വയനാട്ടില് യുവാവ് എലിപ്പനി ബാധിച്ചു മരിച്ചു, രോഗം ബാധിച്ചാൽ ശ്രദ്ധിക്കേണ്ടത്...
Synopsis
പനിയും നടുവേദനയുമായി വെള്ളമുണ്ട പി.എച്ച്.സിയില് ചികിത്സ തേടുകയായിരുന്നു...
കല്പ്പറ്റ: വയനാട്ടിൽ യുവാവ് എലിപ്പനി ബാധിച്ച് മരിച്ചു. മക്കിയാട് പാലേരി കോളനിയില് ഗോപാലന് (40) ആണ് മരിച്ചത്. പനിയും നടുവേദനയുമായി വെള്ളമുണ്ട പി.എച്ച്.സിയില് ചികിത്സ തേടുകയായിരുന്നു. രോഗം ഭേദമാകാതെ വന്നതോടെ മാനന്തവാടി ഗവ. മെഡിക്കല്കോളേജ് ആശുപത്രിയിലും പിന്നീട് കോഴിക്കോട് ഗവ. മെഡിക്കല് കോളേജ് ആശുപത്രിയിലും പ്രവേശിപ്പിച്ചു. ചൊവ്വാഴ്ച പകല് ഒരുമണിയോടെയാണ് മരിച്ചത്. തൊപ്പിയുടെയും പരേതയായ ചണ്ണയുടെയും മകനാണ് അവിവാഹിതനായ ഗോപാലന്. സഹോദരങ്ങള്: ചന്ദ്രന്, വല്സല.
എലിപ്പനിക്കെതിരെ ജാഗ്രത പാലിക്കുകണമെന്ന് ഡി എം ഒ
ജില്ലയില് എലിപ്പനി മരണം റിപ്പോര്ട്ട് ചെയ്ത സാഹചര്യത്തില് എലിപ്പനിക്കെതിരെ ജാഗ്രത പാലിക്കണമെന്ന് ജില്ലാ മെഡിക്കല് ഓഫീസര് ഡോ.കെ സക്കീന അറിയിച്ചു. മലിനമായ മണ്ണ്, ജലം എന്നിവയുമായുള്ള സമ്പര്ക്കത്തിലൂടെയാണ് എലിപ്പനി ഉണ്ടാകുന്നത്. ആരംഭത്തില് കണ്ടെത്തി ചികിത്സിച്ചില്ലെങ്കില് സങ്കീര്ണതകളിലേക്കും മരണത്തിലേക്കും പോകാന് സാധ്യതയുണ്ട്. കര്ഷികവൃത്തിയില് ഏര്പ്പെട്ടിട്ടുള്ളവരും മലിനജലവുമായി സമ്പര്ക്കത്തില് വരുന്നവരും നിര്ബന്ധമായും എലിപ്പനി പ്രതിരോധത്തിനുള്ള ഗുളികയായ ഡോക്സിസൈക്ലിന് ആരോഗ്യ പ്രവര്ത്തകരുടെ നിര്ദേശാനുസരണം കഴിക്കേണ്ടതാണ്. ഡോക്സിസൈക്ലിന് എല്ലാ സര്ക്കാര് ആശുപത്രികളിലും സൗജന്യമായി ലഭിക്കും.
എന്താണ് എലിപ്പനി?
ലെപ്ടോസ്പൈറ ജനുസില്പ്പെട്ട ഒരിനം സ്പൈറോകീറ്റ മനുഷ്യരില് ഉണ്ടാക്കുന്ന ജന്തുജന്യ രോഗമാണ് എലിപ്പനി അഥവാ ലെപ്റ്റോസ്പൈറോസിസ്. രോഗാണുവാഹകരയായ എലി, അണ്ണാന്, പശു, ആട്, നായ എന്നിവയുടെ മൂത്രം, വിസര്ജ്യം മുതലായവ കലര്ന്ന വെള്ളവുമായി സമ്പര്ക്കം വരുന്നവര്ക്കാണ് ഈ രോഗം പകരുന്നത്. തൊലിയിലുള്ള മുറിവുകളില് കൂടിയോ കണ്ണ്, മൂക്ക്, വായ വഴിയോ രോഗാണു മനുഷ്യ ശരീരത്തില് പ്രവേശിക്കുന്നു.
രോഗ ലക്ഷണങ്ങള്
പെട്ടെന്നുണ്ടാവുന്ന ശക്തമായ പനിയും പനിയോടൊപ്പം ചിലപ്പോള് വിറയലും ഉണ്ടാവാം. കഠിനമായ തലവേദന, പേശീവേദന, കാല്മുട്ടിന് താഴെയുള്ള വേദന, നടുവേദന, കണ്ണിന് ചുവപ്പുനിറം, മഞ്ഞപ്പിത്തം, ത്വക്കിനും കണ്ണുകള്ക്കും മഞ്ഞനിറമുണ്ടാവുക, മൂത്രം മഞ്ഞ നിറത്തില് പോവുക എന്നീ രോഗലക്ഷണങ്ങളുമുണ്ടാകാം. ശക്തമായ പനിയോടൊപ്പം മഞ്ഞപ്പിത്തം ഉണ്ടാവുന്നുവെങ്കില് എലിപ്പനി ആണോയെന്ന് സംശയിക്കണം. മഞ്ഞപ്പിത്തത്തോടൊപ്പം വിശപ്പില്ലായ്മ, മനംമറിച്ചില്, ഛര്ദി എന്നിവയും ഉണ്ടാവാം. ചിലര്ക്ക് വയറുവേദന, ഛര്ദി, വയറ്റിളക്കം, ത്വക്കില് ചുവന്ന പാടുകള് എന്നിവ ഉണ്ടാവാം.
എലിപ്പനി കരളിനെ ബാധിക്കുമ്പോള് മഞ്ഞപ്പിത്തവും, വൃക്കകളെ ബാധിക്കുമ്പോള് മൂത്രത്തിന്റെ അളവ് കുറയുക, രക്തം കലര്ന്ന മൂത്രം പോവുക, കാലില് നീരുണ്ടാവുക എന്നിവയും ഉണ്ടാകുന്നു. ചിലരില് രക്തസ്രാവവും ഉണ്ടാവാം.
പ്രതിരോധ മാര്ഗങ്ങള്
മലിനജലവുമായി സമ്പര്ക്കത്തില് ഏര്പ്പെടുന്നവരും, ശുചീകരണ തൊഴിലാളികളും, വെള്ളത്തിലിറങ്ങുന്ന സന്നദ്ധ പ്രവര്ത്തകരും വ്യക്തി സുരക്ഷാ ഉപാധികളായ കയ്യുറ, മുട്ട് വരെയുള്ള പാദരക്ഷകള്, മാസ്ക് എന്നിവ ഉപയോഗിക്കുക. കെട്ടിക്കിടക്കുന്ന വെള്ളത്തില് കുട്ടികളെ കളിക്കാന് അനുവദിക്കരുത്. വെള്ളത്തിലിറങ്ങിയാല് കൈയ്യും കാലും സോപ്പ് ഉപയോഗിച്ച് നന്നായി കഴുകേണ്ടതാണ്. മലിനജലവുമായി സമ്പര്ക്കം വരുന്ന കാലയളവില് പരമാവധി ആറാഴ്ചത്തേക്ക് ആഴ്ചയിലൊരിക്കല് ഡോക്സിസൈക്ലിന് ഗുളിക 200 മില്ലീഗ്രാം (100 മില്ലിഗ്രാമിന്റെ രണ്ട് ഗുളിക) കഴിക്കണം.
എലിപ്പനിയുടെ പ്രാരംഭ ലക്ഷണങ്ങള് കണ്ടാല് ഉടന്തന്നെ, ആരോഗ്യ പ്രവര്ത്തകരുമായി ബന്ധപ്പെടണം. ഒരു കാരണവശാലും സ്വയം ചികിത്സക്ക് മുതിരരുത്.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam