ബസ് അങ്കമാലിയിലെത്തിയപ്പോൾ ഫെയ്സ് ക്രീം കുപ്പിയിലെ രഹസ്യം പുറത്തായി, കണ്ടെത്തിയത് ക്രീമിനുള്ളിൽ ഒളിപ്പിച്ച ലഹരി; യുവാവിനെ പൊലീസ് പിടികൂടി

ജില്ലാ പൊലീസ് മേധാവിക്ക് ലഭിച്ച രഹസ്യ വിവരത്തിന്‍റെ അടിസ്ഥാനത്തിലായിരുന്നു ലഹരി വിരുദ്ധ സ്ക്വാഡും പൊലീസും ചേർന്ന് പരിശോധന നടത്തിയത്. ബെംഗളൂരുവിൽ നിന്ന് ബസിലാണ് ഇയാൾ എത്തിയത്

കൊച്ചി: ഫെയ്സ് ക്രീം കുപ്പിയിൽ ഒളിപ്പിച്ച് എം ഡി എം എ കടത്താൻ ശ്രമിച്ച് യുവാവ് പൊലീസിന്‍റെ പിടിയിലായി. ഫെയ്സ് ക്രീം കുപ്പിയിൽ ലോഷന്‍റെ ഇടയിൽ പ്രത്യേക ശ്രദ്ധയോടെയാണ് അഖിൽ എം ഡി എം എ ഒളിപ്പിച്ചതെങ്കിലും ലഹരി വിരുദ്ധ സ്ക്വാഡും പൊലീസും ചേർന്ന് നടത്തിയ പരിശോധനയിൽ പിടിവീഴുകയായിരുന്നു. 3. 2 ഗ്രാം എം ഡി എം എയാണ് പഴന്തോട്ടം വെമ്പിള്ളി എള്ളുവിള പുത്തൻവീട്ടിൽ അഖിലി (30) ന്റെ കൈയ്യിൽ നിന്നും കണ്ടെത്തിയത്. അങ്കമാലിയിൽ വെച്ചാണ് റൂറൽ ജില്ലാ ലഹരി വിരുദ്ധ സ്ക്വാഡും അങ്കമാലി പൊലീസും ചേർന്ന് രാസലഹരി പിടികൂടിയത്.

രഹസ്യ വിവരത്തിൽ പരിശോധന

ജില്ലാ പൊലീസ് മേധാവിക്ക് ലഭിച്ച രഹസ്യ വിവരത്തിന്‍റെ അടിസ്ഥാനത്തിലായിരുന്നു ലഹരി വിരുദ്ധ സ്ക്വാഡും പൊലീസും ചേർന്ന് പരിശോധന നടത്തിയത്. ബെംഗളൂരുവിൽ നിന്ന് ബസിലാണ് ഇയാൾ എം ഡി എം എ കടത്തിയത്. ഫെയ്സ് ക്രീം കുപ്പിയിൽ ലോഷന്റെ ഇടയിൽ പ്രത്യേകം ഒളിപ്പിച്ച നിലയിലാണ് എം ഡി എം എ കണ്ടെത്തിയത്. ഡി വൈ എസ് പിമാരായ ജെ ഉമേഷ് കുമാർ, ടി ആർ രാജേഷ്, ഇൻസ്പെക്ടർ എ രമേഷ് തുടങ്ങിയവരുടെ നേതൃത്വത്തിലായിരുന്നു അന്വേഷണം നടത്തിയത്.