടര്‍ ഉയര്‍ത്തി

കരമാൻ തോട്, പനമരം പുഴയോരങ്ങളിലും  താഴ്ന്ന പ്രദേശങ്ങളിലും താമസിക്കുന്നവര്‍ ജാഗ്രത പാലിക്കണം

കല്‍പ്പറ്റ: പടിഞ്ഞാറത്തറ ബാണാസുരസാഗര്‍ അണക്കെട്ടിന്‍റെ വ്യഷ്ടിപ്രദേശത്ത് മഴ തുടരുന്നതിനാൽ സ്‌പിൽവെ ഷട്ടറുകൾ 60 സെന്‍റി മീറ്ററായി ഉയർത്തിയതായി എക്സിക്യൂട്ടീവ് എൻജിനീയർ അറിയിച്ചു. നിലവിൽ ഒന്ന്, രണ്ട് ഷട്ടറുകൾ 30 സെന്‍റിമീറ്റർ വീതം ഉയർത്തി സെക്കന്‍റിൽ 48.8 ക്യുമെക്സ് വെള്ളം ഘട്ടംഘട്ടമായി  പുഴയിലേക്ക് ഒഴുക്കി വിടുന്നുണ്ട്. കരമാൻ തോട്, പനമരം പുഴയോരങ്ങളിലും  താഴ്ന്ന പ്രദേശങ്ങളിലും താമസിക്കുന്നവര്‍ ജാഗ്രത പാലിക്കണം.

നേരത്തെ ബാണാസുര സാഗര്‍ ഡാമിലെ ഒരു സ്‌പിൽവെ ഷട്ടർ (Radial Gate No-2) 30 സെന്‍റിമീറ്ററും ഒരു സ്‌പിൽവെ ഷട്ടർ (Radial Gate No 3) 15 സെന്‍റിമീറ്ററും ഉയര്‍ത്തിയിരുന്നു. ഡാമിന്‍റെ വൃഷ്ടി പ്രദേശത്തു മഴ ലഭിക്കുന്നതിനാൽ ഡാമിലെ അധിക ജലം ഒഴുക്കി കളയുന്നതിന്‍റെ ഭാഗമായാണ് ഒരു സ്പിൽവെ ഷട്ടറുകള്‍ 60 സെന്‍റിമീറ്ററായി ഉയര്‍ത്തിയത്. ഇതേതുടര്‍ന്ന് കരമാൻതോട്, പനമരം പുഴകളിൽ 25 മുതൽ 35 സെൻ്റിമീറ്റർ വരെ ജലനിരപ്പ് ഉയരാൻ സാധ്യതയുണ്ട്.

വൈകുന്നേരം 6 മണി മുതൽ രാവിലെ 6 മണി വരെയുള്ള സമയത്ത്‌ യാതൊരു കാരണവശാലും അണക്കെട്ടിൽ നിന്നും വെള്ളം തുറന്ന് വിടുന്നതിന്‍റെ അളവ്‌ വർദ്ധിപ്പിക്കുകയില്ലെന്നും ഏതൊരു അടിയന്തിര സാഹചര്യത്തിലും ജില്ലാ എമർജൻസി ഓപ്പറേറ്റിംഗ്‌ സെന്ററിൽ വിളിക്കാമെന്നും(1077) ജില്ലാ കളക്ടര്‍ അറിയിച്ചു.പരിഭ്രാന്തരാവേണ്ട യാതൊരു സാഹചര്യവും നിലവിലില്ലെന്നും. എല്ലാ മുൻ കരുതലുകളും കൈക്കൊണ്ടിട്ടുണ്ടെന്നും ജില്ലാ കളക്ടര്‍ അറിയിച്ചു.