തിരഞ്ഞുപോയത് മറ്റൊരാളെ, വഴിയിൽ സ്‌കൂട്ടറിൽ കണ്ട യുവാവിനെ സംശയം തോന്നി പരിശോധിച്ചു; പൊലീസിന് കിട്ടിയത് എംഡിഎംഎ

കാസർകോട് കുമ്പളയിൽ 19 ഗ്രാം എംഡിഎംഎയുമായി മംഗലാപുരം സ്വദേശിയായ യുവാവ് അറസ്റ്റിലായി. മറ്റൊരു കേസിലെ പ്രതികളെ തിരയുന്നതിനിടെ സംശയാസ്പദമായ സാഹചര്യത്തിൽ കണ്ട യുവാവിനെ പൊലീസ് പരിശോധിച്ചപ്പോഴാണ് ലഹരിമരുന്ന് കണ്ടെത്തിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

കാസർകോട്: കുമ്പളയിൽ 19 ഗ്രാം എംഡിഎംഎയുമായി യുവാവ് പിടിയിലായി. മംഗലാപുരം ഉള്ളാൾ പെർമന്നൂർ സ്വദേശി സയ്യിദ് അഫ്രീദി (28) ആണ് അറസ്റ്റിലായത്. കുമ്പള പൊലീസ് ഒരു കേസിലെ പ്രതികളെ തിരയുന്നതിനിടയിലാണ് ഇയാൾ പിടിയിലായത്. കുമ്പള മുട്ടം സർവീസ് റോഡരികിൽ സംശയാസ്പദമായ സാഹചര്യത്തിൽ സ്കൂട്ടറിൽ ഇരിക്കുകയായിരുന്ന അഫ്രീദി. സംശയത്തിൻ്റെ അടിസ്ഥാനത്തിൽ പൊലീസ് പരിശോധന നടത്തി. അഫ്രീദി ധരിച്ചിരുന്ന പാൻ്റിൻ്റെ പോക്കറ്റിലായിരുന്നു എംഡിഎംഎ സൂക്ഷിച്ചിരുന്നത്. ഇത് പൊലീസ് കണ്ടെടുത്തു. പ്രതിയെ കസ്റ്റഡിയിലെടുത്ത പൊലീസ് പിന്നീട് വൈദ്യപരിശോധന അടക്കം പൂർത്തിയാക്കി. അറസ്റ്റ് രേഖപ്പെടുത്തിയ ശേഷം കോടതിയിൽ ഹാജരാക്കി. ഉയർന്ന അളവിൽ എംഡിഎംഎ കൈവശം വെച്ചതിനാൽ പ്രതിയെ ജുഡീഷ്യൽ കസ്റ്റഡിയിൽ വിട്ടു. ഇയാളുടെ ലഹരി ബന്ധങ്ങളെ കുറിച്ച് വിശദമായി അന്വേഷിക്കുമെന്ന് പൊലീസ് അറിയിച്ചു. ഇതിനായി ഇയാളെ പിന്നീട് കസ്റ്റഡിയിൽ വാങ്ങി ചോദ്യം ചെയ്യുമെന്നാണ് സൂചന.