ഒരു മാസം വേണ്ടത് 15,000 രൂപയുടെ മരുന്ന്; 24കാരിക്ക് ദുരിതാശ്വാസനിധിയിൽ നിന്ന് ധനസഹായം, എഎവൈ കാർഡും നൽകും

ഒന്നര വർഷം മുൻപ് വൃക്ക മാറ്റി വെച്ച ശേഷം ഒരു മാസം 15,000 വരെ  മരുന്നിന് ചെലവ് വരും. ആരോഗ്യ ഇൻഷുറൻസ് മുഖേനയാണ്  ഈ തുക കണ്ടെത്തിയിരുന്നത്.

പാലക്കാട്: ഗുരുതര വൃക്ക രോഗത്തെ തുടർന്ന് ഒന്നരവർഷം മുമ്പ് വൃക്ക മാറ്റിവെച്ച തങ്കയം പൊക്കുനി സ്വദേശിയായ 24 കാരിക്ക് കരുതലും കൈതാങ്ങും. ചിറ്റൂർ പരാതി പരിഹാര അദാലത്തിലാണ് സമാശ്വാസ തീരുമാനം. മുഖ്യമന്ത്രിയുടെ ദുരിതാശ്വാസനിധിയിൽ നിന്ന് ധനസഹായം വാഗ്ദാനം ചെയ്തതിന് പുറമെ അടിയന്തരമായി എ എ വൈ കാർഡ് അനുവദിച്ചു കൊടുക്കാനും മന്ത്രി എം ബി രാജേഷ് ജില്ലാ സപ്ലൈ ഓഫീസറെ ചുമതലപ്പെടുത്തി. നാല് വർഷം മുൻപ്  അച്ഛൻ മരിച്ചു പോയ 24 കാരിക്ക്  കൂലി പണിക്കാരിയായ അമ്മ മാത്രമാണ് ആശ്രയം. 

ഏക സഹോദരി വിവാഹിതയാണ് . അമ്മയും ഈ പെൺകുട്ടിയും  വാടകവീട്ടിലാണ് താമസം. മൂന്നു വർഷത്തോളമായി വൃക്ക രോഗം പെൺകുട്ടിയെ അലട്ടുന്നുണ്ട്. ഒന്നര വർഷം മുൻപ് വൃക്ക മാറ്റി വെച്ച ശേഷം ഒരു മാസം 15,000 വരെ  മരുന്നിന് ചെലവ് വരും. ആരോഗ്യ ഇൻഷുറൻസ് മുഖേനയാണ്  ഈ തുക കണ്ടെത്തിയിരുന്നത്.

ഇൻഷുറൻസ് കാലാവധി അവസാനിക്കുകയും തുക മുടങ്ങുകയും ചെയ്യുന്ന സാഹചര്യത്തിലാണ് പെൺകുട്ടിയും അമ്മയും അദാലത്തിൽ അഭയം തേടിയത്. എ എ വൈ കാർഡ് അടിയന്തിരമായി ലഭ്യമാക്കാൻ കമ്മീഷ്ണറേറ്റിലേക്ക് ഉടൻ  രേഖകൾ കൈമാറുമെന്ന് ജില്ല സപ്ലൈ ഓഫീസർ അറിയിച്ചു. നെന്മാറ ഗവ. ഐടിഐയിൽ നിന്ന് മൂന്ന് വർഷം മുൻപ് ഐ ടി ഐ  പൂർത്തിയാക്കിയതാണ് പെൺകുട്ടി.

ഏഷ്യാനെറ്റ് ന്യൂസ് ലൈവ് കാണാം