പട്ടിക്കര പള്ളിക്കടുത്ത് ഓട്ടോ നിർത്തി, സാധനം വാങ്ങാൻ കടയിലേക്ക് പോയി; തിരിച്ചത്തിയപ്പോൾ വണ്ടി കാണാനില്ല, മോഷണത്തിന് ശ്രമിച്ച പ്രതി അറസ്റ്റിൽ

കേച്ചേരിയിൽ നിർത്തിയിട്ട ഓട്ടോ ടാക്സി മോഷ്ടിച്ച കേസിലെ പ്രതിയെ കുന്നംകുളം പൊലീസ് അറസ്റ്റ് ചെയ്തു. എയ്യാൽ സ്വദേശിയായ വർഗീസിന്റെ ഓട്ടോയാണ് ചിറനെല്ലൂർ സ്വദേശി ഇബ്രാഹിം മോഷ്ടിച്ചത്. സമയോചിതമായ ഇടപെടലിലൂടെ പ്രതിയെ പിന്തുടർന്ന് പിടികൂടുകയായിരുന്നു.

തൃശൂർ: കേച്ചേരിയിൽ നിർത്തിയിട്ട ഓട്ടോ- ടാക്സി മോഷ്ടിച്ച കേസിൽ പ്രതിയെ കുന്നംകുളം പൊലീസ് അറസ്റ്റ് ചെയ്തു. ഇയ്യാൽ ചിറനെല്ലൂർ സ്വദേശി വൈശ്യം വീട്ടിൽ ഇബ്രാഹിമി (40)നെയാണ് കുന്നംകുളം പൊലീസ് അറസ്റ്റ് ചെയ്തത്. എയ്യാൽ സ്വദേശി ഒലക്കേങ്കിൽ വീട്ടിൽ വർഗീസിന്റെ (70) ഓട്ടോ ടാക്സിയാണ് പ്രതി മോഷ്ടിച്ചത്. കഴിഞ്ഞ ഞായറാഴ്ച വൈകിട്ട് അഞ്ചിനാണ് സംഭവം. പട്ടിക്കര മുസ്ലിം പള്ളിക്ക് സമീപത്ത് ഓട്ടോ ടാക്സി പാർക്ക് ചെയ്തതിനുശേഷം സമീപത്തെ കടയിലേക്ക് സാധനം വാങ്ങാൻ പോയി തിരിച്ചെത്തിയപ്പോഴാണ് ഓട്ടോറിക്ഷ നഷ്ടപ്പെട്ട വിവരം അറിയുന്നത്. തുടർന്ന് കുന്നംകുളം പൊലീസിൽ നൽകിയ പരാതിയുടെ അടിസ്ഥാനത്തിൽ പൊലീസ് കേസെടുത്തു. തുടർന്ന് സമീപ സ്റ്റേഷനുകളിലേക്ക് നൽകിയ വിവരത്തിന്റെ അടിസ്ഥാനത്തിൽ എരുമപ്പെട്ടി തിച്ചൂരിൽ ഓട്ടോ ടാക്സിയെ പിന്തുടർന്നാണ് പൊലീസ് പിടികൂടിയത്.