'ബിയർ-വൈൻ പാർലർ വന്നാൽ നാട് ദുരിതത്തിലാകും'; എതിർപ്പുമായി നാട്ടുകാർ, പിന്മാറിയില്ലെങ്കിൽ ശക്തമായ പോരാട്ടം
Synopsis
കാസര്കോട് കോട്ടപ്പുറത്ത് ബിയര്-വൈന് പാര്ലര് ആരംഭിക്കാനുള്ള സര്ക്കാര് തീരുമാനത്തിനെതിരെ പ്രതിഷേധവുമായി പ്രദേശവാസികൾ. തീരുമാനം പിന്വലിച്ചില്ലെങ്കിൽ ശക്തമായ സമരം ആരംഭിക്കുമെന്ന് നാട്ടുകാര്
കാസര്കോട്: കാസര്കോട് കോട്ടപ്പുറത്ത് ബിയര്-വൈന് പാര്ലര് ആരംഭിക്കാനുള്ള സര്ക്കാര് തീരുമാനത്തിനെതിരെ പ്രതിഷേധവുമായി പ്രദേശവാസികൾ. എന്ത് വില കൊടുത്തും തടയുമെന്നാണ് നാട്ടുകാരുടെ നിലപാട്. ബിയര്-വൈൻ പാര്ലര് വന്നാൽ നാട് ദുരിതത്തിലാകുമെന്നും സര്ക്കാര് തീരുമാനം പിന്വലിക്കണമെന്നും നാട്ടുകാര് ആവശ്യപ്പെട്ടു.
സംസ്ഥാനത്ത് 74 ടൂറിസം കേന്ദ്രങ്ങളില് കൂടി ബിയര്-വൈന് പാര്ലറുകള് തുറക്കാൻ എക്സൈസ് വകുപ്പ് അനുമതി നല്കിയിരുന്നു. ഇതിലാണ് കാസര്കോട് നീലേശ്വരം കോട്ടപ്പുറവും ഉള്പ്പെട്ടിരിക്കുന്നത്. അനുമതി നൽകിയതോടെ എതിര്പ്പുമായി നാട്ടുകാര് രംഗത്തെത്തി. യാതൊരു കാരണവശാലും കോട്ടപ്പുറത്ത് ബിയര്-വൈന് പാര്ലര് തുറക്കാന് അനവദിക്കില്ലെന്നാണ് നാട്ടുകാരുടെ നിലപാട്.
നിരവധി വീടുകളും ആരാധനാലയങ്ങളും സ്കൂളുകളും മദ്രസകളും അടുത്തുള്ള കോട്ടപ്പുറം തീരദേശത്ത് ബിയര് പാര്ലര് തുടങ്ങാനുള്ള നീക്കം ഉപേക്ഷിക്കണമെന്നാണ് ഇവര് ആവശ്യപ്പെടുന്നത്. കോട്ടപ്പുറത്ത് ബിയര് പാര്ലര് തുടങ്ങരുതെന്ന് കാണിച്ച് ബന്ധപ്പെട്ടവര്ക്ക് പരാതി നല്കിയിട്ടുമുണ്ട്.